საბურთალო-ცხინვალი 2:2 - ვინ არის დამნაშავე? [VIDEO]

თვალსასეირო და ძალიან დაძაბული მატჩით განახლდა ეროვნული ჩემპიონატი ვაკეში. "საბურთალოსა" და "ცხინვალს" მათთვის სასურველი შედეგის მისაღწევად არაფერი დაუშურებიათ, მაგრამ გამარჯვებული მაინც ვერ გამოავლინეს. ამ შეხვედრაში იყო ყველაფერი ის, რაც ფეხბურთს უხდება. რა თქმა უნდა, მეტ სათამაშო კლასს ვისურვებდით, მაგრამ ის კი ფაქტია, რომ მატჩს დაძაბულობა წამითაც არ მოჰკლებია...

აქვე შევნიშნოთ, რომ მიხეილ მესხის სახელობის სტადიონის სათადარიგო არენა ჩემპიონატის მეორე წრეში "საბურთალოსთვის" საშინაო იქნება. იცით, რომ "ცხინვალიც" სწორედ აქ თამაშობს. აქედან გამომდინარე, კახა კაჭარავას გაწვრთნილ გუნდს "სტუმრად" არ უთამაშია...

შეხვედრა "საბურთალოს" გოლით დაიწყო. გიორგი ხარაიშვილმა კარგად წაიღო ბურთი და ცხინვალელთა კარის მიმართულებით ძლიერად დაარტყა - რიკოშეტი და ანგარიში გაიხსნა. საერთოდ, პირველ ტაიმში "საბურთალო" აშკარად უკეთესი იყო და ყველა კომპონენტში სჯობდა მეტოქეს.

სტუმართა კარის დარაჯ გიორგი ნადირაძეს ორჯერ მოუხდა თავისიანების გადარჩენა - ჯერ იყო და, მან ანდრო სოფრომაძეს არ გაატანინა, მერე კი გურამ გოშთელიანს აუღო სახიფათო თავური. მანვე გაანეიტრალა ლაშა თოთაძის მიერ შესრულებული საჯარიმო დარტყმა.

"საბურთალოს" უნდა გაეტანა და გაიტანა კიდეც. გიორგი ფანცულაია თანაგუნდელის ჩაწოდებულს საჭირო დროს და საჭირო ადგილზე დაუხვდა, შესაბამისად, ანგარიშში თავისი გუნდის უპირატესობა კიდევ უფრო სოლიდური გახადა.

თითქოს, ეს "საბურთალოს" გამარჯვებას ნიშნავდა, მაგრამ ასე არ ფიქრობდნენ "ცხინვალის" მწვრთნელ-ფეხბურთელები. საბოლოო ჯამში, მათმა გარჯამ შედეგი გამოიღო, თუმცა აქვე ისიც ვთქვათ, რომ "საბურთალო" მსაჯებს შემოსწყრა და მეორე ტაიმში დაშვებულ შეცდომებზე საკლუბო საიტის მეშვეობით მიუთითა.

ჩვენ კი თანმიმდევრობით მივყვეთ. მეორე ტაიმის დაწყებიდან სამ წუთში ანგარიშში სხვაობა შემცირდა. შეცვლაზე შესულმა გიგა ბეჭვაიამ ფლანგიდან ჩააწოდა ბურთი თბილისელთა საჯარიმოში, სადაც გადაცემას დროულად გამოეხმაურა ცხინვალელთა შორის საუკეთესო გიორგი ივანიშვილი და - 2:1.

ამის შემდეგ გუნდებმა სახიფათო მომენტები "გაცვალეს", რასაც მინდვრიდან "საბურთალოს" მეკარე ოთო გოშაძის გაძევება და პენალტი მოჰყვა.

არბიტრმა გიორგი კიკაჩეიშვილმა ჩათვალა, რომ გოშაძემ საკუთარ საჯარიმოში ივანიშვილი წააქცია. მან ეს ეპიზოდი "ბოლო იმედის" ფოლად შეაფასა და "საბურთალოს" მეკარეს მინდორი დაატოვებინა. ბურთთან თორნიკე გორგიაშვილი მივიდა და ანგარიში გაათანაბრა. გოშაძის ნაცვლად კი "საბურთალოს" კარში ადგილი ბექა ქურდაძემ დაიკავა, ვინც სანდრო ალთუნაშვილი შეცვალა.

ანგარიში გათანაბრდა, თუმცა ამაზე შეჩერებას არცერთი გუნდი არ აპირებდა. იქვე, აქტიური ლაშა ქოჩლაძე გაეპარათ "საბურთალოს" მცველებს - ახალგაზრდული ნაკრების წევრის დარტყმას სიზუსტე დააკლდა. მერე ელვინ ტერას წინააღმდეგ იუხეშა შეცვლაზე შესულმა უჩა ბურძენაძემ და მსაჯმა მასაც წითელი ბარათი უჩვენა.

ეს იყო და, "საბურთალოს" აფრიკელ საყრდენ ტერას მიეცა შანსი. ეს ბიჭი ძალიან კარგი ფეხბურთელი ჩანს. ასეთები იშვიათად ხვდებიან საქართველოს ჩემპიონატში და, ალბათ, დროა, ამ თინეიჯერს ყურადღება აქედანვე მივაქციოთ - ვინ იცის, სად და როგორ გამოგვადგეს...

ამის მერე გუნდებმა კიდევ რამდენიმე შანსი "გაცვალეს". "საბურთალოს" სამარქაფო რატი ცაცკრიალაშვილმა ყოფილ გუნდს გაუტანა, მაგრამ გოლი თამაშგარე მდგომარეობის გამო გაუქმდა. ერთი შეხედვით, საკამათო ეპიზოდი იყო...

ბოლოს საგოლე შანსი ისევ ქოჩლაძეს მიეცა, თუმცა მან ზემოდან გადააცილა კარს, რომელიც ქურდაძემ აშკარად "დაკარგა".

საინტერესო იყო, როგორ შეცვლიდა "ცხინვალი" რუსულ "როსტოვში" გადასულ საუკეთესო ბომბარდირ ნიკა კაჭარავას. თამაშმა გამოაჩინა, რომ კახა კაჭარავა ჯერ კიდევ ძიებაშია, თუმცა მწვრთნელს საინტერესო იდეები აქვს - თუნდაც, გამოკვეთილი ცენტრალური თავდამსხმელის გარეშე თამაში. ვნახოთ, როგორ გაამართლებს ეს იდეა...

საქართველოს ჩემპიონატი. უმაღლესი ლიგა. II წრე. XVI ტური
19.02. "მიხეილ მესხი" (სათადარიგო)
საბურთალო-ცხინვალი 2:2
გოლები: 1:0 ხარაიშვილი (2), 2:0 ფანცულაია (35), 2:1 ივანიშვილი (48), 2:2 გორგიაშვილი (65-პენ)
საბურთალო: გოშაძე, იაშვილი, მარგველაშვილი, თოთაძე, სოფრომაძე (58. ჩაბრაძე), ალთუნაშვილი (64. ქურდაძე), ტერა, ბიძინაშვილი (60. ცაცკრიალაშვილი), ხარაიშვილი, ფანცულაია, გოშთელიანი.
სათადარიგოები: მამუჩაშვილი, რუხაძე, კოხრეიძე, ხორხელი
მწვრთნელი: გიორგი ჭიაბრიშვილი
ცხინვალი: ნადირაძე, ცერცვაძე, ბუთუევი, მაისაშვილი (32. ბურძენაძე), ჯაფარიძე, გორგიაშვილი, ქარდავა, ნოზაძე (46. ბეჭვაია), ქოჩლაძე, ლეკვთაძე (79. ლობჯანიძე), ივანიშვილი.
სათადარიგოები: კერესელიძე, თოლორდავა, ჯიშკარიანი, მაღრაძე
მწვრთნელი: კახა კაჭარავა
გაფრთხილება: მაისაშვილი (21), ალთუნაშვილი (24), ტერა (34), თოთაძე (39), ნადირაძე (73)
გაძევება: გოშაძე (63), ბურძენაძე (73)
არბიტრი: გ. კიკაჩეიშვილი.

ბომბარდირები:
ნ. კაჭარავა (ცხინვალი) 13
გ. ქვილითაია (დინამო (თბ) 13
ო. მარცვალაძე (დილა) 11
გ. ბერიაშვილი (დინამო (ბთ) 10
ი. სიხარულიძე (სამტრედია) 10

XVII ტური
23 თებერვალი, სამშაბათი
გურია-შუქურა
დინამო (თბ)-ლოკომოტივი
ტორპედო-ზუგდიდი
დინამო (ბთ)-დილა
სამტრედია-საპოვნელა
სიონი-კოლხეთი
ცხინვალი-მერანი
ჩიხურა-საბურთალო.

(იბეჭდება მცირე ცვლილებით)
ყოველდღიური სპორტული გაზეთი "ლელო"