bleacherreport: ირლანდია დავით ქუბრიაშვილს უნდა უფრთხილდეს

16 ნოემბერს საქართველოს მორაგბეთა ნაკრები დუბლინში "ავივას" სტადიონზე გამართავს ტესტ-მატჩს მსოფლიოს ერთ-ერთი საუკეთესო ნაკრების, ირლანდიის წინააღმდეგ.

bleacherreport.com-მა თამაშის წინ მეტოქეებიდან თითო მორაგბე გამოარჩია, რომელთაც განსაკუთრებით უნდა დააკვირდნენ მაყურებლები.

ირლანდიის ნაკრებიდან საიტმა გორდონ დარსი გამოარჩია, ჩვენი გუნდიდან კი დავით ქუბრიაშვილი.

"როგორც უკვე აღვნიშნეთ, საქართველოს ნაკრები აქცენტებს მორკინალებზე გააკეთებს, სადაც საფრანგეთის ელიტური დივიზიონის მოთამაშეები ჰყავს. ამ ტალანტებს შორის დომინანტი დავით ქუბრიაშვილია. "სტად ფრანსეს" ბურჯი ერთ-ერთი ყველაზე გამოცდილია სტუმართა შორის.

შერკინების დროს ძალიან ბევრი იქნება დამოკიდებული 28 წლის ქუბრიაშვილზე, რომელიც შეეცდება საქართველოს ამ კომპონენტში უპირატესობა მოუპოვოს.

ქუბრიაშვილს სერიოზული დუელი ელის ჯეკ მაგრატთან, რომელმაც სამხრეთ აფრიკის ნაკრებთან მატჩში 17 ორთაბრძოლა გამოიარა. ვნახოთ, რას შესთავაზებს მას კვირას ქართველი გოლიათი".

მედიასთან კომენტარი გააკეთა ირლანდიის ნაკრების დაცვის მწვრთნელმა ლეს კისმა:

"ჩვენ განვახორციელეთ ცვლილებები და ბიჭებს ნაკრებში დამკვიდრების შესანიშნავი შანსი მივეცით.

ვიცით, რას წარმოადგენს საქართველოს ნაკრები. ჩვენ ამ გუნდთან გარკვეული ისტორია გვაკავშირებს. ყველას გვახსოვს 2007 წლის მსოფლიოს თასი, სადაც მათი დამარცხება გაგვიჭირდა.

თუმცა ახლა უფრო საქართველოს ნაკრების ახლანდელი მდგომარეობა გვაინტერესებს. სიმართლე კი ისაა, რომ გუნდი პროგრესირებს. გუნდი ეფექტურად თამაშობს ახალზელანდიელი მილტონ ჰეიგის ხელმძღვანელობით და თამაშებს იგებს.

მათ კიდევ უფრო დახვეწეს თავიანთი თამაშის ძლიერი მხარე. არავინ აძლევდა საქართველოს შანსს სამოასთან ტესტის წინ, "ლელოებმა" კი ის შეხვედრა მოიგო. მართალია, ტონგასთან ახლახან წააგეს, მაგრამ თამაშის დიდ მანძილზე, დიდებულად იბრძოლეს. ჩვენ ვიღებთ ამ გამოწვევას".