"ფერარიმ" კონტრაქტი გააფორმა "რედ ბულის" პილოტ სებასტიან ფეტელთან, - იტყობინება BBC იტალიურ გუნდში საკუთარ წყაროზე დაყრდნობით. ხელშეკრულება 2014 წლიდან შევა ძალაში. ასე რომ, გერმანელი პილოტი "ფერარიში" ბრაზილიელ ფელიპე მასას შეცვლის, რომლისთვისაც შემდეგი სეზონი ბოლო იქნება იტალიური საჯინიბოს რიგებში. გარდა ამისა, იტყობინებიან, რომ ფეტელის კონტრაქტის ძალაში შესვლა იმაზე იქნება დამოკიდებული, თუ როგორ გამოვა "ფერარი" მომავალ სეზონში.
სებასტიანის "ფერარიში" გადასვლის ინიციატორი ფერნანდო ალონსო გახდა, რომელსაც კონტრაქტის მიხედვით აქვს ხმის უფლება პარტნიორის არჩევის დროს. უფრო ადრე ესპანელმა ვეტო დაადო "სკუდერიაში" ლუის ჰემილტონის გადასვლას.
* * *
ამასობაში გერმანელ ნიკო ჰიულკენბერგის ადგილზე "ფორს ინდიაში" სამი პილოტი აცხადებს პრეტენზიას, რომლებსაც ფორმულა 1-ში გამოსვლის გამოცდილება აქვთ. როგორც იცით, ჰიულკენბერგს უწინასწარმეტყველებენ "ზაუბერში" სერხიო პერესის ადგილს, ხოლო "ფორს ინდიაში" გამონთავისუფლებულ ვაკანტურ ადგილზე პრეტენზიას აცხადებენ - ადრიან სუტილი, ხაიმე ალგერსუარი ან სებასტიან ბუემი.
* * *
ფრანგი პილოტი რომენ გროსჟანი 2013 წელსაც გააგრძელებს გამოსვლას "ლოტუსში". ამის შესახებ საჯინიბოს შეფმა ერიკ ბულიემ გამოაცხადა.
"გვინდა დავამშვიდოთ რომენი მისი მომავლის გამო, - მოჰყავს BBC-ს ბულიეს სიტყვები. - ის გააგრძელებს გამოსვლას ჩვენს გუნდში, თუმცა ოფიციალური განცხადების გაკეთება ჯერ ნაადრევია. ჩვენ ყველაფერი მზად გვაქვს - კონტრაქტი, მხარეების თანხმობა... მხოლოდ ხელმოწერები აკლია".
ყოველდღიური სპორტული გაზეთი "ლელო"
