დამარცხებული ლუკა კურტანიძე ირანულმა პუბლიკამ მხურვალე ოვაციით დააჯილდოვა [PHOTO]

წარუმატებელი გამოდგა ლუკა კურტანიძის (97) სპორტში დაბრუნების მცდელობა - თეირანში 6 თებერვალს დაწყებულ "ტახტის თასზე" ჩვენებური პირველივე წრეში 10:12 დამარცხდა თურქ ალი ბანციოღლუსთან.

მოგეხსენებათ, ჩვენი ფედერაციის პრეზიდენტმა, ევროპის ხუთგზის და მსოფლიოს ორგზის ჩემპიონმა, ორგზის ოლიმპიური ბრინჯაოს მედალოსანმა სამწლიანი შესვენების შემდეგ, 41 წლის ასაკში გადაწყვიტა სპორტში დაბრუნება და ამ ტურნირისთვის ნაკრებთან ერთად მოსამზადებელი შეკრებაც გაიარა.



ირანული სააგენტოების ცნობით, მან ტექნიკურად იჭიდავა, ესთეტიკურად, ანუ მაყურებლისთვის და არა შედეგზე, რამაც განაპირობა ბევრი ქულის დაკარგვა.



სამაგიეროდ, თვითონაც გვარიანად ქულები დააგროვა და მაყურებლის დიდი სიმპათია დაიმსახურა.

ირანულმა პუბლიკამაც, რომელიც ჭიდაობის ავან-ჩავანში შესანიშნავად ერკვევა, მხურვალე ოვაცია მოუწყო ჩვენებურს. შეხვედრის შემდეგ ლეიბზე თვით იქაურთა ცოცხალი ლეგენდა, ეროვნული ნაკრების ამჟამინდელი თავკაცი, მსოფლიოს ორგზის და ოლიმპიური ჩემპიონი რასულ ხადემიც შევიდა მისასალმებლად, რომელიც იმავე პერიოდში ჭიდაობდა, როცა - კურტანიძე და სპორტსმენობიდანვე კარგად იცნობენ ერთმანეთს.



სამწუხაროდ, 6 თებერვალს, პირველივე შეხვედრებში დამარცხდნენ ჩვენი გუნდის სხვა მონაწილეებიც - ბექა ბუჯიაშვილმა (57) ირანელ ვაჰიდ ჯალალიბაჰართან წააგო, ამავე წონაში ლევან ცალქალამანიძე ყაზახ ახმატ ბაიმურატოვთან დამარცხდა, იაკობ მაქარაშვილი (75) - ასევე მასპინძელ იმან მოჰამადიანთან.

6 თებერვალს ჩვენგან ასევე ოთარ გოგავა, ლაშა ტალახაძე (ორივე - 57), კონსტანტინე ხაბალაშვილი (65) და დავით ქერაშვილი (97) ჭიდაობენ.