ანტალიაში გრძელდება ჩოგბურთელ ქალთა საერთაშორისო ტურნირი (საპრიზო ფონდი 10.000 დოლარი). ერთეულთა თანრიგს ქართველთაგან მხოლოდ სოფიო ქვაცაბაია შემორჩა. სტარტზე ანასტასია ვდოვენკოს (მოლდოვა) ძლევის შემდეგ სლოვაკ რებეკა სრამკოვას აჯობა - 6:3, 6:4 და მეოთხედფინალში გავიდა, სადაც ბელგიელ ელინე ბოეიკენსს დაუპირისპირდება.
ამ უკანასკნელმა პირველ წრეში მე-2 ნომრად განთესილ ეკატერინე გორგოძეს მოუგო (7:5, 6:3), გუშინ კი თანამემამულე კატერინ ჩენტრაინი ჩამოიშორა გზიდან - 6:1, 6:2.
წყვილებში ქვაცაბაია და გორგოძე ნახევარფინალში გავიდნენ, ოღონდ ქვაცაბაია ჩანთალ სკამლოვასთან (სლოვაკეთი) ერთად ცდის ძალებს და ტურნირის რეიტინგფავორიტია.
4 დეკემბერს ქართულ-სლოვაკურმა
მეორე ნომრად განთესილმა გორგოძემ და ნასტია კოლარმა (სლოვენია) დიანა ბუზეანსა (რუმინეთი) და იასმინ გულმანს (თურქეთი) დააყრევინეს ფარ-ხმალი - 6:2, 6:4. ნახევარფინალში მათ მეტოქეობას გაუწევენ დებორაშ კერფსი (ბელგია) და საბინა სლავიკოვიჩი (უნგრეთი), რომლებმაც რუმინელები - ირინა მარია ბარა და ანდრეა ჩიტესკუ დაჯაბნეს - 7:5, 4:6, 10:6.
დოჰაში (ყატარი), ჩოგბურთელ ვაჟთა 10.000-იან საერთაშორისო ტურნირზე პირველ ნომრად განთესილმა ნიკოლოზ ბასილაშვილმა სტარტზე რიჩარდ გაბს (დიდი ბრიტანეთი) აჯობა - 6:3, 7:5, მაგრამ მერვედფინალში ბელგიელ მიხაელ გეერტსს (ბელგია) დანებდა. ამავე ტურნირში ალექსანდრე მეტრეველმა პირველივე პაექრობა ევგენი კარლოვსკისთან (რუსეთი) დათმო - 6:4, 3:6, 2:6.
წყვილთა პაექრობის პირველ წრეში ნიკოლოზ ბასილაშვილმა და იაჰორ იაციკმა (ბელორუსი) მეორე ნომრები - სანდურ არენდსი და ნილს ლოოტსმა (ორივე - ჰოლანდია) გამოთიშეს შეჯიბრებას - 4:6, 6:3, 10:8, მეოთხედფინალში კი სემ ბარისა (ირლანდია) და მაქსიმილიან ნეუჩრისტს (ავსტრია) სათანადო წინააღმდეგობა ვერ გაუწიეს - 2:6, 4:6. ალექსანდრე მეტრეველი და პაველ ფელინი (ბელორუსი) პირველ წრეს ვერ გასცდნენ - რიჩარდ გაბისა და სქოთ კლეიტონის (ორივე - დიდი ბრიტანეთი) დუეტთან დამარცხდნენ - 0:6, 4:6.
ყოველდღიური სპორტული გაზეთი "ლელო"
