მეორე დღე მედლის გარეშე - მარგველაშვილი ბრინჯაოსთვის ბრძოლაში დამარცხდა

2022 წლის მსოფლიო ჩემპიონატის მეორე საშეჯიბრო დღე საქართველოს ნაკრებისთვის კვლავ უმედლოდ დასრულდა.

დღეს, 7 სექტემბერს, -66კგ წონით კატეგორიაში ვაჟა მარგველაშვილმა იასპარეზა, ქართველი ძიუდოისტი ბრინჯაოს მედლისთვის ბრძოლაში მოლდოველ დენის ვიერუსთან ვაზარით დამარცხდა.

მარგველაშვილი შეჯიბრში მეორე წრიდან ჩაერთო და მაროკოელი აბდერაჰმანე ბუშიტა იპონით დაამარცხა, მესამე წრეში უკრაინელ კარო მარანდარიანს დამატებით დროში სძლია, მეოთხედფინალში კი იაპონელ იოშირო მარუიამასთან იპონით დამარცხდა.

ვაჟამ რეპეშაჟში გაფრთხილებების ხარჯზე, ისრაელელ ბარუხ შმაილოვს აჯობა, ბრინჯაოსთვის გადამწყვეტ ბრძოლაში კი დენის ვიერუსთან დამარცხდა.

ხვალ, 8 ოქტომბერს, ტაშკენტში მიმდინარე მსოფლიო ჩემპიონატზე 2 ქართველი იასპარეზებს, -73კგ წონით კატეგორიაში ტატამზე დამოუკიდებელი საქართველოს ისტორიაში საუკეთესო ძიუდოისტი, ოლიმპიური, მსოფლიოსა და ევროპის ჩემპიონი ლაშა შავდათუაშვილი წარსდგება, ხოლო ქალთა შორის მედლისთვის -57კგ კატეგორიაში ეთერ ლიპარტელიანი იბრძოლებს.