ATP. წლის შემაჯამებელი: როჯერი თითქმის ნახევარფინალში

წლის შემაჯამებელ ტურნირზე გუშინ მეორე ტურის მატჩები იმართებოდა B ჯგუფში. პირველ შეხვედრაში ერთმანეთს შეხვდნენ ჩოგბურთელები, რომლებსაც მოგებული ჰქონდათ პირველი ტურის მატჩები - როჯერ ფედერერი და კეი ნიშიკორი.

ორივემ ორ სეტში დაამარცხა თავისი მოწინააღმდეგე, შესაბამისად, მილოშ რაონიჩი და ენდი მარეი. შესაბამისად, ამ მატჩში გამარჯვებული თითქმის ინაღდებდა ნახევარფინალის საგზურს.

საინტერესოა, რომ ფედერერს ყოველთვის უჭირდა იაპონელთან თამაში. ისინი მეხუთედ ხვდებოდნენ ერთმანეთს და ანგარიში თანაბარი იყო - 2:2.

თუმცა გუშინ კორტზე დიდი ბრძოლა არ ყოფილა. ფედერერს საათი და ცხრა წუთი გასჭირდა ჯგუფში მეორე თამაშის მოსაგებად. პირველ სეტში, რომელიც 35 წუთი გაგრძელდა, ფედერერმა მესამე გეიმში გააკეთა ბრეიკი, მეორე პარტიაში კი მესამე და მეშვიდე გეიმებში აიღო მეტოქის მოწოდება. ნიშიკორის მთელი მატჩის განმავლობაში მხოლოდ სამი ბრეიკ-პოინტი ჰქონდა, მაგრამ ვერც ერთი შანსი ვერ გამოიყენა.

გვიან ღამით იმართებოდა შეხვედრა მილოშ რაონიჩსა და ენდი მარეის შორის. თუ ამ წყვილში კანადელი შეძლებდა ბრიტანელის დამარცხებას, როჯერი ვადაზე ადრე ხვდებოდა ნახევარფინალში. ის ასევე მოხვდებოდა ოთხ საუკეთესოს შორის, თუ მარეი სამ სეტში მოუგებდა რაონიჩს. ეს მე-12 ნახევარფინალი იქნება ფედერერისთვის წლის შემაჯამებელ ტურნირზე, რითაც ის გაუთანაბრდება რეკორდსმენ ივან ლენდლს.

ბოლოს ისიც აღვნიშნოთ, რომ გუშინ ფედერერმა სეზონში 70-ე მატჩი მოიგო. წელს შვეიცარიელს ხუთი ტურნირი აქვს მოგებული.

ყოველდღიური სპორტული გაზეთი "ლელო"