<p>გერმანიის ნაკრების მწვრთნელი ფარერებთან მატჩში ბუნდესგუნდის დაცვის ხაზის სოლიდურობას ელის <br> გერმანიის ნაკრებმა თავის ქომაგებს ევროპის ჩემპიონატზე იმედები გაუცრუა და მერე კი არგენტინასთან ტესტ-მატჩიც წააგო, რის გამოც ბუნდესმწვრთნელ იოახიმ ლიოვს კრიტიკოსები მოუმრავლდა და ამ თანამდებობაზე თავს ნამდვილად აღარ გრძნობს ისე, როგორც თევზი წყალში. შესაბამისად, იოგისთვის და მისი გუნდისთვის სწორედ მისწრებაა მსოფლიოს ჩემპიონატის შესარჩევი ციკლის ისეთ მეტოქესთან თამაშით დაწყება, როგორიცაა ფარერების ნაკრები გუნდი.</p><p>ცხადია, რომ გერმანელები ამაზე იოლ დასაწყისს ვერ ინატრებდნენ და ფაქტია ისიც, რომ ბუნდესნაკრებს ჯგუფში სხვა მეტოქეებშიც გაუმართლა, მაგრამ გუშინ გამართულ პრესკონფერენციაზე ლიოვმა და მისმა შეგირდებმა, თომას მიულერმა და მესუთ იოზილმა მთელ საფეხბურთო გერმანიას მოუწოდეს, ნურავინ იფიქრებთ, რომ ამ ჯგუფიდან იოლად გავალთო.</p><p>ჯერ ფარერები, მერე ავსტრია და C ჯგუფში გერმანიას მეტოქეობას კიდევ ირლანდია, ყაზახეთი და შვედეთი გაუწევენ. ბუნდესგუნდისთვის თეორიულად არცერთი მათგანი არ არის რთულად დასამარცხებელი, მაგრამ ლიოვი მაინც თავს იზღვევს:</p><p><em>"მიმაჩნია, რომ ჩვენი ქვეჯგუფი გაწონასწორებულია და არ მინდა, ვინმემ იფიქროს, რომ ამ ჯგუფიდან იოლად გავალთ."</p><p></em></p><p>ცხადია, ლიოვს ეჭვი არ ეპარება იმაში, რომ გერმანია ფარერებთან სამ ქულას აიღებს. იოგი უფრო იმაზე ფიქრობს, როგორც წარმოაჩენს თავს მისი გუნდი ევროპის ჩემპიონატზე იტალიის ნაკრებთან წაგებისა (1:2) და არგენტინასთან ჩაფლავებული ამხანაგური მატჩის (1:3) შემდეგ.</p><p>ლიოვის თქმით, მისმა შეგირდებმა უკვე დაივიწყეს იტალიასთან მარცხი და არც თავდაჯერების პრობლემა აქვთ.</p><p>თუმცა ამაში ვერც ფარერებთან მატჩი დაგვარწმუნებს და ვერც სამშაბათს დაგეგმილი შეხვედრა ავსტრიის ნაკრებთან, რომელსაც გერმანელები, ალბათ, ასევე უპრობლემოდ მოიგებენ. გამოდის, რომ საფეხბურთო გერმანია და ბუნდესგუნდის ქომაგები იოგის ისევ სიტყვაზე უნდა ენდონ.</p><p>იოზილი და მიულერი პრესკონფერენციაზე ნაცნობი და ბანალური განცხადებებით შემოიფარგლნენ - ყველა მეტოქეს სერიოზულად უნდა მოვეკიდოთო; თანამედროვე ფეხბურთში სუსტი გუნდი აღარ არსებობსო; ჩვენ ვიცით, რაც შეგვიძლია და ამას ხალხსაც ვაჩვენებთო და ა.შ.</p><p>თავად ლიოვმა თამამად თქვა, რომ ფარერებთან და ავსტრიასთან მატჩებში გერმანიის ნაკრების დაცვის ხაზისგან სოლიდურ თამაშს ელის, რაც ასეთ მეტოქეებთან შეხვედრების წინ გერმანიის ნაკრების თავკაცისთვის, რა თქმა უნდა, იოლი სათქმელია.</p><p>მწვრთნელს მხარი მიულერმაც აუბა - პროგრესი და განვითარება არ უნდა შევწყვიტოთ, ფარერების ნაკრები პირველივე წუთებიდან უმძიმესი წნეხის ქვეშ უნდა მოვაქციოთო...</p><p>სასაცილოა, არა?</p><p><strong>მარჯვნივ ლამი, მარცხნივ შმელცერი</p><p></strong>ტრაფარეტული და მართლა სასაცილო განცხადებების შემდეგ ლიოვმა საკადრო საკითხებზე კონკრეტულად ისაუბრა და ჩვენს გერმანელ კოლეგებს ამცნო, ფარერებთან დაცვის მარცხენა ფლანგზე მარსელ შმელცერი ითამაშებს, ფილიპ ლამს კი მარჯვნივ გავამწესებო.</p><p>იოგი ფიქრობს (ან, ბოლოს და ბოლოს, მიხვდა), რომ გერმანიის ჩემპიონის, დორტმუნდის "ბორუსიას" მარცხენა მცველს უფრო ხშირად უნდა ენდოს - ისევე, როგორც "დორტმუნდის" ვარსკვლავ მარკო როისს, რომლის ძირითადში გამწესებისკენ იოახიმს მთელმა გერმანიამ მოუწოდა.</p><p>იმ შემადგენლობიდან, რომელიც ლიოვმა ფარერებთან და ავსტრიასთან მატჩებისთვის გამოიძახა, კითხვის ნიშნის ქვეშ მხოლოდ ტონი კროოსის ასპარეზობაა, რომელსაც მცირე ტრავმა აწუხებს. განაცხადში ერთადერთი ნომინალური ცენტრფორვარდი მიროსლავ კლოზეა და ფაქტია, რომ "ლაციოს" ძალიან კარგ ფორმაში მყოფი გოლეადორი თამაშს სასტარტოში დაიწყებს.</p><p>ტრავმირებული მარიო გომესის არყოფნაში ლიოვს მიროს სახით მხოლოდ ერთი ცენტრალური თავდამსხმელი შემორჩა და მიუხედავად ამისა, ნაკრებში მაინც არ უხმო "ლევერკუზენის" ფორვარდ შტეფან კისლინგს და არც "გლადბახის" თავდამსხმელ მაიკ ჰანკეს ენდობა.</p><p>ექსპერტებმა იოგი ამის გამოც გააკრიტიკეს და შიშობენ, რომ ცენტრალური თავდამსხმელის პოზიცია ბუნდესგუნდისთვის მალე შეიძლება პრობლემატური გახდეს, რადგან მხოლოდ გომესის და კლოზეს იმედად ყოფნა არ შეიძლება. ლიოვი ამბობს, რომ საჭიროების შემთხვევაში, ცენტრფორვარდის ფუნქციებს როისი და თომას მიულერიც კარგად შეასრულებენ.</p><p><strong>ყოველდღიური სპორტული გაზეთი "ლელო"</strong></p>
[VIDEO] კეინის ყველა დროის რეკორდი - "ბაიერნი" და ინგლისელი შეუჩერებლები არიან
ბუნდესლიგის გუნდებმა მიმდინარე სეზონში 3 ტურის შემდეგ უკვე მეორე მწვრთნელი დაითხოვეს
ერიკსენი კარიერას "ვოლფსბურგში" გააგრძელებს
უარი სუპერლიგას - ''ბარსელონა" გაზრდილი შემოსავლებით კმაყოფილია
ახალი ეტაპი "იბერიაში" - გუნდს გუგა ნერგაძე უხელმძღვანელებს
ალექსანდრე იაშვილი: დარწმუნებული ვარ, ჩაკვეტაძე ისევ ისეთი ძლიერი დაგვიბრუნდება
"ყველა დროის საუკეთესო ვარ და ამას კიდევ ერთხელ დავამტკიცებ" - მერაბ დვალიშვილი
ევროპალიგაზე "მიდტიულანდთან" სენსაციური მარცხი შემდეგ "ნოტინგემის" ფანები პოსტეკოღლუს გათავისუფლებას ითხოვენ
"მინდა გვარდიოლამ ესპანეთის ნაკრები ჩაიბაროს" - დავიდ სილვა
ვსა-მ დუდუ დადიანის თასი ზედიზედ მეორედ მოიგო
[VIDEO] თურქი მეკარის ეს სიგიჟე ნახეთ? - ოზერმა "რომასთან" 2 წუთში 3 პენალტი მოიგერია
"პსჟ კი არა, ჩემპიონთა ლიგის ფავორიტი ეს გუნდია" - ლუის ენრიკეს მოულოდნელი არჩევანი
20 წლამდელთა ნაკრებს ვიტო კოლელიშვილი ჩაიბარებს
კონფერენს ლიგა: სიგუას ლამაზი სოლო-რეიდი და საგოლე პასი
[VIDEO] კიტეიშვილი გოლით დაბრუნდა - "შტურმმა" "რეინჯერსს" მოუგო
[VIDEO] კიტეიშვილი დაბრუნდა და "რეინჯერსს" გაუტანა
The Athletic: ალისონის ტრავმა ნავარაუდევზე სერიოზული აღმოჩნდა - მამარდაშვილს შანსი და გამოცდა ელის
კვერნაძე ერთმატჩიანი დისკვალიფიკაციით დასაჯეს
რამუში იამალის მისიასა და პედრის შურისძიებაზე: ამის დამტკიცება მოედანზეა საჭირო
19-წლამდელები ბოსნია და ჰერცეგოვინას დაუპირისპირდებიან - შემადგენლობა
21-წლამდელთა შემადგენლობა ოქტომბრის მატჩებისთვის
"დე ბრუინი ლეგენდაა, ყოველთვის ვიცი, რომ თუ გავიხსნები, მიპოვის" - ჰოილუნი
"კარგი პერიოდი გქონდა, მაგრამ ახლა ჩემი დროა" - სენდჰეგენმა დვალიშვილს მიმართა