ჭადრაკი - მსოფლიო თბილისში, ოლიმპიადა ბათუმში

AutoSharing Option
2017-18 წლებში საქართველო ორ მნიშვნელოვან საჭადრაკო შეჯიბრებას უმასპინძლებს. წლეულს სექტემბერში ჩვენთან დიდოსტატ ვაჟთა მსოფლიოს თასი გათამაშდება, ხოლო გაისად ბათუმში მსოფლიო საჭადრაკო ოლიმპიადა ჩატარდება.

ამ საკითხებთან დაკავშირებით თბილისის ჭადრაკის სასახლეში საქართველოს ჭადრაკის ფედერაციის პრეზიდენტმა გიორგი გიორგაძემ და ევროპის საჭადრაკო კავშირის პრეზიდენტმა, 2018 წლის საჭადრაკო ოლიმპიადის საორგანიზაციო კომიტეტის დირექტორმა ზურაბ აზმაიფარაშვილმა ერთობლივი პრესკონფერენცია გამართეს.

გიორგი გიორგაძემ მომავალი წლის მსოფლიო საჭადრაკო ოლიმპიადის სამზადისზე საუბრისას აღნიშნა, რომ ფედერაციას საქართველოს და აჭარის ავტონომიური რესპუბლიკის მთავრობები აქტიურად უჭერენ მხარს. ითქვა ისიც, რომ აჭარის მთავრობამ მიიღო გადაწყვეტილება,
2018 წლისთვის აშენდეს მულტიფუნქციური სპორტის სასახლე, რომელიც საჭადრაკო ოლიმპიადას უმასპინძლებს.

მანვე მასმედიის წარმომადგენლებს აუწყა, რომ საჭადრაკო მსოფლიო თასის გათამაშება სტარტს 2 სექტემბერს თბილისის სასტუმრო "ჰუალინგში" აიღებს და 28 სექტემბრამდე გასტანს ნოკაუტსისტემით. ეს შეჯიბრება, მსოფლიო ჩემპიონ მაგნუს კარლსენის გარდა, საქართველოს დედაქალაქში პლანეტის უძლიერეს მოჭადრაკეებს მოუყრის თავს.

ჭადრაკის საერთაშორისო ფედერაციაში ბოლო დროს განვითარებულ გახმაურებულ მოვლენებზე ვრცლად ილაპარაკა ფიდეს საპრეზიდენტო საბჭოს წევრმა ზურაბ აზმაიფარაშვილმა. მან აღნიშნა, რომ საპრეზიდენტო საბჭო ორი კვირის ინტერვალით 2-ჯერ შეიკრიბა, იმსჯელეს პრეზიდენტ კირსან ილუმჟინოვის გადადგომა-არგადადგომაზე, 10 აპრილს გამართულმა საპრეზიდენტო საბჭომ მას ყველანაირი ადმინისტრაციულ-ფინანსური და წარმომადგენლობითი ფუნქციები შეუჩერა.

ევროპის საჭადრაკო კავშირის თავკაცმა ყურადღება გაამახვილა ილუმჟინოვის არაფორმალურ შეხვედრაზე აფხაზეთის თვითგამოცხადებული საჭადრაკო ფედერაციის პრეზიდენტთან, რომელსაც ფიდეს პრეზიდენტმა სიგელიც კი გადასცა. ამ ფაქტს საქართველოს ჭადრაკის ფედერაცია საპროტესტო წერილით გამოეხმაურა.

- სკანდალი: კირსან ილუმჟინოვი აფხაზეთის დე ფაქტო ჭადრაკის ფედერაციის პრეზიდენტს შეხვდა

კირსან ილუმჟინოვმა საქართველოს ბოდიში მოუხადა, ხოლო ფიდეს საპრეზიდენტო საბჭომ საქართველოს ჭადრაკის ფედერაცია ერთადერთ სუვერენულ ორგანოდ აღიარა.

ზურაბ აზმაიფარაშვილს არც ის დაუმალავს, რომ მან მიიღო შეთავაზება, 2018 წელს საკუთარი კანდიდატურაც წარადგინოს ფიდეს პრეზიდენტობაზე, თუმცა მას გადაწყვეტილება არ მიუღია, რადგან აცნობიერებს, რომ ეს ყველაფერი დიდ რისკებთანაა დაკავშირებული.

პრესკონფერენციაზე ითქვა ისიც, რომ ბათუმში 2018 წელს, ოლიმპიადის პარალელურად, ფიდეს და კონტინენტთა საჭადრაკო ორგანიზაციების საპრეზიდენტო არჩევნებიც გაიმართება. საქართველო მზადაა, ყველა კანდიდატისთვის ღია სივრცე და თანაბარი პირობები შექმნას. გიორგი გიორგაძემ დასძინა, რომ საქართველოს ჭადრაკის ფედერაცია პირნათლად ასრულებს ფიდესთან გაფორმებული ხელშეკრულების ყველა პუნქტს და, შესაბამისად, იმედოვნებს, რომ 2018 წელს ბათუმის ოლიმპიადა მსოფლიო საჭადრაკო ისტორიაში ერთ-ერთ გამორჩეულ ადგილს დაიკავებს.

ყოველდღიური სპორტული გაზეთი "ლელო"
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული