საქართველოს ჩემპიონატის დასრულებამდე ორი მატჩიღა დარჩა. დღეს ავჭალის სარაგბო სტადიონზე ქვეყნის ჩემპიონი და წლევანდელი რეგულარული გათამაშების გამარჯვებული "არმია" ქუთაისის "აიას" უმასპინძლებს. ამათ შორის მოგებული დიდ ფინალში ჩემპიონის ტიტულს თბილისის "ლელოს" შეეცილება. წაგებული კი ბრინჯაოს მედალს დასჯერდება.
"არმიამ" წინასწარ ფინალამდე გზა აღმასვლით განვლო. როგორც უკვე ვთქვით, ამ გუნდმა რეგულარული გათამაშება მოიგო და შესარჩევ ფინალში "ლელოსთან" დამარცხდა. არმიელები სხვა გუნდებთან შედარებით თანაბრად არიან დაკომპლექტებული.
ისინი საკმაოდ ორგანიზებული, დალაგებული რაგბის მიმდევრები არიან. თუმცა შესარჩევ ფინალში ლელოსთან არავინ აღმოჩნდა გუნდში ისეთი, ვინც ლიდერობას იტვირთებდა.
"არმიას" არანაკლებ მძიმე ბრძოლის გადატანა მოუწევს წინასწარ ფინალში. ქუთაისის "აიამ", რომელმაც რეგულარულ გათამაშებაში მესამე ადგილი დაიკავა, ჯერ პლეი ოფში მოუგო ქვეყნის მრავალგზის ჩემპიონ თბილისის "ლოკომოტივს", მერე კი გასავარდნ ფინალში კიდევ ერთი თბილისური გუნდი, "არმაზი" დაამარცხა.
ქუთათურები, თამამად შეიძლება ითქვას, რომ ფორმის პიკში იმყოფებიან და ნებისმიერ მეტოქესთან გამკლავება შეუძლიათ. ხაზგასმით აღსანიშნავია უკანა ხაზის კარგი თამაში. ზურაბ ძნელაძე, გიორგი ფრუიძე, ბაკურ გოშაძე, გიორგი როხვაძე და მოთამაშე მწვრთნელი ბესიკ ხამაშურიძე მრისხანე ძალას წარმოადგენენ.
ერთი სიტყვით, ავჭალაში დღეს ძალიან საინტერესო ბრძოლა გაიმართება, რომელშიც გამარჯვებულის ვინაობის გამოცნობა ურთულესია.
რეგულარულ გათამაშებაში ერთმანეთთან დაპირისპირებაში ამ გუნდებმა თითო გამარჯვება მოიპოვეს. პირველ წრეში "აიამ" სტუმრად მოიგო 16:15. საპასუხო მატჩში არმიელებმა ქუთაისში რევანში აიღეს - 29:25.
წინასწარი ფინალი
27 აპრილი
არმია-აია
დიდი ფინალი
25 მაისი
ყოველდღიური სპორტული გაზეთი "ლელო"
