საფრანგეთის საფინანსო პროკურატურამ იმ კორუფციული სქემის მტკიცებულება იპოვა, რომელიც მძლეოსნობის საერთაშორისო ფედერაციასა და საერთაშორისო ოლიმპიურ კომიტეტს შორის არსებობდა."გამოძიების მსვლელობისას აღმოვაჩინეთ ფართომასშტაბიანი კორუფციული სისტემა პაპე მასატ დიაკს, მის ვაჟ ლამინ დიაკს, საერთაშორისო ფედერაციის ექსპრეზიდენტსა და ოლიმპიური კომიტეტის მაღალჩინოსანს შორის. აღმოჩენილია დოკუმენტები, რომლებიც ამტკიცებს მძლეოსნობის ფედერაციისა და საერთაშორისო ოლიმპიური კომიტეტის წევრების მისამართით ფულად გადარიცხვებს მსხვილი სპორტული ტურნირების მასპინძელი ქალაქების არჩევაში დასახმარებლად", - წერია განცხადებაში.
თავდაპირველად, გამოძიება ეხებოდა 2020 წლის ოლიმპიადის მასპინძლის არჩევნებს. მოგვიანებით, პროკურატურა 2016 წლის ოლიმპიადის მასპინძელი ქალაქის არჩევითაც დაინტერესდა,
შეგახსენებთ, რომ ბრაზილიურმა პოლიციამ ჩხრეკა ჩაატარა 2016 წლის ოლიმპიადის საორგანიზაციო კომიტეტის თავმჯდომარის, კარლოს არტურ ნუზმანის სახლში. ამ ოპერაციაში ფრანგული პოლიცია მონაწილეობდა. ნუზმანი ეჭვმიტანილია საერთაშორისო ოლიმპიური კომიტეტის წევრების მოსყიდვაში. მას მალე დაჰკითხავენ.
(იბეჭდება მცირე ცვლილებით)
ყოველდღიური სპორტული გაზეთი "ლელო"
