ეკატერინე გორგოძე ანტალიის 10.000-იანი ტურნირის გამარჯვებული გახდა

გუშინ, 17 იანვარს, ანტალიაში დამთავრდა ჩოგბურთელ ქალთა საერთაშორისო ტურნირი (საპრიზო ფონდი 10.000 დოლარი), რომელშიც წარმატებით ითამაშა მეორე ნომრად განთესილმა ეკატერინე გორგოძემ.

ჩვენებურმა ზედიზედ დაამარცხა ივანა ჰორვატი (ავსტრია, 6:0, 6:1), მარიანა დრაჟიჩი (ხორვატია, 6:2, 7:6), პია ჩუკი (სლოვენია, 6:3, 2:6, 6:2), იულია გრაბნერი (ავსტრია, 6:3, 6:4), გადამწყვეტ პაექრობაში ბულგარელ ვიქტორია ტომოვას აჯობა - 6:4, 6:0 და მთავარი პრიზი მოიპოვა.

წყვილებში რეიტინგფავორიტებმა - გორგოძემ და სოფიო ქვაცაბაიამ გზიდან ჩამოიშორეს ივანა ჰორვატი (ავსტრია), იანა მორდერბერგი (გერმანია) - 7:6, 6:4, ქრისტინა ადამესკუ (რუმინეთი), ქემრა ანილი (თურქეთი) - 6:3, 6:2, ანა ბოდნარი, რებეკა სტოლმარი (ორივე-უნგრეთი) - 0:6, 6:4, 10:8 და ფინალი აგნეს ბუკტასა (უნგრეთი) და იულია გრაბნერის (ავსტრია) დუეტთან დათმეს - 6:1, 4:6, 9:11.

გორგოძე და ქვაცაბაია ანტალიაში რჩებიან და ახალ 10.000-იან ტურნირში ჩაებმებიან. გორგოძე იანა მორდერგერს (გერმანია), ქვაცაბაია კი ჩიარა გრიმს (შვეიცარია) გაუწევს მეტოქეობას.

აქტობეს (ყაზახეთი) ჩოგბურთელ ვაჟთა 25.000-იანი ტურნირის საკვალიფიკაციო ბადეში მოსინჯავენ ძალებს გიორგი ცივაძე და გიორგი ჯავახიშვილი. ისინი პირველ წრეში თავისუფალნი იყვნენ.

დღეს მე-2 წრეში ცივაძე ევგენი დანილოვთან (ყაზახეთი), ჯავახიშვილი კი დმიტრი რესნიანსკისთან (ყაზახეთი) გაარკვევს ურთიერთობას. წარმატების შემთხვევაში ორივე ქართველი ძირითად ბადეში ითამაშებს.

(იბეჭდება მცირე ცვლილებით)
ყოველდღიური სპორტული გაზეთი "ლელო"