საინტერესო სტატისტიკა ინდოეთის გრანპრის შემდეგ

ინდოეთის გრანპრის შემდეგ ცნობილმა ენციკლოპედიურმა ბაზამ - Forix-მა გამოაქვეყნა რამდენიმე საგულისხმო სტატისტიკური მონაცემი...

კვალიფიკაცია
- ინდოეთში პოული 35-ე აღმოჩნდა სებასტიან ფეტელის კარიერაში, 45-ე "რედ ბულის" ისტორიაში და 115-ე გერმანელი პილოტებისთვის. სებასტიანმა 48-ედ აიღო სტარტი პირველი რიგიდან და გაუთანაბრდა ამ მაჩვენებლით ჯიმ კლარკსა და ხუან-მანუელ ფანხიოს, რომლებიც მეხუთე ადგილს იყოფენ საერთო რეიტინგში.

- ფეტელმა და მარკ უებერმა მეთვრამეტედ აიღეს სტარტი პირველი რიგიდან - ამდენივე ჰქონდათ "მაკლარენის" პილოტებს - მიკა ჰაკინენსა და დევიდ კულტჰარდს გასულ ათწლეულში.

რბოლა
- პირველად კარიერაში, ერთ სეზონში ოთხი რბოლის მოგებით, სებასტიან ფეტელმა 13 ქულამდე გაზარდა უპირატესობა საერთო ჩათვლაში ფერნანდო ალონსოსთან. სებასტიანს ერთხელ აქვს ზედიზედ ოთხი რბოლა მოგებული, მაგრამ სხვადასხვა სეზონში - 2010 წლის ბრაზილიიდან 2011 წლის მალაიზიამდე.

- ფეტელის მოგება 150-ე იყო "რენოს" ძრავებიანი მანქანებით და 130-ე გერმანელი მრბოლელებისთვის.

- ინდოეთში მეორე ადგილზე გასვლით, ფერნანდო ალონსომ გააგრძელა სერია, რომელშიც ის პირველ ან მეორე ადგილზე მიდიოდა ფინიშთან ყველა ტრასაზე, რომელზეც კი სტარტზე გასულა. გარდა ამისა, ესპანელს ყველა ტრასაზე აქვს გავლილი მთელი დისტანცია.

- ალონსო - ერთადერთი იყო ინდოეთის გრანპრიზე პირველ შვიდ ადგილზე მისულ პილოტებს შორის, რომელმაც რბოლის მსვლელობისას გაიუმჯობესა პოზიცია - სტარტი მეხუთემ აიღო და მეორე ადგილზე გავიდა.

- ინდოეთის გრანპრი 140-ე იყო ალონსოს კარიერაში, რომელშიც მან ქულები დააგროვა - ამდენივე შედეგიანი ეტაპი ჰქონდა რუბენს ბარიკელოს. ამ რეიტინგში ლიდერობს მიხაელ შუმახერი - გერმანელს 220 შედეგიანი გრანპრი აქვს.

- მარკ უებერმა დაკარგა მეორე ადგილი KERS-ის სისტემის მწყობრიდან გამოსვლის გამო, მაგრამ შეძლო ფინიშამდე მისვლა, რითაც გაიმეორა მიხაელ შუმახერის სარეკორდო სერია - ზედიზედ 58 რბოლა მექანიკური პრობლემის გარეშე.

- უებერი შარშანდელი სეზონის შემდეგ პირველად ავიდა ზედიზედ ორ რბოლაში პოდიუმზე. კარიერაში პოდიუმების რაოდენობით (34) ის გაუთანაბრდა ფელიპე მასას და მასთან 23-ე ადგილს იყოფს საერთო რეიტინგში.

- "მაკლარენმა" გაიმეორა "ფერარის" სარეკორდო სერია (მალაიზია 1999 - მალაიზია 2003) - ზედიზედ 55 შედეგიანი რბოლა. უნდა აღინიშნოს, რომ "ფერარის" სერია მაშინ დაფიქსირდა, როცა ქულებს ფინიშზე ექვსი ან რვა პილოტი იღებდა და არა ათი, როგორც დღეს არის.

- პირველად კარიერაში მიხაელ შუმახერმა ვერ შეძლო ზედიზედ ოთხ რბოლაში ქულის მოპოვება.

ყოველდღიური სპორტული გაზეთი "ლელო"