ამერიკულ სანსაისში ჩოგბურთელ ქალთა საერთაშორისო ტურნირი დაიწყო (საპრიზო ფონდი 25.000 დოლარი), რომელშიც წარმატებით აიღო სტარტი თბილისელმა სოფიო შაფათავამ. ერთეულთა თანრიგში მან სტარტზე ბრაზილიელი ბეატრის ჰადად მაია ჩამოიშორა გზიდან - 6:4, 6:1.
მერვედფინალში ჩვენებურს მეტოქეობას გაუწევს მასპინძელი მარია სანჩესი, რომელმაც პირველ წრეში მესამე ნომრად განთესილ გერმანელს - დინაჰ ფრიზენმაიერს აჯობა - 2:6, 7:6, 7:5.
დიდბრიტანელ ემილი ვებლი-სმიტთან შეამხანაგებულმა და ასპარეზობის მე-4 ნომრად განთესილმა შაფათავამ წყვილებში იყოჩაღა - ტურნირზე "ველური ბარათით" მიწვეული ამერიკელები - ბრიტნი და ბინსი კალლა რიცოლო დაჯაბნა - 4:6,
ლიზარაზომ და ცაკარიმ ორ სეტში ამერიკელებს - იან აბაზას და ალექსანდრა მიულერს დააყრევინეს ფარ-ხმალი - 6:2, 6:4.
ანტალიაში ქალთა 10.000-იანი ტურნირის სტარტი, როგორც გაუწყეთ, წარმატებით აიღო სოფიო ქვაცაბაიამ - მეექვსე ნომრად განთესილმა ჩვენებურმა ჩინელი იაა ჩაო დაამარცხა და მერვედფინალში რუს ნიკა კუხარჩიკს დაუპირისპირდება.
ამ ტურნირში მონაწილეობს ეკატერინე გორგოძე, რომელიც ასპარეზობის რეიტინგფავორიტია.
პირველ წრეში გორგოძემაც ჩინელი ჩოგბურთელი დაამარცხა, იან ჟანი - 6:1, 6:2 და მეორე წრეში ვიქტორია მუნტეანის (საფრანგეთი) მძლეველ (6:3, 6:4) რებეკა სტოლმარს (უნგრეთი) შეხვდება.
გორგოძემ და ქვაცაბაიამ წყვილებშიც წარმატებით ითამაშეს - ქართველთა დუეტმა, რომელსაც პირველი განთესვა აქვს, გერმანელებს - მიხაელა ერკენსსა და ჰანა ლანდენერს აჯობა - 6:4, 6:3.
ჩვენებურები მეოთხედფინალში რეგინა ჰუსაკსა (ჰოლანდია) და დუნია სტამენკოვიჩს (სერბეთი) გამოცდიან. ამ ინტერნაციონალურმა ტანდემმა გზიდან "ველური ბარათით" მიწვეული გერმანელები - პატრისია ბოენტგენი და ნინა-იზაბელა შოლტენი ჩამოიშორა - 6:4, 6:3.
თანამემამულეებს ბოლომდე ვერ აუბა მხარი ახალგაზრდა მარიამ ბოლქვაძემ. მართალია, წყვილებში საბინა სლავიკოვიჩთან (უნგრეთი) შეამხანაგებულმა ჩვენებურმა პირველ წრეში მირაბელ ნჯოზეს (დიდი ბრიტანეთი) და მარია ზოტოვას (რუსეთი) მოუგო (6:1, 4:6, 10:6) და მეოთხედფინალში სილვია ჟირიჩისა (ხორვატია) და ოლგა პარეს აზკოიტიას (ესპანეთი) შეხვდება, მაგრამ ერთეულებში ბელგიელ მარი ბენოიტს დანებდა - 4:6, 4:6.
ტუნისში თამაშობდა თამარ ჭალაგანიძეც. პირად პირველობაში იგი საკვალიფიკაციოში დამარცხდა, წყვილებში კი გუშინ ჭალაგანიძემ და ესპანელმა ქრისტინა სანჩეს-ქუინტანარმა რეიტინგფავორიტებთან - იზაბელა შინიკოვასა და ჩანთალ სკამლოვასთან წააგეს - 2:6, 1:6.
ყოველდღიური სპორტული გაზეთი "ლელო"
