ქართველი ჩოგბურთელები 16 ოქტომბერს უცხოეთის ხუთ საერთაშორისო ტურნირში ცდიდნენ ძალებს. როკ ჰილის (აშშ) ქალთა ტურნირის (საპრიზო ფონდი 25.000 დოლარი) პირველ წრეში ასპარეზობის მე-5 ნომერმა ანა ტატიშვილმა იოლად აჯობა ალექსანდრა მიულერს (აშშ) - 6:1, 6:1 და მეორეში ადრიანა პერესთან (ვენესუელა) გაარკვევს ურთიერთობას. ამ უკანასკნელმა 16 ოქტომბერს ბულგარელ ელიტსა კოსტოვას მოუგო - 6:0, 6:4.
* * *
იაპონიის ქალაქ მაკინოჰარას 25.000-იან შეჯიბრებაში ჩაება სოფიო შაფათავა, რომელიც მესამე ნომერია.
სტარტზე მან მასპინძელი ემი მუტაგუჩი დაამარცხა - 6:3, 6:1 და მეორე წრეში გავიდა, სადაც
წყვილებში თბილისელი სპორტსმენი შვეიცარიელ ბელინდა ბენჩიჩთან არის შეამხანაგებული და პირველ წრეში მასპინძლებს - იუკა მორისა და კაორი ონიშის დააყრევინა ფარ-ხმალი - 2:6, 6:0, 10:6. მეოთხედფინალში რეიტინგფავორიტებს - მიკი მიიამურასა და აკიკო ომაეს გაუწევს მეტოქეობას.
* * *
ეკატერინე გორგოძე ანტალიაში (თურქეთი, 10.000 დოლარი) ასპარეზობს. როგორც გაუწყეთ, მან ერთეულებში პირველი ბარიერი დაძლია.
მსგავს წარმატებას წყვილებშიც მიაღწია, მაგრამ 16 ოქტომბერს, მეოთხედფინალში მოლდოველ ანასტასია ვდოვენკოსთან ერთად მე-2 ნომრად განთესილი სვიატლანა პირაჟენკას (ბელორუსი) და იულია ვაჩაჟუკის (გერმანია) დუეტთან დამარცხდა - 4:6, 0:6.
* * *
მოსკოვში, კრემლის თასზე (საპრიზო ფონდი 795.707 დოლარი) პაექრობაში თბილისელი ოქსანა კალაშნიკოვა ტრადიციულ მეწყვილე ირინა ბურიაჩოკთან (უკრაინა) ერთად ჩაება. სტარტზე მე-4 ნომრად განთესილ ლიზი ჰუბერისა (აშშ) და ალისია როსოლსკას (პოლონეთი) დუეტს ორ სეტში დანებდა - 2:6, 6:7.
* * *
ალექსანდრე მეტრეველმა ასპარეზობა დაასრულა ჩიმკენტში (ყაზახეთი) ჩოგბურთელ ვაჟთა 10.000-იან ტურნირში. ჩვენებური 16 ოქტომბერს მე-2 წრეში უზბეკ ტიმურ ისმაილოვთან ვერაფერს გახდა - 2:6, 6:4, 4:6.
ყოველდღიური სპორტული გაზეთი "ლელო"
