პროფესიონალური კრივის საინტერესო ბრძოლები თბილისში

14 ნოემბერს თბილისში, საქართველოს პროფესიონალური კრივის კავშირისა და Boxing Group Promotion-ის ორგანიზებით, სარეიტინგო ბრძოლები გაიმართა პროფესიონალურ კრივში. დაპირისპირებებში მონაწილეობა მიიღეს მებრძოლებმა საქართველოს სხვადასხვა ქალაქის კრივის კლუბებიდან. ღონისძიებაზე მაყურებელთა დასწრება დაშვებული არ იყო, თუმცა ქომაგებს შეეძლოთ "ფეისბუქის" გვერდ Boxing Georgia-ს მეშვეობით პირდაპირი ეთერის რეჟიმში ედევნებინათ თვალი ორთაბრძოლებისთვის.

მშვენიერი კრივით დაამახსოვრა თავი დამსწრე საზოგადოებას რუსთაველმა ირაკლი შარიაშვილმა. 61 კგ წონით კატეგორიაში გამართულ ბრძოლაში მისი მეტოქე გორელი გიორგი ჩიფჩიური იყო. ჩიფჩიური ერთხანს ცდილობდა მძლავრი წინააღმდეგობის გაწევას, თუმცა შარიაშვილმა ხელთ იგდო უპირატესობა, ზუსტი და მძლავრი დარტყმებით გატეხა მეტოქე და ვადაზე ადრე მოიპოვა გამარჯვება.

საინტერესო გამოდგა უკვე გამოცდილი მებრძოლების, გორელი ბადრი გოგიჩაშვილისა და ბორჯომელი მერაბ გუკასიანის დაპირისპირება 78 კგ წონით კატეგორიაში. რთულ და დაძაბულ შერკინებაში გოგიჩაშვილმა შეძლო უპირატესობის მოპოვება და ქულებით დაამარცხა მეტოქე.

დიდ ინტერესს იწვევდა მძიმე წონაში გასამართი დაპირისპირება ახალგაზრდა ქუთაისელ მოკრივე რიჩარდ ფხაკაძესა და გამოცდილ თბილისელ დავით გეგეშიძეს შორის. ფხაკაძემ სულ რამდენიმე კვირის წინ, შვედეთში ნოკაუტით დაამარცხა ადგილობრივი მებრძოლი და კარგი განწყობითა და თავდაჯერებით გავიდა რინგზე. რაც შეეხება გეგეშიძეს, მას დიდი გამოცდილება უმაგრებდა ზურგს როგორც სამოყვარულო, ასევე პროფესიონალურ კრივში. ორთაბრძოლა მართლაც საინტერესოდ და დაძაბულად წარიმართა. ფხაკაძე ცდილობდა მეტოქეზე იერიშების მიტანას, თუმცა გეგეშიძე ფიზიკური მონაცემებისა და გამოცდილების ხარჯზე კარგად იცავდა თავს და არც კონტრშეტევებს აკლებდა მეტოქეს. თუმცა ბრძოლის დასასრულს თბილისელი მოკრივის მოქმედებებში დაღლილობამ იჩინა თავი, რითაც ისარგებლა ფხაკაძემ და ქულებით მოიპოვა გამარჯვება.

ძალიან კარგი შთაბეჭდილება დატოვა დებიუტანტმა მოკრივემ მესტიიდან ზურაბ ნიგურიანმა, რომელმაც იოლად სძლია თავის მეტოქეს, გორელ დავით ბიძინაშვილს და აშკარად დაანახა ყველას, რომ დიდი პოტენციალი აქვს.

მშვენიერი ნოკაუტი შესთავაზა საზოგადოებას ვარიანის კრივის სკოლის აღზრდილმა თორნიკე კანდელაკმა, რომელმაც პირველივე რაუნდში უძლიერესი და უზუსტესი დარტყმით გატეხა კასპელი რომა გადიმოვის წინააღმდეგობა.

თვალსასეირო გამოდგა გორელი გიორგი ბიბილურისა და თბილისელი გიორგი მახარაშვილის ჯახი. თავდაუზოგავი და დაუნდობელი ბრძოლა გარდამავალი უპირატესობით წარიმართა და საბოლოოდ მახარაშვილის ტრიუმფით დასრულდა.

არანაკლებ საინტერესო იყო სხვა ორთაბრძოლებიც:




ზაალ კვეზერელი - გიორგი თამაზაშვილი (გაიმარჯვა კვეზერელმა)


მიხეილ სოლონინკინი - ნიკა მაყიშვილი (გაიმარჯვა სოლონინკინმა)


დავით შერვაშიძე - როშა დოჩენკო (გაიმარჯვა შერვაშიძემ)


სლავა მარგიშვილი - რობერტ ფარნაშვილი (გაიმარჯვა მარგიშვილმა)

მომავალი სარეიტინგო ბრძოლები უკვე დაგეგმილია - 12 დეკემბერს დაპირისპირებებს კვლავ თბილისი უმასპინძლებს.