ხუთს სძლია, ოთხს დაუზავდა

საფრანგეთის ქალაქ ვანდევრეში გუშინ დასრულდა მოჭადრაკეთა საერთაშორისო ფესტივალი, რომლის უძლიერესთა ჯგუფში საპრიზო ადგილებისთვის პაექრობაში ჩვიდმეტი ქვეყნის 72 წარმომადგენელი ჩაება.

მათ შორის თბილისელი დიდოსტატები - თორნიკე სანიკიძე და დავით ლობჟანიძე. ტურნირზე შესანიშნავად იასპარეზა საქართველოს ექსჩემპიონმა, 2008 დრეზდენის მსოფლიო საჭადრაკო ოლიმპიადის გამარჯვებულ საქართველოს ქალთა ნაკრების მწვრთნელმა თორნიკე სანიკიძემ.

8 ტურში მან 6,5 ქულას მოუყარა თავი: ხუთ მეტოქეს სძლია (ალან ბორდას, ბენოტ თადეის, როი საპთარშს, მიხაილ ნაუბს, იან-პიერ ლე როუქსს), ხოლო სამ მოწინააღმდეგეს დაუზავდა (კრისტიან ბაუერს, დმიტრი სვეტუშკინს, თიჯკუმარს), ბოლო ტურში ქულა გაიყო ალბერტო დავიდთან.

გუშინ ასევე ყაიმზე შეთანხმდნენ ვადიმ მალახატკო-კრისტიან ბაუერი, დმიტრი სვეტუშკინი-როი საპტარში, მაქსიმლაგარდი-ბორია იდერი, მატიუ კორნეტმა ჯულიენ სონგი დაამარცხა, მიხაილ ჰაუბმა ჯულიენ სონგს, ბენოტ თადეიმ არგიადიფ დასს სძლია.

ცხრა ტურის შემდეგ სანიკიძემ და ფრანგმა ბაუერმა 7-7 ქულა მოაგროვეს. უკეთესი კოეფიციენტით პირველი ადგილი ჩვენებურმა დაიკავა და მთავარი პრიზიც მას ერგო, ბაუერი მეორეზე გავიდა. 6,5-6,5 ქულით, შესაბამისად, მესამე-მეშვიდე ადგილები გაინაწილეს სვეტუშკინმა (მოლდოვა), კორნეტმა (საფრანგეთი), დავიდმა (ლუქსემბურგი), ჰაუბმა (გერმანია) და თადეიმ (საფრანგეთი). დავით ლობჟანიძემ 5,5 ქულით მე-16 ადგილი დაიკავა.

ყოველდღიური სპორტული გაზეთი "ლელო"