წლის შემაჯამებელი ტურნირი ციფრებში

ახალი მნიშვნელოვანი მიღწევები ნოვაკ ჯოკოვიჩისა და როჯერ ფედერერის კარიერაში, კეი ნიშიკორის უჩვეულო რეკორდი და სხვა საინტერესო ციფრები წლის შემაჯამებელი ტურნირიდან...

1 - მხოლოდ ერთი გეიმი აიღო ენდი მარეიმ როჯერ ფედერერთან მატჩში. ასე რომ, ბრიტანელმა ყველაზე დიდი ანგარიშით წააგო შვეიცარიელთან. მანამდე ჩოგბურთელები 22-ჯერ შეხვდნენ ერთმანეთს.

1 - კეი ნიშიკორი გახდა პირველი აზიელი ჩოგბურთელი, ვინც წლის შემაჯამებელ ტურნირზე ითამაშა.

2 - ჯგუფურ ეტაპზე ჩატარებული 12 მატჩიდან მხოლოდ ორი იყო სამსეტიანი.

2 - ორ მილიონ დოლარზე ოდნავ მეტი (2 075 000) და 1500 სარეიტინგო ქულა მოიპოვა ნოვაკ ჯოკოვიჩმა წლის შემაჯამებელ ტურნირზე გამარჯვებით.

3 - ნოვაკ ჯოკოვიჩმა ზედიზედ მესამედ მოიგო წლის შემაჯამებელი ტურნირი. როჯერ ფედერერმა აქ ექვსჯერ გაიმარჯვა, მაგრამ ზედიზედ სამჯერ არასოდეს ყოფილა პირველი. ასე რომ, ჯოკოვიჩმა გაიმეორა ივან ლენდლის შედეგი. წარმოშობით ჩეხოსლოვაკიელი ჩოგბურთელი წლის დასკვნით ტურნირზე 1985-87 წლებში დომინირებდა. აქ გამარჯვებების რაოდენობით ნოვაკი მხოლოდ ლენდლს, სამპრასსა და ფედერერს ჩამორჩება.

3 - სამი დებიუტანტი ვიხილეთ წლის შემაჯამებელ ტურნირზე. ზედიზედ მეორე წელია ახალბედამ ნახევარფინალამდე მიაღწია - სტენ ვავრინკას შედეგი გაიმეორა ნიშიკორიმ. საინტერესოა, რომ ბოლო წლის შემაჯამებელზე დებიუტანტის რანგში გაიმარჯვა ესპანელმა ალექს კორეჩამ - 1998 წელს.

7 - ჯოკოვიჩმა 2014 წელს ტიტულების რაოდენობით ყველას აჯობა. ხუთი ტიტული მოიგო ფედერერმა.

ტიტულები 2014 წელს:
ნოვაკ ჯოკოვიჩი - 7
როჯერ ფედერერი - 5
მარინ ჩილიჩი - 4
კეი ნიშიკორი - 4
რაფაელ ნადალი - 4
ენდი მარეი - 3
გრიგორ დიმიტროვი - 3
სტენ ვავრინკა - 3

9 - დიდი ხანი ხელშეუხებელი იყო ჯგუფურ სტადიაზე წაგებული გეიმების რაოდენობის რეკორდი. ჯონ მაკინროიმ 1978 წელს და მოგვიანებით ივან ლენდლმა 1989 წელს ნახევარფინალამდე მხოლოდ 14 გეიმი დათმეს. წელს ერთი დღით ახალი რეკორდსმენი გახდა როჯერ ფედერერი - 13 წაგებული გეიმი. მაგრამ მეორე დღეს მისი რეკორდი გააუმჯობესა ნოვაკ ჯოკოვიჩმა, რომელმაც სამ მატჩში მხოლოდ 9 გეიმი დათმო. სერბი კარიერაში პირველად გავიდა ჯგუფიდან სეტის წაუგებლად.

11 - ფედერერმა კარიერაში მეთერთმეტედ მიაღწია ფინალამდე.

11 - ზედიზედ მე-11 წელია საჩოგბურთო რეიტინგში სეზონს პირველი ჩოგანის რანგში ასრულებს ჯოკოვიჩის, ფედერერისა და რაფაელ ნადალის ტრიოდან ერთ-ერთი. ნოვაკმა კარიერაში მესამედ დაასრულა წელი კლასიფიკაციის სათავეში. რეკორდსმენი პიტ სამპრასია, რომელიც ექვსჯერ იყო წლის ბოლოს პირველი ჩოგანი.

13 - მეცამეტედ წლის შემაჯამებელი ტურნირის ნახევარფინალში, ერთმანეთს შეხვდნენ ერთი ქვეყნის წარმომადგენლები. პირველად მოხდა ეს შვეიცარიის შემთხვევაში. ადრე ათჯერ ითამაშეს ერთმანეთში ამერიკელებმა და თითოჯერ - ესპანელებმა და შვედებმა.

15 - ფედერერმა კარიერაში მეთხუთმეტედ დაამარცხა ვავრინკა. ურთიერთშეხვედრებში მათ შორის ანგარიშია - 15:2.

16 - ამდენი ტაი-ბრეიკი წააგო ტომაშ ბერდიხმა სეზონში და მოიგო მხოლოდ ცხრა. ეს ყველაზე უარესი შეფარდებაა პირველი ათეულის მოთამაშეებს შორის.

16 - მხოლოდ 16 გეიმი წააგო ნოვაკ ჯოკოვიჩმა მთელი ტურნირის განმავლობაში.

31 - ნოვაკ ჯოკოვიჩი ზედიზედ 31 მატჩია არ მარცხდება დარბაზის ტურნირებზე. მისი ბოლო მარცხი 2012 წლით თარიღდება. მაშინ სერბმა ამერიკელ სემ კუერისთან წააგო. სიგრძით ეს მესამე სერიაა ისტორიაში. საუკეთესო შედეგი აქვს ჯონ მაკინროის - ზედიზედ 59 მოგება.

35 - ანდრე აგასი ფედერერზე უფროსი ერთადერთი მოთამაშეა, რომელმაც წლის შემაჯამებელ ტურნირზე თამაშის უფლება მოიპოვა. 2005 წელს ანდრე 35 წლის ასაკში მოხვდა საუკეთესოებს შორის.

37 - ფედერერი და ჯოკოვიჩი 37-ჯერ უნდა შეხვედროდნენ ერთმანეთს. უფრო ხშირად ერთმანეთში ჯოკოვიჩსა და ნადალს უთამაშიათ - 42 შეხვედრა.

48 - ჯოკოვიჩის ანგარიშზე კარიერაში 48 ტიტული მოდის.

69 - კეი ნიშიკორის სამსეტიან მატჩებში მოგების გასაოცარი მაჩვენებელი აქვს. ის საუკეთესო ჩოგბურთელია ისტორიაში სამ პარტიაში მოგებული მატჩების პროცენტით - 69 მოგება და 19 წაგება.

72 - ფედერერმა დიდი უპირატესობით გაუსწრო კონკურენტებს სეზონში მოგებული მატჩების რაოდენობით. უახლოეს მდევარ ჯოკოვიჩს 11-ით ნაკლები აქვს - 61.

მოგებები 2014 წელს:
როჯერ ფედერერი - 72
ნოვაკ ჯოკოვიჩი - 61
ენდი მარეი - 59
ტომაშ ბერდიხი - 55
მარინ ჩილიჩი - 54
დავიდ ფერერი - 54
კეი ნიშიკორი - 54
გრიგორ დიმიტროვი - 50

103 - მაიკ და ბობ ბრაიანებმა 103-ე ერთობლივი ტიტული მოიგეს. წლის შემაჯამებელ ტურნირზე ამ უნიკალურმა დუეტმა მეათედ გაიმარჯვა.

250 - ენდი მარეიზე გამარჯვება 250-ე იყო როჯერისთვის გადახურულ კორტებზე.

ყოველდღიური სპორტული გაზეთი "ლელო"