უმცროსი "ბორჯღალოსნები" მსოფლიოს ჩემპიონატისთვის სამხრეთ აფრიკაში მოემზადებიან

AutoSharing Option
უმცროსი ბორჯღალოსნები, რომლებიც მსოფლიო რაგბის 20-წლამდელთა ჩემპიონატისთვის ემზადებიან, სამხრეთ აფრიკაში გაემგზავრნენ, სადაც ამ ქვეყნის 20-წლამდელთა ნაკრებთან ორ თამაშს გამართავენ.

18-წლამდელებთან და ლეგიონერებთან ერთად


მანამდე გუნდმა ‘შევარდენის’ სანაკრებო ბაზაზე 3-კვირიანი შეკრება გაიარა, სადაც განსაკუთრებული ყურადღება მოთამაშეთა ფიზიკური კონდიციების გაუმჯობესებას დაეთმო.

„პირველი ორი კვირა განსაკუთრებით მძიმე იყო. მესამე კვირაში ბურთით უფრო მეტი ვივარჯიშეთ და მთლიანობაში, სამხრეთ აფრიკული ტურნესთვის ნაყოფიერად მოვემზადეთ“ - ამბობს გუნდის მთავარი მწვრთნელი ილია მაისურაძე.

30-მა მოთამაშემ და სამწვრთნელო შტაბმა სამხრეთ აფრიკისკენ გეზი 9 აპრილს აიღო, დანიშნულების ადგილზე მეორე დღეს
ჩავა და 3 დღეში (13 აპრილი) სამხრეთ აფრიკის 20-წლამდელთა ნაკრებთან პირველი თამაში ექნება. წინა შეკრებებთან შედარებით, შემადგენლობაში გარკვეული სიახლებია:

„გაფართოებულ შემადგენლობაში 18-წლამდელთა ნაკრების 8 წევრია და ოთხი (ლაშა ლომიძე, მიხეილ ალანია, დემურ თაფლაძე, ზურაბ ქავთარაძე) მათგანი სამხრეთ აფრიკაში მოდის, ხოლო დანარჩენებს თბილისში, მაისის შეკრებაზე დავაკვირდებით. პრეცედენტი იმისა, რომ 20-წლამდელთა ნაკრების გაფართოებულ შემადგენლობაში 3 წლით უმცროსი ამდენი მორაგბე ყოფილიყო, აქამდე არასდროს ყოფილა. 18-წლამდე ნაკრებიდან ადრეც გვყავდა მოთამაშეები, თუმცა მხოლოდ 1-2. ოთხი მათგანი სამხრეთ აფრიკაში მიგვყავს, მათ აუცილებლად ექნებათ სათამაშო დრო, ვნახოთ როგორ შეძლებენ გუნდთან ინტეგრირებას და 2-3 წლით უფროსებთან საკუთარი შესაძლებლობების გამოვლენას“ - ამბობს მაისურაძე.

სამხრეთ აფრიკაში მიდიან ლეგიონერებიც - ბურჯი ლუკა აზარიაშვილი და მეორეხაზელი ლაშა ჯაიანი, რომელმაც 20-წლამდელთა ჩემპიონატზე შარშანაც ითამაშა:

„დაგვემატა ‘მონპელიეს’ მარჯვენა ბურჯი ლუკა აზარიაშვილი, რომელიც ჩვენთან პირველადაა. ის შარშან 18-წლამდელთა ნაკრებში იყო და აფრიკაში დავაკვირდებით. ბურჯებში დიდი კონკურენციაა. ყველანი კარგად ვითარდებიან, ლუკა ჯაფარიძემ კი ახალ ამპლუაშიც მოახერხა ადაპტირება და ახლა მარჯვენას გარდა მარცხენა ბურჯადაც შუძლია თამაში“.

თამაშიდან თამაშამდე


უმცროსი ბორჯღალოსნები სამხრეთ აფრიკის 20-წლამდელთა ნაკრებს 13 და 20 აპრილს ეთამაშებიან. მთავარი მწვრთნელი იმდოვნებს, რომ ერთკვირიან შუალედში გუნდს პროგრესი ექნება და მეორე თამაშის ხარისხი პირველზე უკეთესი იქნება:

„ორი რთული შეხვედრა გველის ძლიერ მეტოქესთან, რომელიც მსოფლიო თასზე ითამაშებს. ბიჭები შეიძენენ უდიდეს გამოცდილებას ისეთ მეტოქესთან, რომელიც მაღალ ტემპში თამაშობს. ჩემი მიზანია, პირველიდან და მეორე თამაშამდე მოვუმატოთ და პროგრესი გვქონდეს. ისევე, როგორც საფრანგეთში, ბალანსს აქაც დავიცავთ და სათამაშო დრო ყველას ექნება“.

შინ დაბრუნების შემდეგ ბიჭები დაისვენებენ და მაისში დასკვნით შეკრებაზე შევლენ, რომლის ფარგლებში 19 მაისს, თბილისში, ინგლისის საგრაფოების 20-წლამდელთა ნაკრებს შეხვდებიან.

საგრაფოების ნაკრებს 25 მაისს საქართველოს 19-წლამდელთა ნაკრებიც ეთამაშება, რომელიც იმ მორაგბეებით იქნება დაკომპლექტებული, რომელიც 20-წლამდელთა ნაკრებში გაისად ითამაშებენ.

რაც შეეხება უმცროს ბორჯღალოსნებს, ისინი 23 მაისს საფრანგეთში გაემგზავრებიან, სადაც 20-წლამდელთა ჩემპიონატის ჯგუფურ ეტაპზე 30 მაისს სამხრეთ აფრიკას (პერპინიანი, 20:30 საქართველოს დროით), 3 ივნისს საფრანგეთს (ბეზიე, 16 საათი) და 7 ივნისს ირლანდიას (ნარბონი, 20:30) ეთამაშებიან.

სამხრეთ აფრიკაში გაემგზავრნენ:


გურამ გოგიჩაშვილი (ლოკომოტივი), გიორგი ნუცუბიძე (ჯიქი), ლევან პაპიძე (ლელო), თენგიზ ზამთარაძე (ლელო), გიორგი მენაბდე (ბათუმი), ლუკა აზარიაშვილი (მონპელიე), გია ხარაიშვილი (ხაშური), ლუკა ჯაფარიძე (ლელო), ლაშა ჯაიანი (ექსეთერი, ინგლისი), ლუკა გელაშვილი (ჯიქი), თორნიკე ჯალაღონია (ჯიქი), ბექა საღინაძე (ლელო), სანდრო კალმახელიძე (არმია), თენგიზ გიგოლაშვილი (არმაზი), სანდრო მამამთავრიშვილი (ლელო), არჩილ აბესაძე (ლელო), არსენ მაჩალაძე (აია), ლუკა დვალიშვილი (არმაზი), თენგიზ პერანიძე (ლელო), თედო აბჟანდაძე (ტერენორ კოლეჯი, ირლანდია), გიორგი წიკლაური (ჯიქი), სანდრო სვანიძე (არმაზი), ოთარ ძაგნიძე (აია), კოტე მარჯანიშვილი (ჩოხოსნები | ლოკომოტივი), ბექა მამუკაშვილი (ლელო), დურმიშხან ჯაბნიძე (ბათუმი), ლაშა ლომიძე (აია), მიხეილ ალანია (ჯიქი), დემურ თაფლაძე (ლელო), ზურაბ ქავთარაძე (ხარები).

მთ. მწვრთნელი: ილია მაისურაძე, მწვრთნელები: ლადო კილასონია, ზურა ამონაშვილი, ფიზ. მომზადება: გიორგი ნადარეიშვილი, გივი ნადარეიშვილი, ვიდეო: ვლადიმერ კუპრეიშვილი, ფიზიო: ირაკლი შაორშაძე, რომან სახოკია, ექიმი: ოდისეი სადოევი, მენეჯერი: ოთარ იაშვილი

მომზადებულია rugby.ge-ს მიხედვით
მკითხველის კომენტარები / 1 /
მჯერა მეთქი ვიტყოდი,მაგრამ კი არ მჯერა,ვიცი,რომ ეს ბიჭები კიდევ უფრო უკეთეს რაგბის ითამაშებენ,ვიდრე მათი წინამორბედები.ლელო ჩვენი თამაშია,ხოლო რაც შეეხება რაგბის გრანდებს,ცოტა ხანი გვაცალეთ ბატონო და შემდეგ ვნახოთ ვისი აჯობებს. ეს ბიჭები მთებს გადადგამენ,დაიხსომეთ ჩემი სიტყვა.საფრანგეთს მოვუგეთ და უკვე მათზე ძლიერები ვართო ვერ ვიტყვი,მაგრამ ეს ნაკრები უკვე საფრანგეთი რანგის სიახლოვესაა და უკვე მის ზემოთ აქვს ახალი სამიზნე.ასე რომ გრანდებო,ქართველები მოდიან!დაგვიდექით!!!
სოსო
20:48 09-04-2018
0

ასევე დაგაინტერესებთ