ბოლო რეპეტიცია ავსტრალიის ღია პირველობის წინ

მომავალ ორშაბათს სტარტს იღებს "დიდი სლემის" პირველი ტურნირი - ავსტრალიის ღია პირველობა. ამ კვირას ჩოგბურთელები ბოლო რეპეტიციას გაივლიან სეზონის პირველი მთავარი სტარტისთვის...

WTA
სიდნეი (ავსტრალია)
Apia International
საპრიზო ფონდი: $731 000
საფარი: ჰარდი, ღია კორტები
ჩატარების თარიღი: 11-16 იანვარი
მოქმედი ჩემპიონი: ცვეტანა პირონკოვა
მონაწილეები: სიმონა ჰალეპი (3), პეტრა კვიტოვა (4), აგნიეშკა რადვანსკა (6), კაროლინ ვოზნიაცკი (8), ანჟელიკ კერბერი (9), დომინიკა ციბულკოვა (10), ეკატერინა მაკაროვა (11), ფლავია პენეტა (12).

სიდნეიში ტურნირი - ერთ-ერთი უძველესია მსოფლიოში: ის 1885 წლიდან თამაშდება. 2000 წლიდან ჩოგბურთელები სიდნეის ოლიმპიურ საჩოგბურთო ცენტრში იკრიბებიან. აქ ტიტულების რაოდენობით რეკორდსმენია მარგარეტ კორტი - რვა (1961-1965, 1969, 1971, 1973). ასევე, სიდნეიში მოგებული აქვთ: ივონ გულაგონგს (1972, 1974, 1975, 1977), კრის ევერტს (1981), მარტინა ნავრატილოვას (1982, 1984, 1985, 1989), ნატალია ზვერევას (1990), ჯენიფერ კაპრიატის (1993), მონიკა სელეშს (1996), მარტინა ჰინგისს (1997, 2001, 2002), ლინდსი დევენპორტს (1999), კიმ კლაისტერსს (2003, 2007), ჟუსტინ ანენს (2004, 2006, 2008), ელენა დემენტიევასა (2009, 2010) და ვიქტორია აზარენკას (2012).

შარშან აქ მოულოდნელად ჩემპიონი გახდა ბულგარელი ცვეტანა პირონკოვა, რომელიც ძირითად ბადეში კვალიფიკაციის გავლით მოხვდა. წლევანდელი შემადგენლობა, ჩვეულებრივ, ძალიან ძლიერია. ყველაზე მაღალი განთესვის ნომერი ტოპ-ოთხეულის წევრებს - სიმონა ჰალეპსა და პეტრა კვიტოვას აქვთ.

ჰობარტი (ავსტრალია)
Hobart International
საპრიზო ფონდი: $250 000
საფარი: ჰარდი, ღია კორტები
ჩატარების თარიღი: 11-17 იანვარი
მოქმედი ჩემპიონი: გარბინ მუგურუსა
მონაწილეები: კეისი დელაკუა (29), ზარინა დიასი (33), კამილა ჯორჯი (34), სლოუნ სტივენსი (36), კლარა კუკალოვა (40), მონა ბარტელი (42), ელისონ რისკე (43), კურუმი ნარა (44), დანიელა ჰანტუხოვა (WC).

ავსტრალიის კუნძულ ტასმანიაზე ქალთა ტურნირი 1994 წლიდან იმართება. შარშანდელი გამარჯვებულია გარბინ მუგურუსა, რომელიც არ ჩავიდა ჰობარტში ტიტულის დასაცავად და ამ კვირას სიდნეიში ითამაშებს.

ATP
სიდნეი (ავსტრალია)
Apia International
საპრიზო ფონდი: $494 310
საფარი: ჰარდი, ღია კორტები
ჩატარების თარიღი: 12-17 იანვარი
მოქმედი ჩემპიონი: ხუან მარტინ დელ პოტრო
მონაწილეები: ფაბიო ფონინი (20), დავიდ გოფენი (22), ფილიპ კოლშრაიბერი (24), ჟულიენ ბენეტო (25), ლეონარდო მაიერი (28), ჟერემი შარდი (29), პაბლო კუევასი (30), მარტინ კლიჟანი (34), ხუან მარტინ დელ პოტრო (WC).

ამ ტურნირზე გაუმარჯვიათ ისეთ ცნობილ ჩოგბურთელებს, როგორებიც არიან პიტ სამპრასი (1993, 1994), ლეიტონ ჰიუიტი (2000, 2001, 2004, 2005, 2006), როჯერ ფედერერი (2002). მოქმედი ჩემპიონი კი არგენტინელი ხუან მარტინ დელ პოტრო გახლავთ, რომელიც სწორედ სიდნეიში ბრუნდება კორტზე თითქმის ერთწლიანი შესვენების შემდეგ. ორგანიზატორებმა მას "უაილდ-ქარდი" მიანიჭეს. დელ პოტროს პირველი გამომცდელი იქნება უკრაინელი სერგეი სტახოვსკი.

ოკლენდი (ზელანდია)
Heineken Open
საპრიზო ფონდი: $519 395
საფარი: ჰარდი, ღია კორტები
ჩატარების თარიღი: 12-17 იანვარი
მოქმედი ჩემპიონი: ჯონ ისნერი
მონაწილეები: დავიდ ფერერი (10), ერნესტ გულბისი (13), რობერტო ბაუტისტა-აგუტი (15), კევინ ანდერსონი (16), ტომი რობრედო (17), სანტიაგო ხირალდო (32), გილერმო გარსია-ლოპესი (36), სტივ ჯონსონი (37), ბორნა ჩორიჩი (WC).

ოკლენდის ტურნირი გასული საუკუნის 20-იანი წლებიდან ტარდება. სხვადასხვა წელს აქ მთავარ პრიზს იღებდნენ ბიორნ ბორგი (1974), სეულის ოლიმპიური ჩემპიონი მიროსლავ მეჩირჟი (1987), მარსელო რიოსი (1998), გუსტავო კუერტენი (2003), დავიდ ფერერი (2007, 2011-13) და ხუან-მარტინ დელ პოტრო (2009). მოქმედი ჩემპიონია ჯონ ისნერი, რომელიც წელსაც იყო განაცხადში, მაგრამ ბოლო მომენტში უარი თქვა თამაშზე. წელს პირველ ორ ნომრად ფერერი და ერნესტ გულბისი არიან განთესილები.

ყოველდღიური სპორტული გაზეთი "ლელო"