საფრანგეთის სარაგბო ჩემპიონატის ფედერალ 1 დივიზიონში რეგულარული გათამაშება დასრულდა. პლეი ოფის მერვედფინალში ქართველ მორაგბეთა ხუთმა გუნდმა გააღწია და ელიტურ, მეორე დივიზიონში გადასვლისთვის განაგრძობს ბრძოლას.
ესენია: "მაკონი", "რომანი", "სენ ნაზერი", "პერიგო" და "სენტ ეტიენი". ამასთან ერთად, დივიზიონის დატოვება ოთხ "ქართულ გუნდს": "სტრასბურს", "შატორენარს", "მარმანდს" და "სენ ჟუნიენს" მოუწევს.
A ჯგუფში წარმატებას ორმა "ქართულმა გუნდმა" მიაღწია - "მაკონმა" და "სენტ ეტიენმა".
რეგულარული გათამაშების ბოლო ტურში სწორედ ეს გუნდები დაუპირისპირდნენ ერთმანეთს. რევაზ ჟღენტისა და გიორგი გაბელიას "სენტ ეტიენს" შინ აუცილებლად გამარჯვება სჭირდებოდა შოთა
მასპინძლებმა ეს მოახერხეს კიდეც - 34:26. არადა, 47-ე წუთისთვის 26:6-ს აგებდნენ.
გარდატეხას სენტეტიენელებმა დასკვნით 20 წუთში მიაღწიეს. მათ ზედიზედ სამი ლელო გაიტანეს და პლეი ოფში თამაშის უფლება გაინაღდეს.
კოპალიანი ძირითად შემადგენლობაში იყო და 51-ე წუთზე შეცვალეს, გაბელია თამაშში მატჩის დასრულებამდე სამი წუთით ადრე ჩაერთო, მელიქიძე და ჟღენტი განაცხადში არ იყვნენ.
მერვედფინალში "მაკონის" მეტოქე "ნევერი" იქნება, "სენტ ეტიენი" კი გათამაშების ფავორიტს, "მონტობანს" დაუპირისპირდება.
A ჯგუფში პლეი ოფს მიღმა დარჩნენ "მონლუსონი" და "შალონი", რომლებმაც შესაბამისად, მეხუთე და მეექვსე ადგილები დაიკავეს.
ელიზბარ ყუფარაძისა და რეზო გიგაურის "მონლუსონმა" ბოლო ტურში გიორგი სულუაშვილის "სტრასბურს" უმასპინძლა და 32:5 მოუგო.
გიგაურმა სრულად ითამაშა, ყუფარაძე 64-ე წუთზე შეცვალეს, სულუაშვილი განაცხადში არ იყო. "სტრასბური", ისე, რომ ერთი მატჩიც არ მოუგია, დივიზიონიდან გავარდა.
გიორგი ჯაშიტაშვილის "შალონი" სტუმრად დამარცხდა პირველადგილოსან "ლილთან" - 12:22.
შეგახსენებთ, რომ "ლილის" ერთ-ერთი მწვრთნელი საქართველოს ნაკრების ყოფილი მესამეხაზელი დავით ბოლღაშვილია. ჯაშიტაშვილი სათადარიგოთა შორის იყო და მოედანზე 44-ე წუთიდან გამოჩნდა.
A ჯგუფი
ბურგ ან ბრესი-ბობინი 52:3, დიჟონი-ვიენი 9:6, მონლუსონი-სტრასბური 32:5, ლილი-შალონი 22:12, სენტ ეტიენი-მაკონი 34:26.
სატურნირო მდგომარეობა
1. ლილი - 74 ქულა, 2. ბურგ ან ბრესი - 72, 3. მაკონი - 48, 4. სენტ ეტიენი - 44, 5. მონლუსონი - 39, 6. შალონი - 38, 7. ბობინი - 36, 8. დიჟონი - 35, 9. ვიენი - 33, 10. სტრასბური - 2.
B ჯგუფში ქართველ მორაგბეთა ოთხი გუნდიდან პლეი ოფში მხოლოდ ერთმა, ირაკლი ნინიძის "რომანმა" გააღწია, რომელმაც საბოლოოდ 49 ქულით მესამე ადგილი დაიკავა.
რომანელებმა ბოლო ტურში სტუმრად ფრედ ითამაშეს "აგდისთან" - 34:34. ნინიძე თამაშში 52-ე წუთიდან ჩაერთო.
"რომანი" მერვედფინალში შინ მიიღებს შოთა ცხოვრებაშვილისა და ბაჩუკი გუჯარაიძის "სენ ნაზერს", რომელიც C ჯგუფის ბინადარი იყო. დივიზიონის დატოვება მოუწევს გიორგი კუთარაშვილის "შატორენარს", რომელმაც 26 ქულით ბოლო ადგილი დაიკავა.
ჩვენებურის ამ გუნდმა ბოლო ტურში სტუმრად წააგო თემურ გელანტიასა და ბექა ურჯუკაშვილის "ობენასთან" - 14:42.
გელანტია 41-ე წუთზე შეცვალეს, კუთარაშვილი თამაშში 50-ე წუთიდან ჩაერთო, ექვსი წუთის შემდეგ მოედანზე ურჯუკაშვილიც გამოჩნდა.
"ობენა" 44 ქულით მე-5 ადგილს დასჯერდა და ერთი ქულით ჩამორჩა პლეი ოფში გასულ მეოთხეადგილოსან "ლა სეინს".
კიდევ ერთი ქართველის, დავით კაჭარავას "როდეზმა" შინ წააგო პირველადგილოსან "ბურგუენთან" - 12:35. კაჭარავამ თავიდან ბოლომდე ითამაშა.
B ჯგუფი
ბლანიაკი-ვალანსი 19:17, ობენა-შატორენარი 42:14, აგდი-რომანი 34:34, როდეზი-ბურგუენი 12:35, ლავორი-ლა სეინი 19:21.
სატურნირო მდგომარეობა
1. ბურგუენი - 79 ქულა, 2. ვალანსი - 51, 3. რომანი - 49, 4. ლა სეინი - 45, 5. ობენა - 44, 6. ბლანიაკი - 39, 7. ლავორი - 36, 8. როდეზი - 33, 9. აგდი - 30, 10. შატორენარი - 26.
C ჯგუფში, როგორც უკვე აღვნიშნეთ, პლეი ოფში "სენ ნაზერმა" გააღწია. ამ გუნდთან ერთად მეორე დივიზიონში აღზევებისთვის განაგრძობს ბრძოლას თედო ზიბზიბაძის "პერიგოც", რომელმაც ბოლო ტურში სტუმრად დაამარცხა "ლანჟონი" 34:26 და 62 ქულით მესამე ადგილზე გავიდა.
ზიბზიბაძე თადარიგში იყო და თამაშში 52-ე წუთიდან ჩაერთო.
პერიგოელთა მეტოქე მერვედფინალში "ვალანსი" იქნება. "სენ ნაზერის" მომავალ მეტოქეზე უკვე ვთქვით.
ამ გუნდმა ბოლო ტურში შინ დიდი ანგარიშით მოუგო "ნუარს" - 56:7. გუჯარაიძემ, რომელმაც თავიდან ბოლომდე ითამაშა, 79-ე წუთზე ლელო გაიტანა, ცხოვრებაშვილი განაცხადში არ იყო.
ბოლო ადგილზე გავიდა და ფედერალ 1 დივიზიონის დატოვება მოუწევს ნიკოლოზ მაღალდაძისა და ირაკლი ჩომახაშვილის "მარმანდს", რომელმაც ბოლო ტურში სტუმრად წააგო "სენ ჟან დე ლუზთან" - 14:40. ქართველ მორაგბეებს არ უთამაშიათ.
C ჯგუფი
ლანჟონი-პერიგო 26:34, სენ ნაზერი-ნუარი 56:7, სენ ჟან დანჟელი-ვანი 19:19, სენ ჟან დე ლუზი-მარმანდი 40:14, ტიროსი-აგეტმო 28:13.
სატურნირო მდგომარეობა
1. ტიროსი - 72 ქულა, 2. სენ ნაზერი - 66, 3. პერიგო - 62, 4. სენ ჟან დე ლუზი - 45, 5. ვანი - 41, 6. ლანჟონი - 38, 7. სენ ჟან დანჟელი - 29, 8. აგეტმო - 28, 9. ნუარი - 26, 10. მარმანდი - 20.
დივიზიონის დატოვება მოუწევს D ჯგუფში მოასპარეზე კიდევ ერთ "ქართულ გუნდს". მერაბ კვირიკაშვილისა და გიორგი მჭედლიშვილის "სენ ჟუნიენმა", რომელმაც ბოლო ტურში სტუმრად წააგო "სენ მედართან" 19:28, საბოლოოდ 23 ქულა დააგროვა და ბოლო ადგილზე გავიდა.
რვა ქულით მეტი დააგროვა და გათამაშება მე-8 ადგილზე დაასრულა სიმონ მაისურაძისა და ლაშა მალაღურაძის "ბაგნერემ", რომელმაც ბოლო ტურში შინ წააგო "ნევერთან" - 14:31.
D ჯგუფი
მონტობანი-ოლორონი 57:26, კასტანე-ლანამეზანი 46:10, ლიმოჟი-ლურდი 23:27, ბაგნერე-ნევერი 14:31, სენ მედარი-სენ ჟუნიენი 28:19.
სატურნირო მდგომარეობა
1. მონტობანი - 74 ქულა, 2. ნევერი - 65, 3. კასტანე - 47, 4. ოლორონი - 44, 5. ლიმოჟი - 40, 6. ლურდი - 38, 7. ლანამეზანი - 37, 8. ბაგნერე - 31, 9. სენ მედარი - 30, 10. სენ ჟუნიენი - 23.
მერვედფინალი
დიჟონი-ლილი, რომანი-სენ ნაზერი, კასტანე-ბურგ ან ბრესი, ლა სეინი-ტიროსი, მაკონი-ნევერი, სენ ჟან და ლუზი-ბურგუენი, პერიგო-ვალანსი, სენტ ეტიენი-მონტობანი.
ყოველდღიური სპორტული გაზეთი "ლელო"
