ეს არის ჩემი შანსი - "ესბიერგმა" ოთარ კაკაბაძე წარადგინა

დანიურმა "ესბიერგმა" ოფიციალურად წარადგინა საქართველოს ნაკრების მარჯვენა მცველი ოთარ კაკაბაძე.

21 წლის ფეხბურთელი გუნდს ესპანური "ხიმნასტიკიდან" შეუერთდა. ოთარი 6-თვიანი იჯარით ითამაშებს დანიურ კლუბში, რომელიც იქაურ 14-გუნდიან სუპერლიგაში მე-12 ადგილზეა და ამის შემდეგ ისევ "ხიმნასტიკს" დაუბრუნდება.

- ოთარ კაკაბაძე: პირდაპირ უნდა გითხრათ, რომ ეს იყო ჩემი გადაწყვეტილება

წარდგენის ცერემონიალის დასრულების შემდეგ კაკაბაძემ პირველი შთაბეჭდილებები გაუზიარა კლუბის ოფიციალურ საიტს:

"დანიაში ბევრი მეგობარი მყავს და, შესაბამისად, "ესბიერგის" თაობაზეც ბევრი რამ ვიცი. მიმაჩნია, რომ საჭირო ნაბიჯი გადავდგი, როცა ამ გუნდში გადმოვედი სათამაშოდ.

ჩემი საფეხბურთო კარიერა დაიწყო თბილისის "დინამოში", რის შემდეგაც ესპანურ "ხიმნასტიკში" გადავედი. მიმდინარე სეზონში სათამაშო პრაქტიკა ნაკლები მქონდა, ეს კი ჩემთვის ძალიან მნიშვნელოვანი მომენტია. სიმართლე გითხრათ, ბევრი არ მიფიქრია "ესბიერგის" წინადადებაზე. ეს არის ჩემი შანსი და იმის დამტკიცების საშუალება, რომ თამაშს ვიმსახურებ.

ველოდები შეხვედრას ჩემს ახალ პარტნიორებთან და სამწვრთნელო შტაბთან", - თქვა კაკაბაძემ.

(იბეჭდება მცირე ცვლილებით)
ყოველდღიური სპორტული გაზეთი "ლელო"