ფინელმა კიმი რაიკონენმა ფორმულა 1-ში დაბრუნების შემდეგ, პირველივე რბოლაში მოიპოვა ქულები. წარუმატებელი კვალიფიკაციის მიუხედავად (მე-17 პოზიცია სასტარტო ბილიკზე), მსოფლიოს 2007 წლის ჩემპიონმა რბოლა მეშვიდე ადგილზე დაასრულა...- თქვენ პირველი ეტაპის ერთ-ერთი გმირი აღმოჩნდით...
- დღეს მართლაც კარგად ჩაიარა ყველაფერმა. მეტის მიღწევაც შეიძლებოდა, მაგრამ წინა დღეს გარკვეული შეცდომები დავუშვი, დღეს კი უსაფრთხოების მანქანა არასასურველ დროს გამოვიდა ტრასაზე.
სტარტი კარგად ავიღე, მაგრამ ჩემს წინ მოსახვევში ინციდენტი მოხდა, რის გამოც ბევრმა დაკარგა პოზიცია - თითქმის გავაჩერე მანქანა და ბალახზე გადავედი, რათა ავარია ამეცილებინა
ყველა ამ ფაქტორის გათვალისწინებით გასაგები ხდება - უკეთესი შედეგის მიღწევა შესაძლებელია, მაგრამ უქმეებს იდეალურად არ ჩაუვლია. მთავარია, მანქანა იყო სწრაფი და მე მეშვიდე ადგილი დავიკავე - საკმაოდ კარგი შედეგია. ქულები მოვიპოვე და შაბათთან შედარებით, სერიოზულ პროგრესს მივაღწიე.
- რა იგრძენით ორწლიანი შესვენების შემდეგ ფორმულა 1-ში დაბრუნებისას? იოლი იყო ახალ მანქანასთან, "პირელის" საბურავებთან და KERS-ის სისტემასთან შეგუება?
- სიმართლე გითხრათ, დიდი განსხვავება არ მიგრძვნია იმასთან შედარებით, რაც ჩემი წასვლის დროს დავტოვე. წესები ოდნავ შეიცვალა, მაგრამ რბოლები იგივე დარჩა.
DRS-ის (მოძრავი უკანა ანტიფრთა) სისტემის რბოლაში გამოყენება იოლია, ვიდრე თავისუფალი პრაქტიკებისა და კვალიფიკაციის დროს, რადგან მისი გააქტიურება მხოლოდ გარკვეულ მონაკვეთებზეა შესაძლებელი, სხვა სესიებში კი პილოტები მას ყველაგან იყენებენ, ამან კი შეიძლება შეცდომა გამოიწვიოს იმ დროს, როცა ზედმეტად აგრესიულად უტევთ.
ვერ ვიტყვი, რომ ფორმულა 1-ის მანქანამ დიდი ცვლილება განიცადა. დიახ, 2009 წელთან შედარებით ის უფრო სხვანაირი გახდა, მაგრამ გუნდები ყოველ წელს ახალი მანქანებით იწყებენ. საბურავებთან დაკავშირებით პრობლემა ჯერ არ მქონია. შეიძლება ითქვას, ყველაფერმა უპრობლემოდ ჩაიარა.
- რბოლაში თქვენი შედეგისა და კვალიფიკაციაზე გროსჟანის მესამე ადგილის გათვალისწინებით, როგორ აფასებთ E20-ის პოტენციალს?
- როგორც ზამთრის ტესტებისას ვთქვი და მელბურნშიც გავიმეორე, მანქანა შესანიშნავად გამოიყურება. რბოლის დროს ბევრი დავკარგე ტრაფიკში და ვერ შევძელი ბოლიდის პოტენციალის რეალიზება. ვინ იცის, რა შედეგი მექნებოდა უკეთეს სასტარტო პოზიციაზე რომ ვყოფილიყავი, მაგრამ უნდა გავიმეორო, რომ მანქანა ძალიან სწრაფია. არ უნდა დავუშვა ის პრობლემები, რომელმაც საკვალიფიკაციო რბოლაში შემიშალა ხელი.
-პირველი ეტაპი უკან დარჩა, წინ არის მზადება მალაიზიის გრანპრისთვის...
- მოხარული ვარ, რომ ეს უქმეები უკან დარჩა, მალაიზიაში კი უფრო მეტის მიღწევას ვეცდებით. ჯერჯერობით არ ვიცით, როგორ მოიქცევა მანქანა სეპანგში, მაგრამ დღემდე ის სხვადასხვა ტრასაზე იყო ეფექტური და იმედია, ასე იქნება მალაიზიაშიც. წინ ცხელი და ნესტიანი ამინდი გველის. ეს ერთგვარი გამოწვევაა, მაგრამ მე იმედი მაქვს, რომ კვალიფიკაციას შეცდომების გარეშე გავივლი და პოდიუმისთვის ბრძოლის შანსი მექნება.
ყოველდღიური სპორტული გაზეთი "ლელო"
