რობერტო ბაჯო იშვიათად ხვდება სპორტული პრესის ფირცლებზე. ამჯერად, მან ვრცელი ინტერვიუ მისცა "კორიერე დელა სერას" და საინტერესო თემებზე ისაუბრა. სრული ინტერვიუ მოგვიანებით გამოქვეყნდება, თუმცა მისი მოსაზრებების ნაწილი უკვე გაავრცელა იტალიურმა გამოცემამ...მემკვიდრე
რომელ ფეხბურთელში ვხედავ ჩემ მემკვიდრეს? - გამიჭირდება ერთი კონკრეტული ფეხბურთელის დასახელება. ცნობილია, რომ მე უფრო სამხრეთამერიკული ფეხბურთის მოყვარული ვარ და "ბოკა ხუნიორსს" ვგულშემატკივრობ. "ბოკაში" ძალიან ნიჭიერი ფეხბურთელი რიკარდო სენტურიონი თამაშობს, რომელიც ძალიან მომწონს. იმედია, კიდევ უფრო მოუმატებს და უკეთესად ათამაშდება, რადგან ამის პოტენციალი ნამდვილად აქვს.
იტალიური
იტალიური ფეხბურთი ისევ სქემების ტყვეობაშია. მწვრთნელები ათასგვარ სტრატეგიას ხაზავენ თავში და შემდეგ ამ ნახაზების მიხედვით, ფეხბურთელებს ჩარჩოებში აქცევენ. დისციპლინა საჭიროა და მეტიც, აუცილებელია, მაგრამ ევროპაში და კერძოდ, იტალიაში ეს გადამეტებულად იციან - სწორედ ამიტომ მიყვარს სამხრეთამერიკული ფეხბურთი.
მახსოვს, "პარმაში" გადასვლასთან ახლოს ვიყავი, მაგრამ ბოლო მომენტში ტრანსფერი კარლო ანჩელოტიმ დაბლოკა - ის გუნდის მწვრთნელი იყო და განაცხადა, რომ 4-4-2 სქემაში რობერტო ბაჯო ვერაფრით დაინახა.
ყველაზე უხერხული მეტოქე
თუ ფეხბურთელს გულისხმობთ, უდაოდ პაოლო მალდინი. უნიკალური ფეხბურთელი იყო, რომელსაც უბრალოდ არ ჰქონდა სუსტი მხარე. 15 მცველი უნდა შეაერთო, რომ ერთი მალდინი მიიღო. პაოლოს მასშტაბის მცველები 50 წელიწადში ერთხელ იბადებიან. პირადად მე, ყველაზე მეტად მის წინააღმდეგ მიჭირდა თამაში.
გულშემატკივრები
რომელ გუნდს ჰყავს საუკეთესო გულშემატკივრები? - "ბოკა ხუნიორსის" თამაშებზე სტადიონზე წარმოუდგენელი ატმოსფეროა - ეს ადამიანები აღმართებენ გუნდს და გუნდის თითოეულ ფეხბურთელს.
პირადად მე, განსაკუთრებულად მახსენდება ფლორენციელი გულშემატკივრები - როდესაც "ფიორენტინაში" ვთამაშობდი, ისინი ჩემ მიმართ უდიდეს სითბოს გამოხატავდნენ - მძიმე ტრავმა მქონდა, დიდი ხანი ჩამოვშორდი ფეხბურთს და ისინი ერთი წუთითაც არ მომშორებიან - მუდმივად გვერდით მედგნენ და სულ იმას მიმეორებდნენ, რომ ჩემთვის უსასრულოდ შეეძლოთ დალოდება.
როდესაც "იუვენტუსში" გადავედი, "ფიორენტინას" ქომაგები ვითარებაში კარგად გაერკვნენ - მათ იცოდნენ, რომ ჩემი გაყიდვა კლუბის მესვეურებმა გადაწყვიტეს, რადგან მათ 25 მილიონი ლირის აღება სურდათ - მათ პირდაპირ მითხრეს, რომ ეს ფული კლუბისთვის სასიცოცხლოდ მნიშვნელოვანი იყო; ამიტომ ფლორენციაში ყოველთვის თბილად მხვდებოდნენ.
ფედერიკო ბერნარდესკი
ბერნარდესკი "ფიორენტინადან" "იუვენტუსში" გადავიდა და ჩემთან გაავლეს პარალელები. ფედერიკოს დიდი წარმატება მინდა ვუსურვო, რადგან ნიჭიერი და პერსპექტიული ფეხბურთელია. მთავარია, ნაკლებად იფიქროს დიდებაზე და ბევრი იშრომოს. ბერნარდესკის რამდენიმე თამაში მაქვს ნანახი და ვფიქრობ, რომ მას კიდევ შეუძლია მომატება.
მილანი
"მილანი" სატრანსფერო ბაზარზე ბევრ ფულს ხარჯავს და იმედია, "იუვენტუსს" ღირსეულ კონკურენციას გაუწევს. იტალიურ ფეხბურთს სკუდეტოსთვის ბრძოლა სჭირდება. რადგან არ შეიძლება ჩემპიონატს მუდმივად ერთი გუნდი იგებდეს. მე არ მყავს ფავორიტი გუნდი იტალიაში - ჩემი სურვილია, რომ სერია A უფრო ძლიერი და კონკურენტუნარიანი იყოს.
ყოველდღიური სპორტული გაზეთი "ლელო"
