ანა ტატიშვილი ტორონტოს ტურნირის ძირითად ბადეში მოხვდა

ტორონტოში (კანადა) დაიწყო ჩოგბურთელ ქალთა საერთაშორისო ტურნირი (საპრიზო ფონდი 2.369.000 დოლარი), რომლის საკვალიფიკაციო ბადეში ორი ჩვენებური ჩაება.

ოქსანა კალაშნიკოვამ (რეიტინგით 298-ე) სტარტზე პირველი ასეულის მოთამაშე სილვია სოლერ-ესპინოსას (ესპანეთი, 71-ე) სამ სეტში სძლია: პირველი ხელის 1:6 წაგების შემდეგ ოქსანამ ზედიზედ ორი მოიგო - 6:4, 7:5.

მეორე წრეში მსოფლიო რეიტინგით 77-ე საფეხურზე მყოფ იანა ჩეპელოვას (სლოვაკეთი) დაუპირისპირდა. ამ უკანასკნელმა სტარტზე მასპინძელ ჰეიდ ელ ტაბახს აჯობა - 6:2, 2:6, 6:2.

თბილისელმა ჩოგბურთელმა პირველ სეტში მეტოქეს 6:3 სძლია, მეორე კი, ფაქტობრივად, უბრძოლველად დათმო - 0:6 (!). მესამე გადამწყვეტი ხელი დაძაბულად წარიმართა. გაიმარჯვა ჩეპელოვამ 7:6. კალაშნიკოვა მხოლოდ წყვილებს შემორჩა: პოლონელ ალისია როსოლსკასთან ერთად სტარტზე ეუჟენ ბუშარისა (კანადა) და კირსტენ ფლიპკენსის (ბელგია) დუეტს გაეჯიბრება.

კვალიფიკაციის სტარტზე ანა ტატიშვილს (კლასიფიკაციაში 94-ე) სუსტი მეტოქე ერგო - კანადელი გლორია ლიანგი (955-ე), რომელიც იოლად დაჯაბნა - 6:1, 6:2.

მეორე წრეში კოლუმბიელ კატალინა კასტანოს მძლეველ (6:3, 6:4) იოანა ლარსონს (შვედეთი) დაუპირისპირდა. WTA-ს კლასიფიკაციაში 69-ე ადგილზე მყოფ ჩოგბურთელს ჩვენებურმა პირველ სეტში მშრალი ანგარიშით - 6:0 აჯობა, მეორეში კი ანამ 6:2 გაიმარჯვა და ძირითად ბადეში მოხვდა.

ყოველდღიური სპორტული გაზეთი "ლელო"