გიორგი გეთიაშვილი: დარწმუნებული ვარ, "ვიტ ჯორჯიას" მომავალი აქვს

"ვიტ ჯორჯიას" კაპიტანი გიორგი გეთიაშვილი საქართველოს ეროვნული ჩემპიონატის ერთ-ერთი საუკეთესო მცველია. თბილისის "დინამოს" აღზრდილს უთამაშია საქართველოს ახალგაზრდულ ნაკრებშიც.

25 წლის გეთიაშვილი ვიტელთა დაცვის ბურჯია. მან შესანიშნავად ითამაშა ფოთის "კოლხეთთან" შეხვედრაში და დიდი წვლილი შეიტანა იმაში, რომ მასპინძლებმა გოლი არ გაუშვეს. "ლელო" გიორგის დაუკავშირდა და ინტერვიუ სთხოვა:

- გიორგი, გაიხსენეთ თქვენი პირველი ნაბიჯები ფეხბურთში....
- ფეხბურთზე "შევარდენის" სკოლაში მივედი. 6 წელი იქ ვვარჯიშობდი, ჩემი პირველი მწვრთნელი კი რეზო წერეთელი გახლდათ. მერე შერჩევა გავიარე და ოთხ თანაგუნდელთან ერთად მივედი თბილისის "დინამოში". "დინამოს" ყველა ასაკობრივი გუნდი გავიარე. აკადემიიდან დუბლებში დავწინაურდი. ძირითად შემადგენლობაში კი ოთხჯერ ვითამაშე "დინამოში" - მაშინ გუნდის მთავარი მწვრთნელი კახა კაჭარავა გახლდათ.

- "ვიტ ჯორჯიას" ჯერაც არ გადაუჭრია უმაღლეს ლიგაში ადგილის შენარჩუნების პრობლემა. ელოდით ასეთ შედეგს?
- დასაწყისი ისეთი იყო, რომ მეგონა, სულ მცირე, პირველ ექვსეულში მოვხვდებოდით, მაგრამ ასე არ მოხდა. რამდენიმე მიზეზია - ჯერ ერთი, შეკრება ვერ გავიარეთ ნორმალურად. მერე იყო გამოუცდელობა... დარწმუნებული ვარ, ჩვენს გუნდს მომავალი აქვს. თქვენც დამეთანხმებით, "ვიტ ჯორჯიას" საშუალო ასაკი ძალიან დაბალია. მომავალ სეზონში გუნდი სულ სხვა მიზნებს დაისახავს.

- პლეი ოფში მოხვედრის შანსზე რას იტყვით?
- ჩემი აზრით, ჩვენი შანსი სოლიდურია. საქართველოს ეროვნული ჩემპიონატის დასრულებამდე ერთი ტურით ადრე ყველაფერი ჩვენზეა დამოკიდებული. რაც შეეხება პლეი ოფში ჩვენს შესაძლო მოწინააღმდეგეს, არ მინდა, რომელიმე გუნდი დავაკნინო, მაგრამ ჩემი აზრით, უპირატესობა ჩვენ გვექნება ამ შეხვედრაში.

- "კოლხეთთან" შეხვედრაში გუნდი განსაკუთრებულად იყო მოტივირებული...
- სხვანაირად ვერც იქნებოდა, რადგან ჩვენ ხომ უმაღლეს ლიგაში დასარჩენად ბოლო შანსს ვეჭიდებოდით. მეტოქემ ძალიან დიდი ბრძოლა გაგვიმართა. ვფიქრობ, კარგი თამაში გამოვიდა.

- შესანიშნავად ხართ შეთამაშებული "ვიტ ჯორჯიას" მეორე ცენტრალურ მცველთან, გიორგი კალანდიასთან. ბავშვობაშიც ერთად ხომ არ თამაშობდით?
- არა. ისე, სწორად კი შეგინიშნავთ, ჩვენ მართლაც ძალიან კარგად გვესმის ერთმანეთის. ბავშვობიდან ბევრი მეწყვილე მყოლია ცენტრალური მცველის პოზიციაზე, მაგრამ ასე კომფორტულად თავი არავისთან მიგრძნია. ერთი სიამოვნებაა, როცა მინდორზე ისეთი პარტნიორი გყავს, როგორიც გიორგი კალანდიაა. საერთოდ, "ვიტ ჯორჯიაში" ყველას ერთმანეთი ბოლომდე გაგვყავს.

- მინდვრის გარეთ თუ მეგობრობთ კალანდიასთან?
- კი, უახლოესი მეგობრები ვართ. შეიძლება, კარგად რომ გვესმის მინდორზე ერთმანეთის, ამის "ბრალიცაა".

- როგორი გუნდია "ვიტ ჯორჯია" მინდვრის გარეთ, გასახდელსა და ცხოვრებაში?
- მოკლედ გეტყვით: ოპტიმიზმით სავსე გუნდია! ჩვენ ყველაფერი გვინახავს, მატერიალური შეჭირვებაც, სხვა რამეებიც... ბოლო ათი ტურია, უკანასკნელ შანსს ვეჭიდებით უმაღლეს ლიგაში დასარჩენად და ახლა ეს შანსი რეალობად ვაქციეთ, ყველაფერი ჩვენზეა დამოკიდებული.

- რომელია თქვენი საოცნებო გუნდი?
- თუ თბილისის "დინამო" ითამაშებდა ჩემპიონთა ლიგის ჯგუფურ ეტაპზე, თუ ექნებოდა ამ გუნდს რეალური ამბიცია, მაშინ ეს იქნებოდა ჩემი ოცნების გუნდი. არ გამოვეკიდები ევროპული კლუბების მჭექარე სახელებს. "მანჩესტერი", "რეალი", "ბარსელონა"... ყველა მაგარია. ერთი ამოჩემებული კლუბი არ მყავს.

- საფეხბურთო ოცნება თუ გაქვთ?
- მაქვს. საქართველოს ეროვნული ნაკრების წარმატება! უბედნიერესი ადამიანი ვიქნები, თუ ამაში უშუალოდ შევიტან ჩემს წვლილს, თუ არა და, ისედაც - ნაკრების წარმატება ყველა ქართველისთვის დიდი ბედნიერებაა.

(იბეჭდება მცირე ცვლილებით)
ყოველდღიური სპორტული გაზეთი "ლელო"