<p>ქუთაისური კლუბის აღმასრულებელი დირექტორი გოგა პაპიაშვილი: ეს არის მზარდი გუნდი, რომელიც შედეგს ეტაპობრივად მიაღწევს <br> ახალგაზრდა ფეხბურთელებით დაკომპლექტებული "ტორპედო" ჩემპიონატის ერთ-ერთი ლიდერია. ქუთაისური გუნდი დინამიკურ და სანახაობრივ ფეხბურთს თამაშობს.</p><p>თუ სამიოდე თვის წინათ "ტორპედოს" მიმართ ყველა სკეპტიკურად იყო განწყობილი, ახლა ის მომავლის გუნდად მიიჩნევა...</p><p>რა მიზნები აქვს ქუთაისური კლუბის ხელმძღვანელობას და როგორ აპირებენ გუნდის განვითარებას?</p><p>ამის თაობაზე კლუბის აღმასრულებელი დირექტორი <strong>გოგა პაპიაშვილი</strong> გვესაუბრება.</p><p><strong>- თავდაპირველად, მიმდინარე ჩემპიონატში "ტორპედოს" გამოსვლა შევაფასოთ. გაახალგაზრდავებული გუნდისგან ასეთ სტარტს არავინ ელოდა და, ალბათ, კლუბის ხელმძღვანელობასაც არ აქვს უკმაყოფილების საბაბი...</strong></p><p>- გეხსომებათ, ჩვენ მიერ განხორციელებულმა პროექტმა პირველ ეტაპზე დიდი პროტესტი და ვნებათაღელვა გამოიწვია. ვიცით, რომ ეს იყო არაპოპულარული გადაწყვეტილება და ის პროტესტიც, რაც გუნდის რეორგანიზაციას მოჰყვა, ლოგიკური იყო. მაგრამ მიგვაჩნია, რომ სწორედ ეს არის ის გზა, რომელმაც ქართული ფეხბურთი უნდა გააძლიეროს.</p><p>ჩვენი მდგომარეობიდან გამომდინარე, ყველაზე კარგი გამოსავალი ახალგაზრდა ფეხბურთელებზე დაყრდნობა და მათი განვითარებაა. სამი წლის განმავლობაში, რაც "ტორპედოში" ვმუშაობ, ძალიან ბევრი კარგი ფეხბურთელი გავიცანი და მათ შორის მეგობრებიც შევიძინე, მაგრამ ფაქტია - ქართულ ფეხბურთს "სისხლის გადასხმა" სჭირდება. ახალი სახეები თუ არ გამოჩნდნენ და მათ შანსი არ მიეცათ, შორს ვერ წავალთ.</p><p>ვიცი, რომ ჩვენს გულშემატკივარს მომენტალური შედეგი ურჩევნია ლოდინს, მაგრამ ჩვენთვის მთავარი - სტაბილური, ახალგაზრდა გუნდის ჩამოყალიბებაა, რომელსაც ძლიერი ბირთვი და დასაყრდენი ეყოლება.</p><p><strong>- გულშემატკივართა ერთი ნაწილი დღესაც მიიჩნევს, რომ "ტორპედოს" მფლობელებმა ეს ნაბიჯი იმისთვის გადადგეს, რომ ახალგაზრდა ფეხბურთელებით ევაჭრათ...</strong></p><p>- იმასაც ამბობდნენ, "ვისოლი" კლუბიდან მიდისო... მოკლედ, ტყუილ-მართალი ერთმანეთში აირია. რეალურად კი, ჩვენი მიზანი გუნდის გაახალგაზრდავება და განვითარება იყო.</p><p>არ მინდა, ვინმემ იფიქროს - რადგანაც გუნდი წარმატებით თამაშობს, ასე ხმამაღლა ამიტომაც ვლაპარაკობ. მე თავიდანვე მქონდა ამ ბიჭების იმედი და დარწმუნებული ვიყავი, რომ სირთულეები მალე დაიძლეოდა. ახალგაზრდებზე აქცენტი იმის გამო არ გაგვიკეთებია, რომ ვინმე გავყიდოთ და ამით ფული ვიშოვოთ. ჩვენი მიზანია, რომ ახალგაზრდებს სათამაშო პრაქტიკა ჰქონდეთ, ფეხბურთი ითამაშონ, თავიანთი შესაძლებლობები დაამტკიცონ და როცა ჩვენს ჩემპიონატში ამოწურავენ საკუთარ თავს, მერე ჩვენ თავად დავეხმარებით, რომ უკეთეს ლიგასა და კლუბში გააგრძელონ კარიერა.</p><p>"ტორპედოს" ფეხბურთელების 95%-ს კლუბთან სამწლიანი კონტრაქტი აკავშირებს. ეს არის ის პერიოდი, რომლის განმავლობაშიც მათ უნდა დაამტკიცონ, თუ რა სიმაღლეზე შეუძლიათ თამაში...</p><p>სხვათა შორის, ამას წინათ საქართველოში იმყოფებოდა "ორჰუსის" სპორტული დირექტორი, დანიის ნაკრების ყოფილი ნახევარმცველი ბრაიან სტეენ ნილსენი, რომელიც ჩვენი გუნდის ვარჯიშს დაესწრო. ეს სულაც არ ნიშნავს, რომ ნილსენი ხვალვე დანიაში რომელიმე ჩვენს ფეხბურთელს წაიყვანს. "ორჰუსთან" თანამშრომლური ურთიერთობები გვაქვს, რაც სამომავლოდ კონკრეტულ საქმეებში აისახება.</p><p><strong>- 8 ტურის შემდეგ "ტორპედო" მეორე პოზიციაზეა და ლიდერ "დინამოს" მხოლოდ ერთი ქულით ჩამორჩება. მართალია, ჯერ ნაადრევია ამაზე ლაპარაკი, მაგრამ სტარტიდან გამომდინარე, ქუთათურებს საჩემპიონო მარათონში ჩაბმის რეალური შესაძლებლობა აქვთ. უმაღლესი მიზნის მისაღწევად გუნდის გაძლიერებას ხომ არ გეგმავთ?</strong></p><p>- მადლობა მინდა გადავუხადო "ტორპედოს" მთავარ მწვრთნელ ჟერარდ სარაგოსას და მთლიანად გუნდის სამწვრთნელო შტაბს, რომლებმაც დიდი სამუშაო ჩაატარეს და გაახალგაზრდავებული "ტორპედო" ყველასთვის ანგარიშგასაწევ ძალად აქციეს.</p><p>ყოველდღიურად ვხედავ, თუ როგორ შრომატევად სამუშაოს ასრულებენ ვარჯიშებზეც და მის შემდეგაც. მატჩის წინ კი მეტოქეზე დაწვრილებით აგროვებენ ინფორმაციას, ერთი შეხედვით - უმნიშვნელოსაც კი, მოწინააღმდეგეს ბოლომდე სწავლობენ და გუნდს მათ სისუსტეებს აცნობენ. მოხარული ვარ, რომ "ტორპედოში" ასეთი პროფესიონალები გვყავს.</p><p>"ტორპედოს" ხელმძღვანელობა მწვრთნელების კომპეტენციაში არასდროს ერეოდა და ახლაც სარაგოსას მოქმედებისთვის სრული თავისუფლება აქვს მინიჭებული. თუ ის ჩათვლის, რომ გუნდს ახალი ფეხბურთელები სჭირდება, განვიხილავთ ამ საკითხს და გადაწყვეტილებასაც მივიღებთ.</p><p>არ დავმალავ და, "ტორპედოს" კარგი სტარტი ჩვენთვისაც სიურპრიზი იყო. მიმაჩნია, რომ ეს არის მზარდი გუნდი, რომელიც შედეგს ეტაპობრივად მიაღწევს. სეზონის წინ მწვრთნელებისთვის კონკრეტული მოთხოვნები არ წაგვიყენებია, თუმცა ასეთ სასიამოვნო სიურპრიზებზე, რა თქმა უნდა, უარს არ ვიტყვით.</p><p><strong>- ერთი თვის წინათ "ტორპედოში" ორი ბრაზილიელი ფეხბურთელი ვარჯიშობდა. რას გვეტყვით მათთან დაკავშირებით? ლეგიონერებით გაძლიერებას ხომ არ გეგმავთ?</strong></p><p>- ორი ბრაზილიელი ფეხბურთელი იყო ჩამოსული, გუნდთან ერთად ივარჯიშეს, მაგრამ უკანვე გაბრუნდნენ. როცა უცხოელს იწვევ, ის ორი თავით მაინც უნდა სჯობდეს ადგილობრივ ფეხბურთელს. თუ თანაბარი დონისანი არიან, მაშინ სჯობს, ისევ აქაურს ჰქონდეს თავის გამოჩენის შანსი. ჩვენ გვყავს ძალიან კარგი სპორტული დირექტორი გუგა კაჭახიძე, რომელიც აქტიურადაა ჩართული სელექციის საკითხებში.</p><p><strong>- დღევანდელი გუნდის ლიდერად ვინ მიგაჩნიათ?</strong></p><p>- ჩემის აზრით, ლიდერი მთლიანად გუნდია! ჩვენი წარმატება გუნდურ თამაშშია, ჟერარდ სარაგოსას მიერ გაკეთებული ტაქტიკური მონახაზები არ გვაძლევს რომელიმე ფეხბურთელის გამორჩევის საშუალებას, ყველა მონდომებულია, რომ კარგად ითამაშოს და გუნდს წარმატება მოუტანოს. თითოეული გამარჯვება თითოეული ფეხბურთელის დამსახურებაა.</p><p><strong>- "ტორპედოს" ხელმძღვანელობამ ინფრასტრუქტურის გასავითარებლად დიდი სამუშაო გასწია. ამ მხრივ კიდევ ხომ არ არის სიახლეები?</strong></p><p>- ულტრათანამედროვე დონეზე კეთდება "ტორპედოს" ბაზაზე არსებული სამზარეულო. 1-ელ ნოემბერს იგეგმება გახსნა და ყველა იხილავს, თუ როგორ პირობებში იმყოფება ჩვენი გუნდი... ამჟამად მიმდინარეობს მოლაპარაკებები ზამთრის შეკრებასთან დაკავშირებით.</p><p>სავარაუდოდ, გუნდი კვიპროსში მოემზადება, თუმცა გვაქვს სხვა ვარიანტებიც და სადაც უკეთესი სპარინგ-პარტნიორები გვეყოლება, იქ გავემგზავრებით...</p><p>ბოლოს, მინდა ვისარგებლო შემთხვევით და წარმატებები ვუსურვო ჩვენს ახალგაზრდა ფეხბურთელს ვაჟა ტაბატაძეს, რომელიც მალე ჯვარედინი იოგების ოპერაციას გაიკეთებს. ამ საქმეში დიდი დახმარება გაგვიწიეს შოთა და არჩილ არველაძეებმა, მათი რჩევითა და შუამდგომლობით ტაბატაძეს ოპერაციას სტამბულში გავუკეთებთ.</p><p>იმედია, რეაბილიტაციის კურსის გავლის შემდეგ ვაჟა "ტორპედოს" კვლავ დიდ სამსახურს გაუწევს.</p><p><em>(იბეჭდება მცირე ცვლილებით)</em></p><p><strong>ყოველდღიური სპორტული გაზეთი "ლელო"</strong></p>
koka
ტორპედო "ამართლებს" იმიტომ რომ ქართული ფეხბურთის დონე დაბალია და არა იმიტომ რომ წარმატებული ექსპერიმენტია.
L.E.S
"ულტრათანამედროვე დონეზე კეთდება "ტორპედოს" ბაზაზე არსებული სამზარეულო"......სამზარეულო მაგარი ხაზგასასმელია.....:). "ულტრათანამედროვე დონეზე კეთდება "ტორპედოს" ბაზაზე არსებული: სატრენაჟორო დარბაზი...საცურაო აუზი....ახალი სტადიონი" ეს იქნებოდა მაგარი
გივი-გაგა
სამი წლის მერე ისევ ლოკომოტივიდან ავიყვანთ ბავშვებს? აკადემია, აკადემიაო , ალბათ ჩაილულის წყალი დალია აკადემიამ ხსენებაც აღარაა. ბავშვთა ფეხბურთშიც უნდა ჩაიდოს ფული.
ოფიციალურად: "კოლოსმა" ზურაბ რუხაძე წარადგინა
საქართველოს ახალგაზრდული ნაკრების ფეხბურთელი უკრაინულ კლუბში გადავიდა
თემურ ქეცბაიამ შესაძლოა, ქართული გუნდი ჩაიბაროს - მან "ანორთოსისში" დაბრუნებაზე უარი თქვა
პირველ მეოთხედში უკვე 22 ქულა ჰქონდა - დონჩიჩმა სლოვენია მეოთხედფინალში გაიყვანა
პირველი ტაიმის შემდეგ საქართველოს ნაკრები ბულგარეთს 2:0 ამარცხებს
მეორე ნახევარში უკეთესი ბითაძე გვჭირდება - საქართველოს ნაკრებმა საფრანგეთს პირველი ტაიმი მოუგო
კაპიტანი კვარაცხელია - ბულგარეთთან მატჩში საქართველოს ნაკრების შემადგენლობა ცნობილია
ოფიციალურად: "კოლოსმა" ზურაბ რუხაძე წარადგინა
ტიაგო მოტამ შესაძლოა, ბუნდესლიგის ბინადარი გუნდი ჩაიბაროს
როდრიმ მისი აზრით "ოქროს ბურთის" ორი ფავორიტი დაასახელა
"სექსის დროს არ მინახავს, არ იცოდა, რომ კამერებზე წვდომა მქონდა..." - როგორ გაიგო ღალატის შესახებ არგენტინელი ვარსკვლავის მეგობარმა გოგონამ
ფრენკ ლამპარდი შესაძლოა, სამუშაოდ პრემიერ ლიგაში დაბრუნდეს
ქოჩორაშვილი: აქამდე სწორედ იმიტომ მოვედით, რომ არასდროს ვნებდებით
ევრობასკეტის მთავარი სენსაცია - სერბეთის ნაკრები ფინეთთან დამარცხდა და ტურნირს გამოეთიშა
"შავი ლომი" "ძებრესთან" დამარცხდა
ლუქსემბურგის ახალგაზრდული ნაკრების ავტობუსი გზაში გადატრიალდა
გატუზო თავის სტიქიაშია - ზოგს წაუთაქა, ზოგს სილა გააწნა
დუე და დემბელე ლაზარეთში, ლუის ენრიკე საოპერაციო მაგიდაზე - რა ხდება პსჟ-ში?
ბულგარელთა მწვრთნელი: შეგვიძლია ის დანაკლისი აღმოვფხვრათ, რაც ჩვენი და საქართველოა ნაკრების ფეხბურთელების ხარისხს შორისაა
დავითაშვილი: ასეთები ხდება, მთავარია, ახლა არ გავიმეოროთ
სანიოლი: ისე ხდება, როგორც სკოლაში - გვირჩევნია ახალ ტაქტიკაზე ახლავე გადავეწყოთ
ანრის გაუთანაბრდა - მბაპე საფრანგეთის ნაკრებში ყველა დროის რეკორდისკენ მიდის
მატჩის დღე - ქართველებსა და ბულგარელებს ცუდად დაწყებულის გამოსწორება სურთ!
ქუთაისის "ტორპედო" - მატება მოსკოვიდან
თბილისის "ლოკომოტივი", შესაძლოა, გიორგი დევდარიანმა გაწვრთნას
დინამო (თბ)-ლოკომოტივი 3:1 - კიტეიშვილის ჰეთ-თრიკით [VIDEO]
საქართველო მხოლოდ 5 ქვეყანას უსწრებს - UEFA-მ კლუბების შედეგების მიხედვით, ახალი რეიტინგი გამოაქვეყნა
საქართველოს ჩემპიონატი და ლეგიონერები: სარეკორდო სეზონი
იმედია, ყველა არ გავარდება - დღეს ქართულ კლუბებს განმეორებითი მატჩები აქვთ
ოთხიდან ოთხივე გავარდა - რა ვიხილეთ ქართული გუნდებისგან ევროტურნირებზე?
საბრძოლო ანგარიშებით საპასუხო მატჩებში - კონფერენს ლიგის მეორე რაუნდის პირველი შეხვედრების მიმოხილვა
რა გეგმა აქვს შუსტერს? - დღეს 2 ქართული კლუბი ითამაშებს
თბილისის "ლოკომოტივი": გიორგი დევდარიანის კანდიდატურა განიხილება
უმაღლესი ლიგის X ტურის წინ: ყოველმხრივ არაპროგნოზირებადი...
დღეს სამი ქართული კლუბი ითამაშებს - წაგებით დავიწყეთ...
გიორგი დევდარიანი ახალ გუნდს აანონსებს: ყველაფერი შეიცვლება!