რაგბის კავშირის პრეზიდენტობის კანდიდატად გოჩა სვანიძე წარადგინეს

კლუბებმა საქართველოს რაგბის კავშირის პრეზიდენტობის კანდიდატად გოჩა სვანიძე წარადგინეს, - ამის შესახებ რაგბის კავშირი თავისი ვებგვერდით იტყობინება:

"დღეს, 2020 წლის 13 იანვარს, საქართველოს რაგბის კავშირის ნამდვილ წევრთა (დიდი 10 კლუბები) მიერ საქართველოს გამგეობის სახელზე შემოვიდა განცხადება, 2020 წლის 30 იანვარს სრკ-ის საპრეზიდენტო არჩევნებში გოჩა სვანიძის კანდიდატურის წარდგინების შესახებ.

განცხადებაზე ხელს აწერენ დიდი 10-ის შემდეგი კლუბები: "ლელო", "ჯიქი", "აია", "ყოჩები", "აკადემია" და "იუნკერები".

შეგახსენებთ, 2020 წლის 10 იანვარს, საქართველოს რაგბის კავშირის გამგეობის კრებაზე დადგინდა სრკ-ის საპრეზიდენტო არჩევნების თარიღი -  2020 წლის 30 იანვარი და პროცედურები".

არჩევნებში აგრეთვე მონაწილეობას ყოფილი "ბორჯღალოსანი" ირაკლი აბუსერიძე და რაგბის კავშირის მაღალი სპორტული მიღწევების ყოფილი დირექტორი ბაჩო ხურციძე მიიღებენ.