სუპერთასი - "ენისეის" "შავი ლომის" ლიდერები შეუტევენ

რაგბი ევროპის სუპერ თასის მეექვსე ტურში, "შავ ლომს" ტრავმირებული ლიდერები უბრუნდებიან.

ჩვენი გუნდი 11 დეკემბერს "ავჭალაზ"“, კრასნოიარსკის "ენისეი-სტმ"-ის 17:00 საათზე დაუხვდება. სამ-სამი თამაშის შემდეგ (ორივე გუნდს ორ-ორი გადადებული შეხვედრა აქვს) მათ 11-11 ქულა აქვთ და აღმოსავლეთ კონფერენციაში პირველ-მეორე ადგილებს იყოფენ. შესაბამისად, წყვილში გამარჯვებული ერთპიროვნულად გალიდერდება და ნახევარფინალისკენ დიდ ნაბიჯს გადადგამს.

განვლილი შეხვედრის შემდეგ, "შავი ლომის" სასტარტო შემადგენლობაში 5 ცვლილებაა. ცენტრში ბრუნდება გუნდის კაპიტანი მერაბ შარიქაძე და ის დემე თაფლაძეს შეუწყვილდება. ერთ ფრთაზე ადგილი შეინარჩუნა სანდრო თოდუამ, მეორე ფრთაზე კი აკა ტაბუცაძე ბრუნდება. უცვლელია ღერძი - თენგიზ პერანიძე და გიორგი ბაბუნაშვილი, ხოლო ფულბეკი კვლავ ლაშა ხმალაძეა.

შერკინების პირველ ხაზში ბრუნდებიან კვაჭი შალვა მამუკაშვილი და მარჯვენა ბურჯი ნიკოლოზ პატარაია, მარცხენა ბურჯი კი ნიკა ხატიაშვილია. უცვლელია მეორე ხაზი - ნოდარ ჭეიშვილი და ლაშა ჯაიანი. მესამე ხაზში ბრუნდება ნიკო აფციაური, ხოლო სანდრო მამამთავრიშვილმა და ლუკა ივანიშვილმა ძირითადში ადგილი შეინარჩუნეს.

გუნდის მთავარი მწვრთნელი ლევან მაისაშვილი მიიჩნევს, რომ ლიდერების დაბრუნება თამაშის ხარისხზეც აისახება:

"ამ მორაგბეებმა წინა თამაში ტრავმებისა და მცირე პრობლემების გამო გამოტოვეს. ისინი ჩვენთვის დიდ ძალას წარმოადგენენ, მით უმეტეს იმის ფონზე, რომ გუნდი ახალი შეკრებილია და ლიდერად ჩამოყალიბებას დრო სჭირდება. ამ კუთხით შარიქაძე და მამუკაშვილი აშკარა ლიდერები არიან, მნიშვნელოვანი ძალაა ტაბუცაძე და აფციაური, ასევე პატარაია. სასიამოვნოა, რომ ისინი გვიბრუნდებიან და ამით თამაშის ხარისხიც უკეთესი იქნება.