"გოლდენ სტეიტმა" "კლივლენდს" მისსავე მოედანზე მოუგო, ფაჩულია სკამზე დარჩა [VIDEO]

16 იანვარს ზაზა ფაჩულიას "გოლდენ სტეიტი" "კლივლენდ კავალიერსს" შეხვდა და მისსავე მოედანზე 118:108 დაამარცხა.

აღსანიშნავია, რომ "უორიორსის" მთავარმა მწვრთნელმა სტივ კერიმ "კავალიერსთან", წინა მატჩის მსგავსად, სასტარტოში დაბალი ხუთეული დააყენა. ზაზა ფაჩულიას ადგილი სასტარტოში ჯორდან ბელმა დაიკავა, თუმცა ქართველი ცენტრი მოედანზე საერთოდ არ გამოუყვანიათ.

32-32 ქულა ლებრონ ჯეიმსმა და კევინ დურანტმა მიითვალეს, სტეფ კარიმ 23 ქულა დააგროვა, 19 და 17 ქულა, შესაბამისად, აიზია ტომასმა და კევინ ლავმა ჩააგდეს, კლეი ტომპსონმა კი გუნდს 17 ქულა შეაშველა.

ერთადერთი ორმაგი დუბლი დრეიმონდ გრინმა გაიფორმა, რომელმაც 11 ქულა და 16 მოხსნა მოაგროვა. 1 პასიც და გრინი სამმაგ დუბლს ჩაიწერდა აქტივში.

ამ გამარჯვების შემდეგ "გოლდენ სტეიტი" დასავლეთ კონფერენციაში უახლოეს მდევარ "ჰიუსტონს" 6 მოგებით უსწრებს.

მომდევნო მატჩს ზაზა ფაჩულიას გუნდი 18 იანვარს, სტუმრად "ჩიკაგოსთან", ჩვენი დროით 05:00 საათზე გამართავს.

დღის სხვა მატჩები ასე დასრულდა:

კლიპერსი-ჰიუსტონი 113:102
იუტა-ინდიანა 94:109
ოკლაჰომა-საკრამენტო 95:88
მემფისი-ლეიკერსი 123:114
ჩიკაგო-მაიამი 119:111
ატლანტა-სან ანტონიო 102:99
ბრუკლინი-ნიუ იორკი 104:119