ახალ ზელანდიაში გასამართი მსოფლიოს თასის გათამაშება რიგით მეშვიდეა. ვფიქრობთ, საინტერესო იქნება თვალი გადავავალოთ მსოფლიო რაგბის განვლილ უდიდეს ფორუმებს და მათი გმირები (ანტიგმირებიც) გავიხსენოთ. პირველი მსოფლიოს თასის გათამაშება 1987 წელს ავსტრალიასა და ახალ ზელანდიაში გაიმართა, რომელიც სრულიად ლოგიკურად, პლანეტის საუკეთესო გუნდის, "ოლ ბლექსის" გამარჯვებით დასრულდა. შეგახსენებთ, რომ მაშინ შეჯიბრებაში 16 ქვეყნის ნაკრები ასპარეზობდა.
ტურნირის აღმოჩენა: ფიჯის ნაკრები
ფიჯის ნაკრებმა ახალი ზელანდიის ეროვნული გუნდის შემდეგ ტურნრზე ყველაზე მეტი ქულა დააგროვა. ფიჯელებმა C ჯგუფში, სადაც ახალი ზელანდიის ნაკრებმა პირველობა არავის დაუთმო, იტალიისა და
ტურნირის იმედგაცრუება: ინგლისის ნაკრები
მიუხედავად იმისა, რომ ჯგუფური ტურნირი დასძლია, ცხადია, "პომების" გამოსვლას ამ მსოფლიოს თასზე აქტივში ვერ ჩავთვლით. მეოთხედფინალში ინგლისლებმა ისტორიულ მეტოქესთან, უესლის ეროვნულ გუნდთან წააგეს - 3:16.
მანამდე, ჯგუფურ ეტაპზე, მართალია, ინგლისის ნაკრებმა საკმაოდ შთამბეჭდავი ანგარიშით დაამარცხა იაპონია (60:7) და აშშ (34:6), მაგრამ ეს "პომების" მხოლოდ ეპიზოდური გაელვება გამოდგა.
ტურნირის გუნდი: ახალი ზელანდიის ნაკრები
ახალი ზელანდიის ნაკრებმა მსოფლიოს თასის პირველვე გათამაშებაზე დაამტკიცა პლანეტის საუკეთესო გუნდის სტატუსი. "ოლ ბლექსმა", რომლის ღირსებასაც ისეთი უმაღლესი დონის ვარსკვლავები იცავდნენ ჯონ ქირვანი, მაიკ ჯოუნზი, შონ ფიცპატრიკი, დევიდ კირკი და გრანტ ფოქსი, რომ იყვნენ, ყველა შეხვედრა აშკარა უპირატესობით მოიგო. შედეგად ახალზელანდიელთა გუნდის კაპიტანი დევიდ კირკი პირველი იყო მსოფლიო რაგბის ისტორიაში, ვინც ვებ ელისის თასი აღმართა.
შთამბეჭდავია, "ოლ ბლექსის" სტატისტიკა. თავად განსაჯეთ, 50 ქულა საშუალოდ მატჩში. მგეზავი გრანტ ფოქსი კი საუკეთესო მექულე გახდა, მან "ოლ ბლექსს" 126 ქულა შესძინა.
ტურნირის მატჩი: საფრანგეთი-ავსტრალია
ეს შეხვედრა წარმოუდგენელი სცენარით განვითარდა. დაუვიწყარი, ძალიან ლამაზი და დაძაბული მატჩი გამოდგა. თამაში სიდნეიში, კონკორ ოვალზე გაიმართა და, როგორც მოსალოდნელი იყო, ფავორიტად მიჩნეული ავსტრალიის ნაკრების უპირატესობით დაიწყო. "ვოლაბები" მთელი მატჩის განმავლობაში ანგარშში წინ იყვნენ. ჯერ 9:0 დაწინაურდნენ, თუმცა პირველი ტაიმი მხოლოდ სამი ქულის სხვაობით 15:12 მოიგეს.
მეორე ნახევარი დასასრულს უხალოვდებოდა. ავსტრალია 24:21 იგებდა. ფრანგების დამრტყმელმა დიდიე კამბერაბერომ საჯარიმოდან ანგარიში გაათანაბრა. ყველა მოელოდა, რომ დამატებითი დრო დაინიშნებოდა, თუმცა ფრანგები, სრულიად სხვანაირად ფიქრობდნენ. მათ საკუთარი მოედნის სიღრმიდან შესანიშნავი შეტევა წამოიწყეს. ხელდახელ ბურთაობაში ფრანგთა თერთმეტმა მორაგბემ მიიღო მონაწილეობა. გამარჯვების მომტანი ლელო კი ფრანგული რაგბის ლეგენდამ სერჟ ბლანკომ გაიტანა და "ლე ბლე" ფინალში გაიყვანა.
ტურნირის საუკეთესო მოთამაშე: სერჟ ბლანკო
ვისაც არ უნახავს მისი თამაში, ძალიან ბევრი დაკარგა. ელასტიური, უაღრესად სწრაფი და მახვილგონიერი ბლანკო მსოფლიოს ნებისმიერი უძლიერსი გუნდის მშვენება იქნებოდა. ავსტრალიის ნაკრებთან მატჩში გატანილი მისი ლელო კი, უდავოდ უნდა მივიჩნიოთ შედევრად.
ყოველდღიური სპორტული გაზეთი "ლელო"
