სერიოზული ცვლილებები იგეგმება "ლოტუს-რენოში". როგორც ჩანს, ფრანგული საჯინიბოს ხელმძღვანელობას არ აწყობს ტრავმირებული რობერტ კუბიცას შემცვლელის ნიკ ჰაიდფელდის მიერ მიმდინარე სეზონში ნაჩვენები შედეგები და მისი შეცვლა გადაწყვიტა.გუშინ "ლოტუს-რენოს" პრეს-სამსახურმა გაავრცელა ცნობა იმის შესახებ, რომ უნგრეთში მომავალ სარბოლო უქმეებზე პარასკევის პირველ თავისუფალ პრაქტიკას არა ჰაიდფელდი, არამედ ბრაზილიელი ბრუნო სენა ჩაატარებს.
"აღელვებული ვარ იმის გამო, რომ საშუალება მექნება "ლოტუს-რენოს" საჭეს მივუჯდე. ძლიერ გუნდებში ასეთი შანსი იშვიათად ჩნდება და მადლობელი ვარ "ლოტუს-რენოს" ხელმძღვანელობის, რომელიც საკუთარი პოტენციალის გამოვლენის საშუალებას მაძლევს", - განაცხადა სენამ.
მაგრამ,
რამდენიმე დღის წინ ჰაიდფელდმა ჟურნალისტებს განუცხადა, რომ "ჰუნგარორინგზე" ახალ ჩასაბერ სისტემას გამოცდიდა, მაგრამ გუნდმა სხვაგვარი გადაწყვეტილება მიიღო და ეს მისია სენას დააკისრა.
"ლოტუს-რენოს" ხელმძღვანელმა ერიკ ბულიემ რამდენჯერმე განაცხადა, რომ კმაყოფილი არ არის ჰაიდფელდის შედეგებით, თანაც გუნდს ფინანსური პრობლემები აქვს და სენას სპონსორები მისწრება იქნება საჯინიბოსთვის.
თუ ჭორებს დავუჯერებთ, "ლოტუს-რენოს" შემადგენლობაში ცვლილება ზაფხულის არდადეგების შემდეგ მოხდება, ბევრს კი გარანტირებული ჰგონია ბრუნო სენას ბრაზილიის გრანპრიზე გამოსვლა.
ყოველდღიური სპორტული გაზეთი "ლელო"
აირტონს უთქვამს: თუ თქვენ გგონიათ რომ სწრაფი ვარ, დაელოდეთ ჩემს დიშვილს – ბრუნოს!!!