ხუთი მოგება და ოთხი ყაიმი - ასეთი შედეგით დაასრულა დიდოსტატმა ბელა ხოტენაშვილმა საქართველოს მოჭადრაკე ქალთა 74-ე ჩემპიონატი, ცხრა შესაძლებლობიდან 7 ქულას მოუყარა თავი და ვადამდე მოპოვებული საქართველოს ჩემპიონობა ოფიციალურად გაიფორმა. გუშინ, 20 მარტს, მეცხრე ტურში იგი შავი ფიგურებით სოფიკო ხუხაშვილს შეუთანხმდა ყაიმზე.
ასევე დაზავდნენ მირანდა მიქაძე-ნინო ხომერიკი, სოფიო გვეტაძე-ნინო ხურციძე, თამარ წერეთელი-სალომე მელია, ანა კუჭავამ კი შავი ფიგურებით მერი არაბიძეს გააჩერებინა საათი.
ამდენად, 6 ქულით ვერცხლის მედალი ნინო ხურციძეს ერგო. მას ნახევარი ქულით ჩამორჩა სალომე მელია, რომელიც მესამე ადგილზე გავიდა.
საბოლოო შედეგები: ბელა ხოტენაშვილი - 7, ნინო ხურციძე - 6, სალომე მელია - 5.5, სოფიო გვეტაძე - 5, თამარ წერეთელი - 4.5, მერი არაბიძე - 4.5, ნინო ხომერიკი - 4, ანა კუჭავა - 3.5, მირანდა მიქაძე - 3, სოფიკო ხუხაშვილი - 2 ქულა.
ჩემპიონატის საპრიზო ფონდი - 17.500 ლარი პირველ ხუთეულზე ასე გადანაწილდა: I - 5.500, II - 4.500, III - 3.500, IV - 2.500, V - 1.500 ლარი.
(იბეჭდება მცირე ცვლილებით)
ყოველდღიური სპორტული გაზეთი "ლელო"
