ბრიტანულმა ჟურნალმა "ავტოსპორტმა" შეაჯამა წინასასეზონო ტესტების მეორე სერია და ძალიან საინტერესო დასკვნებიც გამოიტანა.რა თქმა უნდა, პირველ რიგში, საინტერესოა ამ ეტაპისთვის საჯინიბოებს შორის ძალების შეფარდება. ისეთი შთაბეჭდილება იქმნება, რომ "რედ ბულის" მანქანა კვლავაც ძალიან სწრაფია, მაგრამ "ფერარიმაც" კარგი ფორმა აჩვენა, ვიდრე ერთი წლის წინ. "ლოტუსის" პილოტებიც, სავარაუდოდ, პოდიუმზე ავიდოდნენ, რბოლები ახლა რომ ტარდებოდეს.
ჩემპიონატის წინ ბევრი იმედით ლაპარაკობს სეზონის შესახებ გეგმებზე, მაგრამ ყოველ გრანპრიში მხოლოდ ერთი პილოტი აიღებს პოულს, ერთი მივა პირველი ფინიშთან და სამი ავა პოდიუმზე. სხვა საქმეა, რომ
ალონსო სიმშვიდეს ინარჩუნებს
ფერნანდო ალონსოს ჩვევად არ აქვს თავისი გრძნობების გამოხატვა. ის ყოველთვის თავდაჭერილია და დამაჯერებლად აკონტროლებს თავის ემოციებს. მიუხედავად ამისა, ესპანელი საკმაოდ იმედგაცრუებული ჩანდა იმ დროს, როცა გასულ სამშაბათს ჟურნალისტებს ელაპარაკებოდა. ის უკმაყოფილო არ ყოფილა, მაგრამ არც ბედნიერი იყო. როგორც ჩანს, ალონსოს მეტის იმედი ჰქონდა, მაგრამ უცებ მიხვდა, რომ 2013 წელს ტიტულისთვის ბრძოლა ისევ ძალიან რთული იქნება.
ახალი "ფერარის" კონკურენტუნარიანობაზე ჯერ რთულია ლაპარაკი. მესამე დღეს Soft-ის საბურავებით ალონსო ისეთივე ტემპს აჩვენებდა, როგორსაც სერხიო პერესი თავისი "მაკლარენით". "ფერარი", სავარაუდოდ" იქნება ლიდერებს შორის, მაგრამ ისეთი შეგრძნება არსებობს, რომ მანქანა ჯერ ჩამორჩება ეფექტურობით "რედ ბულს" და შესაძლოა, "ლოტუსსაც". თუმცა სკუდერიაში თავად აღიარებენ, რომ სეზონის დაწყებამდე ჯერ ბევრი აქვთ გასაკეთებელი.
მაკლარენი ჯერ სწავლობს
"მაკლარენის" ახალ მანქანაში ბევრი საინტერესო გადაწყვეტილებაა რეალიზებული, გუნდმა კარდინალურად შეცვალა უკანა ნაწილის კონფიგურაცია და სხვა კვანძები. ამიტომაც ბრიტანელებმა ძალიან ბევრი რამ უნდა შეისწავლონ დროის ძალიან მცირე მონაკვეთში.
მანქანა ძალიან სწრაფი გამოვიდა, მაგრამ ხანდახან ის სერიოზულად კარგავს სისწრაფეს. და "მაკლარენში" ჯერ არ იციან, რატომ ხდება ასე.
"რთული გასაგებია, რა ემართება მანქანას - ხანდახან ის ძალიან კარგად გამოიყურება, ზოგჯერ – არა. ახლა, მნიშვნელოვანია მიზეზების გარკვევა და სტაბილურობის მიღწევა", - ამბობს ჯენსონ ბატონი.
თუ მელბურნის ფავორიტებზე ვილაპარაკებთ, ამ ეტაპისთვის "მაკლარენი", ალბათ, მესამე ან მეოთხე ადგილზე უნდა დავაყენოთ. გუნდმა გაბედა სერიოზული ცვლილებები, რადგან შარშანდელმა პროექტმა – MP4-27-მა თავის მაქსიმუმს მიაღწია და მისგან მეტის მიღება ძალიან რთული იყო. ვნახოთ, რამდენად გაამართლებს ასეთი გადაწყვეტილება.
საბურავების ცვეთა
ისევე, როგორც ხერესში, ბარსელონაშიც პილოტები წუწუნებდნენ რამდენიმე წრის შემდეგ საბურავის ეფექტურობის ვარდნის გამო. ძირითადად, ეს განპირობებული იყო ცივი ამინდით, მაგრამ ეჭვგარეშეა, რომ ახალი საბურავების რესურსი მართლაც უფრო დაბალია, ვიდრე შარშანდელისა იყო.
ნაწილობრივ, სწორედ ამიტომაც გუნდები აქტიურად მუშაობდნენ პიტ-სტოპებზე – "რედ ბულმა" ამას ნახევარი დღე მიუძღვნა, "უილიამსმა" - მთელი დღე. სეზონის დასაწყისში, როცა რბოლებში სამი-ოთხი პიტსტოპი იქნება, საბურავების შეცვლისას მექანიკოსების მუშაობის სისწრაფე შეიძლება გადამწყვეტი ფაქტორი გახდეს.
"ერთი პიტსტოპის შემთხვევაში შედეგი იოლად პროგნოზირებადია, მაგრამ თუ ხუთი გაჩერება იქნება, პელოტონში ბევრი რამ აირევა. ვფიქრობ, სწრაფი პილოტები მაინც კონკურენტუნარიანები იქნებიან რბოლების ფინიშზე, მაგრამ იმედია, ჩვენ არ ვიხილავთ ხუთ პიტსტოპს, რადგან ეს უკვე ფორმულა 1 აღარ იქნება", - ამბობს "რედ ბულის" პილოტი მარკ უებერი.
* * *
ასევე, ჩვენ ერთ ცხრილში მოვაქციეთ ბარსელონას ტესტების ოთხივე დღის შედეგები, რითაც კარგად იქნება შესაძლებელი პილოტთა შედეგების შედარება:
1. პერესი (მაკლარენი) 1:21.848
2. ალონსო (ფერარი) +0.027
3. ჰიულკენბერგი (ზაუბერი) +0.312
4. გროსჟანი (ლოტუსი) +0.340
5. ფეტელი (რედ ბული) +0.349
6. როსბერგი (მერსედესი) +0.763
7. რაიკონენი (ლოტუსი) +0.775
8. მალდონადო (უილიამსი) +0.827
9. ჰემილტონი (მაკლარენი) +0.878
10. ბოტასი (უილიამსი) +0.978
11. ბატონი (მაკლარენი) +0.992
12. სუტილი (ფორს ინდია) +1.029
13. უებერი (რედ ბული) +1.176
14. ვერნი (ტორო როსი) +1.518
15. რიკარდო (ტორო როსო) +1.870
16. დი რესტა (ფორს ინდია) +2.123
17. ჩილტონი (მარუსია) +3.267
18. გუტიერესი (ზაუბერი) +3.276
19. ბიანკი (ფორს ინდია) +3.884
20. ვან დერ გარდე (კატერჰემი) +4.329
21. პიკი (კატერჰემი) +4.395
22. მასა (ფერარი) +5.715
