ინგლისის ნაკრებმა ახალ ზელანდიაში გასამართი მსოფლიოს თასისთვის უკეთ მოსამზადებლად დახმარებისთვის ფორმულა 1-ის ერთ-ერთ წამყვან საჯინიბოს "მაკლარენს" მიმართა. პილოტები ლუის ჰემილტონი და ჯეისონ ბატონი "პომებს" თავიანთ ტექნიკურ ცოდნას გაუზიარებენ. 2003 წლის მსოფლიოს თასზე, რომლის გამარჯვებულიც ინგლისის ნაკრები გახდა, "პომების" მაშინდელი მწვრთნელის კლაივ ვუდვორდის ფილოსოფია მარტივი იყო. ყველაფერი გააკეთე ერთი პრიცენტით უკეთ, ვიდრე სხვა. ამ მსოფლიოს თასზე ინგლისელებმა პირველად მოირგეს მოტკეცილი კვართები და, ფაქტობრივად, მოდის კანონმდებლები გახდნენ.
მსოფლიოს თასის დაწყებამდე ინგლისის ნაკრებისა და "მაკლარენის" ტექნიკოსები მწვრთნელებსა და მოთამაშეებს შორის კომუნიკაციის დახვეწაზე იმუშავებენ.
"2003 წლის მსოფლიოს თასზე ჩვენი გუნდის თამაში ძირითადად სისწრაფეებზე იყო აგებული. სირბილი, სირბილი, და სირბილი... აი, რა იყო მაშინ გუნდის მთავარი იარაღი. ახლა მხოლოდ ამით შორს ვერ წავალთ. მსოფლიოს რაგბიში ბევრი რამ შეიცვალა. ფორმულა 1-ის სპეციალისტები დაგვეხმარებიან სწორად ავაწყოთ თამაშის რიტმი, გავარკვიოთ, სად გადის თითოეული მორაგბის შესაძლებლობების ზღვარი, რაც საშუალებას მოგვცემს ტრავმებისგან თავი დავიზღვიოთ", - თქვა ინგლისის ნაკრების თავკაცმა მარტინ ჯონსონმა.
ინგლისის ნაკრები
შერკინება: მორის ბოთა, დენ კოლი, ალექს კორბისერო, ტომ კროფტი, ლუის დეკონი, პაულ დორან ჯოუნზი, ნიკ ისტერი, ჰენრი ფური, დილან ჰარტლი, ჯეიმზ ჰესკელი, კორტნი ლოუ, ლი მირსი, ლუის მუდი, ტომ პელმერი, ტიმ რაიანი, კრის რობშოუ, საიმონ შოუ, ანდრიუ შერიდანი, მეთ სტივენსი, სტივ თომსონი, დევიდ ვილსონი, ტომ ვუდი.
უკანა ხაზი: დელონ ერმითიჯი, კრის ეშტონი, მეთ ბანაჰანი, დენ კერი, მარკ კუეტო, ტობი ფლუდი, რიკუ ფლატი, ბენ ფოდენი, შონთაი ჰეპი, ჩარლი ჰოჯსონი, უგო მუნი, ჩარლი შარპი, ჯო სიმპსონი, მაიკ თინდოლი, მანუ ტულიგაი, რიჩარდ ვიგლსვორსი, ჯონი ვილკინსონი, ბენ იანგზი.
ყოველდღიური სპორტული გაზეთი "ლელო"
