არა გინებას!ფორმულა 1-ის პილოტებმა გაფრთხილება მიიღეს - ავტომრბოლებმა თავი უნდა შეიკავონ პირდაპირ ეთერში არანორმატული ლექსიკისგან, - იტყობინება გაზეთი The Sun.
საერთაშორისო საავტომობილო ფედერაციამ ოფიციალური წერილით მიმართა ყველა გუნდს, რომელიც ფორმულა 1-ის მსოფლიოს ჩემპიონატში იღებს მონაწილეობას.
ამ პრობლემის წინააღმდეგ ბრძოლის მიზეზი გახდა აბუ დაბის რბოლის შემდეგ გამართული პრესკონფერენცია. BBC-ის კომენტატორი დევიდ კულტჰარდი ინტერვიუს იღებდა კიმი რაიკონენისგან და სებასტიან ფეტელისგან. ფინელმა და გერმანელმა უწმაწური სიტყვები იხმარეს, რის გამოც ფედერაციამ ისინი გააფრთხილა და აღნიშნა, რომ მომავალში, ასეთი ქმედებისთვის პილოტებს ფულადი ჯარიმე დაეკისრებათ.
როგორც იტყობინებიან, ბრიტანული პუბლიკა შოკირებული დარჩა მოსმენილით. BBC-ის მისამართით უამრავი საპროტესტო წერილი გაიგზავნა. ამიერიდან, პლანეტის საუკეთესო პილოტები ჯერ დაფიქრდებიან და შემდეგ იტყვიან სათქმელს.
აბუ დაბის პოდიუმზე ფეტელმა განაცხადა, რომ მისმა გუნდმა "არ ჩაისვარა" (We didn't fuck it up), რაიკონენმა კი განსაკუთრებით ჯიუტი კონკურენტების მიმართ გამოიყენა სიტყვა - "განავალი" (Gave me shit).
ფერარი: და მაინც ჰიულკენბერგი?
გერმანული პრესის ცნობით, ნიკო ჰიულკენბერგი "ფერარიში" ფელიპე მასას შეცვლის - ეს 2013 წლის ბოლოს მოხდება, როცა ვადა ამოეწურება ბრაზილიელი პილოტის კონტრაქტს.
ჭორები ნიკოსა და "ფერარის" შორის მოლაპარაკებების შესახებ წლევანდელ ზაფხულს დაიწყო, მაგრამ, საბოლოოდ, 25 წლის გერმანელი "ზაუბერში" გადავიდა კარიერის გასაგრძელებლად. თუმცა ცნობილია ამ საჯინიბოს კავშირები "სკუდერიასთან" და აქ ლაპარაკი არ არის მხოლოდ ძრავების მიწოდებაზე. სხვათა შორის, იგივე მასა თავის დროზე "ფერარიში" "ზაუბერიდან" გადავიდა.
ჰიულკენბერგის ამჟამინდელი კონტრაქტი მხოლოდ ერთ წელზეა გათვლილი, მაგრამ უფრო შორეულ მომავალზე პილოტი ჯერ არ ლაპარაკობს: "ვერაფერს გეტყვით იმის შესახებ, სად აღმოვჩნდები 2014 წელს. ფორმულა 1-ში ყველაფერი ძალიან სწრაფად იცვლება", - განაცხადა ჰიულკენბერგმა "ბილდისთვის" მიცემულ ინტერვიუში.
დღეისთვის ფელიპე მასას თითქმის არ შეუძლია თანაგუნდელ ფერნანდო ალონსოსთვის კონკურენციის გაწევა. სეზონის მეორე ნაწილში ჩატარებული რამდენიმე კარგი რბოლის მიუხედავად, ფელიპემ წელს მხოლოდ ერთხელ მოუგო კვალიფიკაცია ესპანელს. გარდა ამისა, ბრაზილიელის ერთადერთი პოდიუმი ძალიან დაბალი შედეგია ალონსოს ტიტულისთვის ბრძოლის ფონზე.
"ჩემი შორსმიმავალი გეგმები პოდიუმებს, გამარჯვებებსა და საჩემპიონო ტიტულს უკავშირდება, - განაცხადა ჰიულკენბერგმა. - რომელ გუნდთან? ეს ყველაფერი ვარსკვლავებმა გადაწყვიტონ, მე მხოლოდ კარგი ადგილის მოპოვებისთვის ვიბრძვი".
შუმის საჩუქრით გააცილებენ
ბრაზილიის გრანპრის ორგანიზატორები სიურპრიზს უმზადებენ "მერსედესის" პილოტ მიხაელ შუმახერს. ლეგენდარული გერმანელისთვის სან პაულუს რბოლა უკანასკნელი იქნება კარიერაში.
ბრაზილიურ მხარეს მკაცრად აქვს გასაიდუმლოებული ინფორმაცია იმის შესახებ, თუ რა საჩუქარს უმზადებენ მსოფლიოს შვიდგზის ჩემპიონს. 2006 წელს, როცა შუმახერი პირველად წავიდა ფორმულა 1-დან, ორგანიზატორებმა ზეიმი მოაწყვეს, რომლის სტუმარი აღმოჩნდა ფეხბურთის მეფე - პელე.
ბრაზილიის გრანპრი 25 ნოემბერს გაიმართება.
ყოველდღიური სპორტული გაზეთი "ლელო"
