ქართველმა მოცურავემ, თეიმურაზ კობახიძემ ოლიმპიადის ლიცენზია მოიპოვა!

20 აპრილს ბელორუსის ქალაქ ბრესტიდან სასიამოვნო ინფორმაცია მივიღეთ - ქართველმა მოცურავემ, საქართველოს მრავალგზის ჩემპიონმა, საერთაშორისო ტურნირების არაერთგზის გამარჯვებულმა და პრიზიორმა თეიმურაზ კობახიძემ ამ ქვეყნის ღია პირველობაზე, რომელიც სალიცენზიო ტურნირიცაა, 200 მეტრი თავისუფალი ყაიდით წუთსა და 51,45 წამში დაფარა, რაც სალიცენზიო დროზე 0,30 წამით უკეთესი აღმოჩნდა და რიოს საგზური მოიპოვა.

ასპარეზობის პირველი დღის დილის საკვალიფიკაციო გაცურვაში თეიმურაზ კობახიძე 28 მონაწილეს შორის მეორე (1:52.98) იყო. ფინალში მან საგრძნობლად გააუმჯობესა (1:51.45) საკუთარი დილის შედეგი, საქართველოს რეკორდი (1:51.84) და ტურნირის ვერცხლის მედალთან ერთად, როგორც აღვნიშნეთ, რიოს ოლიმპიადის ლიცენზიაც (1:51.75) დაისაკუთრა, რაც საქართველოსთვის 28-ე ლიცენზიაა რიოს ოლიმპიადაზე.

დამოუკიდებელი საქართველოს ისტორიაში თეიმურაზ კობახიძე მეორე მოცურავეა, რომელმაც ოლიმპიური თამაშების სალიცენზიო დრო შეასრულა.

ირაკლი ბოლქვაძემ საკვალიფიკაციო ეტაპზე 100 მეტრი ბრასით 1:04.59 წამში გაცურა და მე-5 ადგილი დაიკავა. ამავე დისტანციაზე ლევან ბახტურიძემ პირადი საუკეთესო შედეგი 2 წამით გააუმჯობესა (1:06.34) (684 ქულა) და ამ დისტანციაზე სპორტის ოსტატობის ნორმატივი პირველად შეასრულა.

დანარჩენი შედეგები: 100 მ თავისუფალი ყაიდა. გიორგი ბიგანიშვილი (52,80), ელენე ბერაია (1:02.54), 100 მ ბატერფლაი. აკაკი ვაშაკიძე (57,25), 50 მ გულაღმა ცურვა. აკაკი ვაშაკიძე (28,20), 50 მ ბრასი. მერი მუმლაძე (35,07), რუსუდან გოგინაშვილი (36,74), 100 მ გულაღმა ცურვა. რუსუდან გოგინაშვილი (1.11,40).

ჯუდერ ბიჭიკაშვილმა 100 მეტრი თავისუფალი ყაიდით 55.91 წამში დაფარა. შეგახსენებთ, რომ 2 კვირის წინ იგი ავტოავარიაში მოყვა და შეჯიბრებისთვის სათანადოდ მომზადება ვერ მოასწრო.

საასპარეზოდ არ გასულა ირაკლი კვარაცხელია, რომელიც ფილტვების ანთების დიაგნოზით ბრესტის საავადმყოფოში გადაიყვანეს.

(იბეჭდება მცირე ცვლილებით)
ყოველდღიური სპორტული გაზეთი "ლელო"