საბერძნეთის წყალბურთელთა ეროვნული გუნდი მსოფლიოს ჩემპიონატის ბრინჯაოს პრიზიორი, ათენის ოლიმპიადის მეოთხეადგილოსანი და მრავალი საერთაშორისო ტურნირის გამარჯვებულია. ეს ქვეყანა
როგორც ალექსანდრე ბითაძემ გვითხრა, საქართველოს წყალბურთის მესვეურებს მოლაპარაკება აქვთ სხვადახვა ქვეყნების კოლეგებთან და არ არის გამორიცხული, 30 მარტამდე თბილისში საქართველოს, საფრანგეთის, მაკედონიისა და, შესაძლოა, თურქეთის მონაწილეობით ამხანაგური საერთაშორისო ტურნირიც გაიმართოს. ევროპის ჩემპიონატის მატჩების წინ ამ გუნდებისთვის ეს შეჯიბრება ერთგვარი მოთელვა იქნება. 30 მარტს ფრანგებს მოსკოვში, მაკედონიელებს კი მინსკში უწევთ თამაში.
- მარტის დასაწყისში საქართველოს ჩემპიონატი აიღებს სტარტს, - ამბობს ბატონი ალექსანდრე. - მასში 5 გუნდი ჩაებმება. სასიამოვნოა, რომ მოასპარეზეთა შორის ბათუმელებსაც ვიხილავთ. როგორც ხედავთ, ეროვნული პირველობის გეოგრაფია იზრდება.
აჭარაში სერიოზულად ზრუნავენ სპორტის ამ სახეობის აღორძინება-განვითარებაზე და კარგი იქნება, თუ ეს სხვა რეგიონებისთვის მაგალითი გახდება. წინა წლებისგან განსხვავებით, საქართველოს ჩემპიონატი რამდენიმე ტურად გაიმართება, რაც შემთხვევითობას გამორიცხავს და სპორტსმენთა ოსტატობის ამაღლებასაც შეუწყობს ხელს.
ოთხ-ოთხი ტური გათამაშდება 1995-1996 და 1997-1998 წლებში დაბადებულ წყალბურთელთა საქართველოს პირველობებშიც. სავარაუდოდ, მედლებისთვის 10-10 გუნდი იასპარეზებს, შარშანდელი რვა ექვსის ნაცვლად. საპრიზო ადგილებისთვის ქუთაისელი და ბათუმელი წყალბურთელებიც იბრძოლებენ. 4-6 თებერვალს "ოლიმპიკში" 15-16-წლიანები ითამაშებენ, 11-13 თებერვალს კი აუზი უმცროსებს - 1997-1998 წლებში დაბადებულებს დაეთმობათ. არ არის გამორიცხული, თითო ტურს რეგიონებმაც უმასპინძლონ.
შარშან ზაფხულს საქართველოს კადეტთა ნაკრები სერბეთში იმყოფებოდა საწვრთნელ შეკრებაზე და მასპინძლებთან ოთხი ტესტ-მატჩიც გამართა. ყველა შეხვედრა წააგო.
სამაგიეროდ, გვიან შემოდგომით სტუმრობისას ქართველმა მოზარდებმა სამი შეხვედრა მოუგეს სერბ თანატოლებს. სწორედ ამან უბიძგა სერბეთის წყალბურთის მესვეურებს, თავიანთი ქვეყნის კადეტთა (1995-1996 წლებში დაბადებულნი) პირველობაში 24-ე გუნდად საქართველოს ნაკრები დაეშვათ. ეს იქაური წყალბურთის ისტორიაში უპრეცედენტო შემთხვევა იქნება. ჩვენი ბიჭები იოვან პოპოვიჩის ხელმძღვანელობით ნოვი სადში ამ თვის 14 რიცხვში გაემგზავრებიან და 16-20 თებერვალს ერთ-ერთ ჯგუფში წრიული სისტემით 5 მატჩს გამართავენ. 4-6 მარტს კი თბილისში მოგველის საინტერესო ტურნირი: "ოლიმპიკი" ლენ-ის (ევროპის საწყლოსნო სახეობათა ფედერაცია) კალენდრით გათვალისწინებულ 15-16 წლის წყალბურთელთა ასპარეზობას - სახელოვანი სპორტსმენის, ოლიმპიური თამაშებისა და ევროპის ჩემპიონატის ბრინჯაოს მედალოსნის, ახალგაზრდობის საერთაშორისო მეგობრული სპორტული თამაშების გამარჯვებულისა და მსოფლიო უნივერსიადის, ასევე, საკავშირო ჩემპიონატების პრიზიორის ნოდარ გვახარიას პირველ საერთაშორისო მემორიალს უმასპინძლებს. ერთმანეთს საქართველოს, ბელარუსის, უკრაინისა და ეგვიპტის (თუ იქ სიტუაცია დალაგდა) სპორტსმენები დაუპირისპირდებიან.
ასე რომ, თებერვალ-მარტში ქართულ წყალბურთში დიდი გამოცოცხლება იქნება და ქომაგებს საინტერესო პაექრობები ელით.
.
