შვეიცარიის ქალაქ ციურიხში "ბრილიანტის ლიგის" დასკვნითი ეტაპის პირველი ნაწილი გაიმართა და 17 დისციპლინაში შევიტყვეთ ლაურეატთა ვინაობა.ყველაზე დიდი სენსაცია მამაკაცებს შორის 800 მეტრზე მოხდა. აქ ცოტა ვინმეს თუ ეპარებოდა ეჭვი, რომ ბრილიანტის მფლობელი ლონდონის ოლიმპიადის გამარჯვებული და მსოფლიოს რეკორდის მფლობელი დავიდ რუდიშა გახდებოდა. მაგრამ სეზონის ლიდერი დამარცხდა 18 წლის პერსპექტიულ ეთიოპიელთან მოჰამედ ამანთან.
კენიელი დამაჯერებლად ლიდერობდა 500 მეტრის შემდეგ, მაგრამ ამანმა ფანტასტიკური ტემპი აკრიფა, მოსახვევში დაეწია რუდიშას და საფინიშო სწორ მონაკვეთზე გაექცა კონკურენტს, თან ეროვნული რეკორდიც დაამყარა - 1.42,53.
საერთო
ციურიხში წვიმიანი ამინდის მიუხედავად, მაღალი შედეგები იქნა ნაჩვენები სპრინტერულ დისციპლინებში. ქალთა 100 მეტრზე თავი გამოიჩინა ორგზის ოლიმპიურმა ჩემპიონმა შელი-ენ ფრეზერ-პრაისმა, რომელმაც 10,83 წამი აჩვენა.
ამით მან, შეიძლება ითქვას, ცხვირწინ ააცალა ბრილიანტი კარმელიტა ჯეტერს. ამ უკანასკნელს უნიკალური შედეგის მიღწევის შანსი ჰქონდა - შეეძლო ზედიზედ მეოთხედ მოეგო ეს კომერციული სერია (შარშან ის 100 და 200 მეტრზე ჩათვლაში იყო უძლიერესი).
მამაკაცთა 100 მეტრი არ შედიოდა ბრილიანტის ლიგის ჩათვლაში, მაგრამ ორგანიზატორებმა მაინც შეძლეს ტაისონ გაისა და იოჰან ბლეიკის მიწვევა. თუმცა მათ შორის ბრძოლა არ ყოფილა, რადგან ამერიკელმა ფალსტარტის გამო ტრავმა მიიღო, ბლეიკმა კი ყოველგვარი კონკურენციის გარეშე, ტურნირის რეკორდი დაამყარა - 9,76.
ასეთივე რეკორდის ავტორი გახდა უსაინ ბოლტი, ოღონდ 200 მეტრ დისტანციაზე - 19,66 წამი. თუმცა ამ დისციპლინაში ბრილიანტი მის თანამემამულეს ნიკელ ეშმიდს ერგო, რომელმაც ციურიხში პირადი რეკორდი დაამყარა.
ბოლტი წელს მხოლოდ ორ ეტაპზე გამოვიდა, ეშმიდი კი ხშირად ჩნდებოდა ბრილიანტის ლიგის სტარტებზე და ამის გამო მოიგო საერთო ჩათვლა.
ასევე სტაბილურად გამოდიოდა ეტაპებზე ამანტლ მონტშო, რომელმაც ბრილიანტი აიღო 400 მეტრზე ქალებს შორის. ციურიხში ეს დისტანცია სანია რიჩარდსმა მოიგო, მაგრამ ის ოთხი ქულით ჩამორჩა ბოტსვანელს.
100 მეტრზე თარჯრბენში საერთო ჩათვლის ლიდერი, ოლიმპიური ჩემპიონი სალი პირსონი იძულებული გახდა, ვადაზე ადრე დაესრულებინა სეზონი ტრავმის გამო, ამიტომაც ის ჩამოშორდა ბრილიანტისთვის ბრძოლას.
მისი ადგილი ამერიკელმა დოუნ ჰარპერმა დაიკავა. ასევე არ ჩავიდა ციურიხში ორგზის ოლიმპიური ჩემპიონი მო ფარა, რითაც 5000 მეტრზე ბრილიანტი ისაია კოეჩს გადაულოცა.
სანდრა პერკოვიჩს, კრისტიან ტეილორს, რენო ლავილენიეს და ხავიერ კარსონს უბრალოდ ბოლო ეტაპზე გამოსვლა სჭირდებოდათ "ბრილიანტის ლიგაზე" საბოლოო გამარჯვების გასაფორმებლად, რაც გააკეთეს კიდეც.
ერთი კვირის შემდეგ, ბრიუსელში ბოლო ეტაპის მეორე ნაწილი გაიმართება და ბრილიანტის მფლობელი კიდევ 15 სპორტსმენი გამოვლინდება.
ლაურეატები
მამაკაცები
200 მ - ნიკელ ეშმიდი (იამაიკა)
800 მ - მოჰამედ ამანი (ეთიოპია)
5000 მ - ისაია კოეჩი (კენია)
400 მ/თარჯრბენი - ხავიერ კალსონი (პ-რიკო)
სიგრძე - კრისტიან ტეილორი (აშშ)
სიმაღლე - რობერტ გრაბარზი (ბრიტანეთი)
ჭოკი - რენო ლავილენიე (საფრანგეთი)
ბირთვი - რიზ ჰოფი (აშშ)
შუბი - ვიტეჟსლავ ვესელი (ჩეხეთი)
ქალები
100 მ - შელი-ენ ფრეზერ-პრაისი (იამაიკა)
400 მ - ამანტლ მონტშო (ბოტსვანა)
1500 მ - აბება არეგავი (ეთიოპია)
100 მ/თარჯრბენი - დოუნ ჰარპერი (აშშ)
სტიპლჩეზი - მილკა ჩეივა (კენია)
სიგრძე - ელენა სოკოლოვა (რუსეთი)
ბირთვი - ვალერი ადამსი (ზელანდია)
ბადრო - სანდრა პერკოვიჩი (ხორვატია)
ყოველდღიური სპორტული გაზეთი "ლელო"
