წელს, ფორმულა 1-ის ეტაპების უმრავლესობა ერთნაირი სცენარით მიმდინარეობს: სებასტიან ფეტელი პოულიდან იღებს სტარტს და იგებს რბოლას. მიუხედავად იმისა, რომ ჩემპიონატის დასრულებამდე ხუთი ეტაპია დარჩენილი, უკვე მომდევნო კვირას, იაპონიის გრანპრიზე 24 წლის გერმანელი მეორე საჩემპიონო ტიტულს გაიფორმებს. გაზეთი “ბილდი” სებას ტოტალური დომინირების შვიდ მიზეზს ასახელებს.
შეცდომებზე მუშაობა
გასული წელი ჩემპიონატის ბოლო რბოლაში სებასტიანის საოცარი მოგების გარდა, იმ უსიამოვნო ინციდენტებითაც დაგვამახსოვრდა, რომელშიც გერმანელი ხშირად ხვდებოდა ხოლმე. თურქეთში ფეტელი შეეჯახა თანაგუნდელ მარკ უებერს, უნგრეთში უსაფრთხოების მანქანის უკან “ჩაეძინა”, ჯარიმა მიიღო და გამარჯვება დაკარგა,
მაგრამ 2011 წლის სეზონის წინ სებასტიანმა შესამჩნევ პროგრესს მიაღწია, პირველ რიგში, სულელური შეცდომები აუკრძალა საკუთარ თავს. წელს ფეტელი ზუსტად მოქმედებს გასწრების დროს და არ კარგავს თავს პოზიციის შენარჩუნებისას. რა თქმა უნდა, საინტერესო თავგადასავლები გერმანელსაც ჰქონდა, მაგალითად კანადური რბოლის ბოლო წრეზე, მაგრამ, საერთო ჯამში, ის უფრო მობილიზებული და მშვიდი პილოტი გახდა, ვიდრე წინა წლებში იყო.
გარდა ამისა, სება მუშაობს კიდევ ერთი სტერეოტიპის დამსხვრევისთვის - თითქოს მან გასწრება არ იცის.
“ყველა, ვინც ამტკიცებდა, რომ ის არ არის ნამდვილი პილოტი და მხოლოდ ქულების შესაგროვებელი მანქანაა, მონცაზე ალონსოს თამამი გასწრების შემდეგ, საკუთარ თვალებს არ უჯერებდა. დღეს, სებასტიანი - სანიმუშო პილოტია”, - ამბობს “რედ ბულის” შეფი კრისტიან ჰორნერი, რომელიც აღნიშნავს, რომ მისი შეგირდი სულ უფრო და უფრო ძლიერი ხდება.
ფსიქოლოგია
ფეტელის სტაბილურობა, უმეტესწილად, კარგ ფსიქოლოგიურ მდგომარეობას უკავშირდება - პირველი ტიტულის მოგების შემდეგ ის უფრო გაიხსნა და უფრო დამაჯერებლად იგრძნო თავი.
“როცა ტიტულს მოიგებ, უკვე აღარ გრძნობ ძლიერ დაძაბულობას. ზეწოლა - ეს არ არის მხოლოდ უკან გამოდევნებული მეტოქეები. ზეწოლა ისაა, როცა გამარჯვებიკენ სწრაფვისთვის არანორმალურად მომთხოვნი ხდები საკუთარი თავის მიმართ”, - მიიჩნევს ჯენსონ ბატონი.
განსხვავებით წინა ჩემპიონატებისგან, სებასტიანს არ უწევს საკუთარი თავის “მომართვა” ყოველი ახალი რბოლის წინ - მისი უპირატესობა ჩემპიონატში მხოლოდ იზრდება, ე. ი. მღელვარების საბაბი არ არსებობს.
გუნდის მხარდაჭერა
პილოტების სულიერი კომფორტი ხშირად უკავშირდება გუნდთან ურთიერთობას. და დღეს სებასტიანს ამ მხრივ სრული იდილია აქვს, რადგან “რედ ბული” მთლიანად თავისი ლიდერის მხარეს არის. კრისტიან ჰორნერი და ჰელმუტ მარკო - ეს მხოლოდ მწვერვალია შიდაგუნდური ურთიერთობისა. ფეტელის ადამიანური თვისებები - ურთიერთობაში უშუალობა და სიცოცხლით აღსავსე ხასიათი - რბოლების დროსაც მასზე მუშაობს: მექანიკოსები მზად არიან ბოლომდე დაიხარჯონ თავიანთი პილოტისთვის.
იმის გამო, რომ ფორმულა 1-ში შტატიანი ფსიქოლოგები არ არიან, ხოლო ოჯახები ყოველთვის არ ესწრებიან ეტაპებს, სპორტსმენის ცხოვრებაში მნიშვნელოვან როლს თამაშობს ფიზიოთერაპევტი. ფინელი ტომი პიარმიაკოსკი სებასთვის - მხოლოდ დამხმარე არ არის სარბოლო უქმეების დროს - ის მეგობარიცაა. გასაკვირი არაა, რომ ასეთი ურთიერთობების გამო ფეტელი ეტაპების დროს თავს ისე გრძნობს, როგორც საკუთარ სახლში.
საბურავებთან მუშაობა
წელს ფეტელის წარმატებული გამოსვლების ერთ-ერთი ძირითადი ტექნიკური მიზეზი “პირელის” საბურავებთან ბრწყინვალე მუშაობაა. ზუსტად ცნობილი არ არის, რა საიდუმლობები გამოსტყუა ფეტელმა იტალიური კომპანიის ინჟინრებს ზამთარში მათ ფაბრიკაში ვიზიტის დროს, მაგრამ ის ფაქტი, რომ გერმანელი ერთადერთი პილოტია, ვინც “პირელის” ესტუმრა, ეს ჩემპიონატის სტარტის წინ მის სამუშაო განწყობაზე მეტყველებს.
2011 წელს სებასტიანის სათუთი მოპყრობა საბურავებისადმი ნამდვილ აღმოჩენად იქცა იმ ექსპერტებისთვის, რომლებსაც ფეტელი ამ საკითხში ნაკლებად გათვითცნობიერებული და კომპეტენტური ეგონათ. ამ დროს კი მისი თანაგუნდელი მარკ უებერი სეზონის დასაწყისში ძალიან გაწვალდა უკანა საბურავების ცვეთის გამო და ვერაფრით მოარგო თავისი სარბოლო სტილი ახალ ტექნიკურ პირობებს. ფეტელი კი სტაბილურად მაღალ შედეგებს აჩვენებდა და რბოლების დროს თითქმის არ ჩამოუვარდებოდა ამ საკითხებში აღიარებულ ოსტატს ჯენსონ ბატონს.
სიჩქარე
სებას კიდევ ერთ მიღწევად მიიჩნევა შესანიშნავი სისწრაფე. გერმანელს შეუძლია სწრაფად იაროს ცარიელი ან სავსე საწვავის ავზით, რბოლის ბოლოსა თუ დასაწყისში... ის არანორმალურად სწრაფია კვალიფიკაციის დროს. პრესა აღნიშნავს, რომ ფეტელს შეუძლია ყველაზე საჭირო მომენტში მანქანისგან მაქსიმუმი მიიღოს. ამის ნათელი მაგალითია საკვალიფიკაციო რბოლები - 14 ეტაპიდან 11-ში პოული სწორედ გერმანელმა პილოტმა მოიპოვა.
ტექნიკის საიმედოობა
ფეტელის სისწრაფე გასულ წლებშიც იგრძნობოდა, მაგრამ წლევანდელ სეზონამდე სებასტიანი დრო და დრო კარგავდა მოგებებს ტექნიკის კაპრიზების გამო: ხან ძრავა გამოდიოდა მწყობრიდან (ბაჰრეინი და კორეა), ხან მუხრუჭები ღალატობდა (ავსტრალია). 2011 წელს სიტუაცია კარდინალურად შეიცვალა: 14 სტარტიდან “რედ ბულის” ერთ-ერთი პილოტი მხოლოდ ერთხელ ვერ მივიდა ფინიშამდე - იტალიაში მარკ უებერს არ გაუმართლა.
ასე რომ, წელს ავსტრიული საჯინიბოს ბოლიდი ტანკივით საიმედოა.
ედრიან ნიუი
ლეგენდარული კონსტრუქტორი ედრიან ნიუი “რედ ბულისა” და სებასტიან ფეტელის საკეთილდღეოდ მუშაობს - სწორედ ეს არის მოქმედი ჩემპიონის წარმატებების მთავარი მიზეზი. ინგლისელმა კონსტრუქტორმა პიტერ პროდრომთან და რობ მარშალთან ერთად შექმნა ჯადოსნური მანქანის კონცეპცია, რომელიც ყოველწლიურად სულ უფრო უკეთესო და სწრაფი ხდება.
RB07 - ნიუის კარიერაში ერთ-ერთი საუკეთესო ბოლიდია, მაგრამ არ უნდა დავივიწყოთ ისიც, რომ ნებისმიერი მანქანის საჭესთან ადამიანი ზის, ხოლო წარმატების მისაღწევად მას მექანიკოსების, ინჟინრებისა და ტაქტიკოსების მთელი გუნდი ეხმარება. ასე რომ, წლევანდელ სეზონში სებასტიან ფეტელის დომინირება - ეს არის კონსტრუქტორების, პილოტისა და მთლიანად “რედ ბულის” გუნდის ბრწყინვალე მუშაობა.
ყოველდღიური სპორტული გაზეთი "ლელო"
