მარიამ ჭანტურიამ ევროპის ახალგაზრდულ ოლიმპიურ ფესტივალზე ოქროს მედალი მოიპოვა

...უქულოდ მიმდინარე ფინალური შეხვედრის დამთავრებამდე 45 წამით ადრე მსაჯმა მარიამ ჭანტურია (63) მეორედ გააფრთხილა, რაც ჩვენმა ევროპის ბრინჯაოს მედალოსანმა ხელების გაშლით გააპროტესტა.

სამაგიეროდ, ეს გაფრთხილება მისთვის წითელი ნაჭერიც აღმოჩნდა და შეხვედრის განახლებისთანავე გავეშებული ეკვეთა მეტოქეს.

მეტოქე კი ფრიად სოლიდური ჰყავდა: გარდა იმისა, რომ სერბი ანია ობრადოვიჩი ევროპის წლევანდელი ჩემპიონია, სერბები მას მთავარი გუნდის ლიდერად ამზადებენ და პერიოდულად ეროვნულ ნაკრებშიც აჭიდავებენ, თავად კი, ჭაბუკური ასაკის მიუხედავად, სადაც ზედიზედ ორჯერ გახდა ევროპის ჩემპიონი, შარშან ახალგაზრდებშიც მოასწრო ევროპის პირველობაზე ბრინჯაოს მოპოვება.

თუმცა ამ დამთრგუნველ კარიერას ჭანტურია არ დაუბნევია და მოგვერდით ვაზარიზე დააგდო მეტოქე. სერბს ანგარიშის გასაქვითავად არც დრო რჩებოდა და არც ქართველი აპირებდა რაიმეს დათმობას - ჭანტურია ხომ ასე ახლოს იყო კარიერის მთავარ წარმატებასთან და საქმე მართლაც მშვიდად მიიყვანა ევროპის ზაფხულის ახალგაზრდობის ოლიმპიური ფესტივალის ჩემპიონის ტიტულთან.

ივნისში ევროპის ჩემპიონატზე ჭანტურიას წაგების შემდეგ (მეხუთეზე გავიდა) ქალთა ნაკრების მთავარი მწვრთნელი გია თენაძე წუხდა, უმედლოდ არ უნდა დარჩენილიყოო. ამის მიუხედავად, მასაც და კახა მოცრაძესაც ბოლომდე სწამდათ ჭანტურიასი. როგორც ჩანს, იმ მარცხიდან მწვრთნელებმა და შეგირდმა უაღრესად ზუსტი დასკვნები გამოიტანეს...

სასიამოვნოა, რომ ზედიზედ მეორე ანალოგიური სპორტული ფორუმია, სადაც ჩვენი ძიუდოისტი გოგოები ოქროებს იხვეჭენ ანუ უკვე ბიჭებს არც ისინი ჩამორჩებიან. არადა, დღეს ევროპის მძიმეწონოსანი ჩემპიონი სოფიო სომხიშვილიც იჭიდავებს, რომლისგანაც ასევე დიდ შედეგს ველოდებით.

გუშინ ორი მედლის მოპოვება ბიჭების დუეტსაც შეეძლო, თუმცა მხოლოდ ერთი შესწვდა ბრინჯაოს - ვლადიმერ ახალკაცი (81), ლევან ფსუტური (73) კი მეხუთეზე გავიდა.



ამდენად, უნგრულ დიორში მიმდინარე ოლიმპიურ ფესტივალზე ბიჭების შემდეგ (იქ წინა დღეს გიორგი ჩიხელიძე (66) გახდა ჩემპიონი) ოქრო გოგოებმაც მოიპოვეს.

ახლა ჩვენი ძიუდოისტების ანგარიშზე 4 მედალია: 2 ოქრო და თითო ვერცხლ-ბრინჯაო. დანარჩენ სამზე უკვე გითხარით და ვერცხლი ბექა წიფიანმა (55) ირგუნა.

ძიუდოისტთა ეს მონაგარი მთლიანად ქართული დელეგაციის შედეგია, რადგან უნგრეთში ჯერჯერობით სხვა სახეობებში მედალი არ მოგვიპოვებია და კვლავაც ძიუდოს იმედად ვრჩებით.

ჭანტურიამ დიორში ფინალამდე სამი შეხვედრა გამართა და ყველა წმინდად მოიგო: ხორვატ ლუჩია გლუმაჩი და პორტუგალიელი ჟოანა კრისოსტომო ვაზარ-იპონით ჩამოიშორა, ნახევარფინალში კოსოვოელთა ევროპის წლევანდელი ბრინჯაოს პრიზიორი ლაურა ფაზლიუ კი პირდაპირ იპონზე დააგდო.

გუშინ გოგოებში თინათინ რევაზიშვილმაც (57) იასპარეზა და პირველ წრეში ფრანგი მელოდიე ტურპინი ვაზარითაც ჩამოიშორა, მაგრამ იქვე წააგო პოლონელთა ევროპის წლევანდელ მესამეპრიზიორ ნატალია კროპსკასთან, სანუგეშოში კი უნგრელ ალექსანდრა მაროტისთან დამარცხდა.

ბოლო მომენტამდე ჩვენი ბიჭები ერთნაირად მივიდნენ: ორივე მეოთხედფინალში დამარცხდა; მანამდე ორივემ ორი-ორი შეხვედრა მოიგო; სანუგეშოში ორივემ 3-3 პაექრობა გამართა და აი, მხოლოდ აქაა ერთადერთი სხვაობა: ახალკაცმა თანაგუნდელზე ერთით მეტი ორთაბრძოლა მოიგო.

მეოთხედფინალში ფსუტური რუს დანიილ მატვეევთან ვაზარით დამარცხდა, ახალკაცი - მოლდოველ ევგენი მატვეიჩუსთან, ოღონდ - სუფთად. მანამდე ფსუტურმა ირლანდიელი ბარახ გლეესონი და ბრიტანელი რაიან ტურნბული დააიპონა, ახალკაცმა კი ილეთების კორიანტელი დააყენა: ბელგიელ ნიკოლას დეჟას და ბელარუს ვალერი კამკოუს - 4-4 გდება გაუკეთა, აქედან კამკოუსთან ერთი კი იპონი იყო. დამამშვიდებლის ფინალში ფსუტური მასპინძელ გერგელი ნეპრელთან ვაზარით დამარცხდა დასრულებამდე 10-ოდე წამით ადრე, როცა მაჯებში ჩავლებაზე მეტოქემ გამოცერა.
ახალკაცმა უკრაინელი მარატ კრიჟანსკი დააიპონა.


დღეს დიორში ჩვენი გუნდის მთავარი ლიდერები იჭიდავებენ - გოგოებშიც და ბიჭებშიც. გოგოებში სომხიშვილზე უკვე გითხარით, ბიჭებში კი ევროპის ვიცე-ჩემპიონი მიხეილ ბექაური (90) და მესამეპრიზიორი ლევან ჭელიძე (+90). აღსანიშნავია, რომ გიორგი ყიზილაშვილმა ევროპაზე ნაჭიდავებთაგან მხოლოდ ეს ორი დატოვა გუნდში.

სომხიშვილი პირველ წრეში ფრანგ კრისტალ გარსიასთან იჭიდავებს, ქვეჯგუფის მეორე წყვილს კი გერმანელი ლეა შტაინი და პოლონელი კინგა ვოლჟცზაკი შეადგენენ. ნახევარფინალში ამ ჯგუფის გამარჯვებული იმ ჯგუფზე გადის, რომელშიც ყველაზე ძლიერი ჰოლანდიელთა წლევანდელი ევროპირველობის ბრინჯაოს პრიზიორი მარიტ კამპსი ჩანს, ვინც სომხიშვილმა ევროპის მეოთხედფინალში დააიპონა.

ბექაური პირველ წრეში ლიტველ დეივის ციუციონასს შეხვდება, ქვეჯგუფში კი ბულგარელ ოლეგ მიროვთან ერთად ის კოსოვოელი შპატ ზეკა ჰყავს, ვისაც ევროპის პირველობაზე პირველივე პაექრობაში აჯობა. არაა გამორიცხული, ნახევარფინალში ისევ ის აზერბაიჯანელი ადილ კარიმლი შეხვდეს, ვინც ევროპირველობაზე ზუსტად ამავე ეტაპზე დააიპონა.

ჭელიძე თავდაპირველად ესტონელ მარტინ ზუევს გაეჯიბრება, ხოლო თუ მოუგებს, მერე ბულგარელ ივაილო დიმიტროვს დაეჭიდება. ჩვენებურს ჯგუფში თურქი ომერ აიდინი და ბერძენი გეორგიოს პაპუცაკისიც ჰყავს, თუმცა ნახევარფინალში გასვლა რეალურია, იქ კი სავარაუდო მეტოქეთა შორის მასპინძელთა ევროპის წლევანდელი ფინალისტი რიხარდ სიპოზიც ჰყავს.

(იბეჭდება მცირე ცვლილებით)
ყოველდღიური სპორტული გაზეთი "ლელო"