<p>ბოლნისური გუნდის ახალი მთავარი მწვრთნელი მუშაობას დიდი ენთუზიაზმით იწყებს <br> ბოლნისის "სიონის" მთავარი მწვრთნელის პოსტი <strong>ხვიჩა ქასრაშვილმა</strong> დატოვა. გამოთავისუფლებულ თანამდებობაზე დანიშვნის ერთ-ერთი ყველაზე რეალური კანდიდატი <strong>არმაზ ჯელაძე</strong> იყო და ეს მოლოდინი გამართლდა - იგი ბოლნისელთა ახალი თავკაცია.</p><p>სამწვრთნელო კარიერა ჯელაძემ ამბროლაურის "რაჭაში" დაიწყო, რასაც რუსთავის "მეტალურგში" გატარებული წლები მოჰყვა, სადაც უმეტესად, მთავარი მწვრთნელის ასისტენტად მუშაობდა, ბოლო პერიოდში კი "მეტალურგის" დუბლშემადგენლობას წვრთნიდა. იგი სამწვრთნელო A კატეგორიის ლიცენზიის მფლობელია.</p><p>ჯელაძე ახალ პოსტზე მუშაობას დიდი ენთუზიაზმით იწყებს და იმედოვნებს, რომ მისი ეს ნაბიჯი გამართლებული აღმოჩნდება.</p><p>"ლელო" "სიონის" ახალ მთავარ მწვრთნელთან ინტერვიუს გთავაზობთ.</p><p><strong>- უპირველესად, "სიონის" თავკაცად დანიშვნას გილოცავთ. მოულოდნელი იყო თქვენთვის ეს შეთავაზება?</strong></p><p>- მადლობა მოლოცვისთვის. ნამდვილად მოულოდნელი იყო, როცა "სიონიდან" დამიკავშირდნენ და გუნდის მთავარი მწვრთნელობა შემომთავაზეს. გადაწყვეტილების მიღებამდე დიდხანს არ მიფიქრია.</p><p>ჩემთვის "სიონში" მუშაობა უდავოდ წინგადადგმული ნაბიჯია, დიდი პატივი და გამოწვევაა და შევეცდები, ჩემი შრომით ბოლნისელი გულშემატკივრები გავახარო და მათი პატივისცემა დავიმსახურო.</p><p>კლუბის ხელმძღვანელობას კი ასეთი ნდობისთვის დიდ მადლობას ვუხდი.</p><p><strong>- როგორ კონდიციებში დაგხვდათ გუნდი და რისი გაკეთება მიგაჩნიათ საჭირო წარმატებისთვის?</strong></p><p>- აუცილებლად უნდა აღვნიშნო ჩემი წინამორბედის, ხვიჩა ქასრაშვილის ღვაწლი - მან კარგად მომზადებული გუნდი დამახვედრა. დანარჩენი კი უკვე ჩემზე, მთლიან სამწვრთნელო შტაბსა და ფეხბურთელებზეა დამოკიდებული - ყველაფერს ვიღონებთ იმისთვის, რომ სეზონი მაღალ დონეზე ჩავატაროთ.</p><p><strong>- როგორია თქვენი სამწვრთნელო გემოვნება?</strong></p><p>- გუნდს ყოველი მატჩისთვის დავალებებს იმის მიხედვით მივცემ, თუ როგორ მეტოქესთან გვექნება საქმე. ზოგადად კი, შემტევი და კომბინაციური ფეხბურთის მიმდევარი ვარ და მიმაჩნია, რომ ქართველებს წარმატებას სწორედ ამ სტილში თამაში მოგვიტანს.</p><p><strong>- "სიონში" ბევრი გამოცდილი ფეხბურთელი თამაშობს, რომლებთანაც საერთო ენის გამონახვა, ალბათ, არ უნდა გაგიჭირდეთ...</strong></p><p>- დიახ, ისინი, ფაქტობრივად, ჩემი თაობის წარმომადგენლები არიან და მათი თანადგომის დიდი იმედი მაქვს. "სიონის" ყველა ფეხბურთელმა თბილად მიმიღო. ყველას კარგად გვესმის, რომ წარმატების მისაღწევად პროფესიონალიზმი და დისციპლინა აუცილებელია.</p><p>მომავალს ოპტიმისტურად ვუყურებთ. ნამდვილად გვაქვს ის რესურსი, რაც კარგი შედეგების მიღწევისთვის არის აუცილებელი.</p><p><strong>- კლუბის ხელმძღვანელობამ კონკრეტული მიზანი თუ დაგისახათ?</strong></p><p>- ამ სეზონში ჩვენი პროგრამა-მინიმუმი უმაღლეს ლიგაში ადგილის შენარჩუნებაა, თუმცა იმის პოტენციალიც გვაქვს, რომ ჩემპიონატის ექვს საუკეთესო გუნდში მოსახვედრად ვიბრძოლოთ.</p><p><strong>- უახლოეს დღეებში "სიონის" შემადგენლობაში მნიშვნელოვან ცვლილებებს ხომ არ უნდა ველოდოთ?</strong></p><p>- შემადგენლობის კარდინალური გადახალისება ნამდვილად არ იგეგმება, მაგრამ თუ უახლოეს პერიოდში საინტერესო ფეხბურთელების დამატების საშუალება მოგვეცა, მათზე უარს ნამდვილად არ ვიტყვით.</p><p><em>(იბეჭდება მცირე ცვლილებით)</em></p><p><strong>ყოველდღიური სპორტული გაზეთი "ლელო"</strong></p>
ფანცულაია გოლებს აგროვებს; "სამგურალმა", "გარეჯმა" და "თელავმა" გაიმარჯვეს
ლიდერი ისევ "დილაა"; "ტორპედომ" კი იბერიელებს აჯობა
"გაგრას" ლიუბენოვიჩი ჩაუდგა სათავეში
საქართველო - მოლდოვა | ქალთა ნაკრებმა მატჩისწინა ვარჯიში გამართა
მესიმ "ინტერ მაიამისთან" კონტრაქტი გაახანგრძლივა
"შავი ლომი" | დავით აბდუშელიშვილი - თანაგუნდელების დახმარების გარეშე ეს შეუძლებელი იქნებოდა
2 წელზე მეტი გავიდა - პოგბა მოედანზე დაბრუნებასთან ახლოსაა
მძიმე ტრავმის შემდეგ ჯამალ მუსიალამ ვარჯიში დაიწყო
ყველაზე ახალგაზრდა ფეხბურთელი და რეკორდი - კეინმა კარლს წარმატება მიულოცა
საიუბილეო მე-300 მატჩი და მე-4 საუკეთესო შედეგი - კურტუა ბრწყინვალე ასპარეზობას განაგრძობს
ტერ შტეგენს მუნდიალზე თამაში უნდა - გერმანელი სავარაუდოდ, ზაფხულში "ბარსელონადან" წავა
[VIDEO] ლეგენდარული ჩემბერლენის შემდეგ პირველი - "ფილას" ახალწვეულის ისტორიული მატჩი და დამარცხებული "ბოსტონი"
ცნობილი კამერუნელი გოლეადორი კარიერას აზერბაიჯანის ჩემპიონატში განაგრძობს
[VIDEO] სასიამოვნო კადრები - როგორ შეხვდნენ ერთმანეთს მიქაუტაძე და შერკი "ვილიარეალი" სიტის" მატჩამდე
[VIDEOS] მამუკელაშვილის წარმატებული დებიუტი - ბითაძეს ორმაგ დუბლამდე ცოტა დააკლდა
"ბარსელონამ" შეიძლება ტერ შტეგენი სხვა კლუბში გაუშვას
"ბორჯღალოსნები" | ნოემბერში ინგლისელი, ზელანდიელი და ირლანდიელი გვიმსაჯებს
ფანცულაია გოლებს აგროვებს; "სამგურალმა", "გარეჯმა" და "თელავმა" გაიმარჯვეს
"სპორტინგმა" ქოჩორაშვილის გარეშე მოიგო - "რეალმა" "იუვენტუსი" ბელინგემის გოლით დაამარცხა
გამარჯვება ოთხი წაგების შემდეგ - მამარდაშვილის "ლივერპულმა" "აინტრახტი" დაჯაბნა
ოსიმენის დუბლი - "გალათასარაიმ" და "ატლეტიკმა" გაიმარჯვეს
მამარდაშვილი "აინტრახტთან" სასტარტოშია, ქოჩორაშვილი "მარსელთან" სათადარიგოა
თბილისის "დინამოს" ახალგაზრდულმა გუნდმა ჩემპიონთა ლიგაზე ისევ გაიმარჯვა