10-17 სექტემბერს მალტა ახალგაზრდა წყალბურთელ ვაჟთა ევროპის ჩემპიონატის ფინალურ ეტაპს უმასპინძლებს. მედლებისთვის 16 უძლიერესი ნაკრები იბრძოლებს. წილისყრით ისინი ოთხ ჯგუფში გადანაწილდნენ:A ჯგუფი: ხორვატია, უნგრეთი, მონტენეგრო, უკრაინა
B ჯგუფი: ესპანეთი, იტალია, რუმინეთი, გერმანია
C ჯგუფი: სერბეთი, მალტა, საქართველო, საფრანგეთი
D ჯგუფი: საბერძნეთი, რუსეთი, სლოვაკეთი, თურქეთი
ჯგუფური პაექრობების შემდეგ სამ-სამი საუკეთესო გუნდი მომდევნო ეტაპზე გადის. გამარჯვებულები მეოთხედფინალის საგზურებს დაიბევებენ, ხოლო მეორე-მესამეადგილოსნები მეოთხედფინალის ოთხი ვაკანტური ადგილისთვის იბრძოლებენ მერვედფინალში.
საქართველოს ნაკრებმა, რევაზ ჩომახიძის ხელმძღვანელობით, დასკვნით რაუნდში მონაწილეობის უფლება წლეულს შესარჩევ ტურნირში მოიპოვა. ეს შეჯიბრება
გადამწყვეტი ორთაბრძოლებისთვის ჩომახიძის შეგირდები კარგა ხანია, ინტენსიურად ემზადებიან. რამდენიმე საწვრთნელი შეკრება გაიარეს, მათ შორის - რუმინეთსა და თურქეთში. 1-3 სექტემბერს კი მალტაზე გამგზავრებამდე ჩვენებს გენერალური რეპეტიცია დიღმის ღია ოლიმპიურ აუზზე ექნებათ.
- მოთამაშეთა შესაძლებლობების საბოლოო შემოწმების მიზნით, 1-3 სექტემბერს თბილისში ახალგაზრდა წყალბურთელ ვაჟთა საერთაშორისო ტურნირი გაიმართება ძმები ჩაჩავების თასზე, - გვითხრა რევაზ ჩომახიძემ. - დღეიდან შეჯიბრების მთავარი პრიზისთვის მასპინძლებთან ერთად რუსები, რუმინელები და თურქები იბრძოლებენ.
უშეღავათო პაექრობების მოწმენი გავხდებით, რადგან ოთხივე ნაკრები ევროპირველობის ფინალური ეტაპის მონაწილეა. თბილისში ტურნირის ფავორიტები ჩრდილოელი მეზობლები არიან, ჩვენ, რუმინელებსა და თურქებს კი მეტ-ნაკლები უპირატესობით თანაბარი ძალის გუნდები გვყავს. რადგანაც მალტის მატჩები ღია აუზზე ჩატარდება, გადავწყვიტეთ, თბილისური ტურნირიც მსგავს სარბიელზე გავმართოთ დიღომში, რაც დახურულ აუზში ვარჯიშის შემდეგ საევროპედ კარგი პრაქტიკა იქნება.
- ნაკრების საბოლოო შემადგენლობა უკვე გაირკვა?
- დიახ. სამწუხაროდ, ტრავმა ვერ მოიშუშა და გუნდს ვერ შეეშველება კაპიტანი გიორგი წულუკიანი, რომელიც, ფაქტობრივად, ნაკრების ლიდერი იყო. მას თორნიკე ხვინგია შეცვლის.
ტურნირსა და ევროპის პირველობაზე, ასევე, ითამაშებენ გიორგი ბარაბაძე, თორნიკე დიასამიძე, თემურ ჭეიშვილი, ვიტალი მემანიშვილი, გურამ კუჭუაშვილი, გიორგი ქათამაძე, საბა დვალი, ლევან ხოხაშვილი, დავით ცხაკაია, კახა სამყურაშვილი, ნიკოლოზ იმნაიშვილი და ნიკოლოზ ქარჩავა.
- ჯგუფური ეტაპის მეტოქეებზე რას იტყვით?
- საერთოდ, ევროპირველობის ფავორიტია სერბეთი. საფრანგეთის ნაკრებს გაზაფხულზე თბილისში ვძლიეთ, მაგრამ დარწმუნებული ვარ, გადამწყვეტი რაუნდისთვის შემადგენლობას გააძლიერებდნენ, ვიდეოზე ვნახეთ მალტის გუნდის თამაში. გასათვალისწინებელია, რომ კუნძულელები ასპარეზობის მასპინძლები არიან.
ყოველივეს მიუხედავად, უიმედოდ არ ვართ. ჩვენი მიზანია, სულ მცირე, ჯგუფში მესამე ადგილზე გასვლა, რომ მერვედფინალში ასპარეზობის საშუალება მოგვეცეს. ვეცდებით, ქომაგები გავახაროთ.
1-ლი სექტემბერი. რუმინეთი-რუსეთი 16:00, საქართველო-თურქეთი 17:30
2 სექტემბერი. თურქეთი-რუსეთი 10:00, საქართველო-რუმინეთი 11:30
3 სექტემბერი. რუმინეთი-თურქეთი 10:00, საქართველო-რუსეთი 11:30
(იბეჭდება მცირე ცვლილებით)
ყოველდღიური სპორტული გაზეთი "ლელო"
