ბედის ირონია: გია მაჭავარიანმა წლეულს 105 კილოგრამ წონით კატეგორიაში 417 კილოგრამით მოიპოვა საქართველოს ჩემპიონობა, ლონდონის ოლიმპიურ ფიცარნაგზე კი უკრაინელმა ოლექსეი ტოროხტიმ ოქროს მედალი 412 კილოგრამით დაიმსახურა.მას შემდეგ, რაც 105 კილოში გაურკვეველი მიზეზებით ძალოსანთა პაექრობას აშკარა ფავორიტები - ჰაჯიმურატ აკაევი და დმიტრი კლოკოვი ჩამოშორდნენ, საპრიზო ადგილებზე გასვლის შანსი ერთბაშად რამდენიმე სპორტსმენს გაუჩნდა.
უპირველესი გახლდათ პოლონელი მარჩინ დოლეგა, მაგრამ მან საწყისი წონა - 190 კილოგრამი ვერ დაძლია ატაცში და შეჯიბრებას გამოეთიშა. ასევე, ნაადრევად გადაინაცვლა მაყურებლებში კორეელმა კიმმა.
ფაქტობრივად, ოთხი კანდიდატი დარჩა
სამწუხაროდ, 6 აგვისტოს გამართული პაექრობები ჩვენთვის სავალალოდ წარიმართა. გია მაჭავარიანმა ატაცში საწყისი წონა 185 კილოგრამი მხოლოდ მესამე ცდაზე დაძლია (არადა, ეროვნულ ჩემპიონატში 192-კილოგრამიანი შტანგა დაიმორჩილა). ჩვენებურს მხოლოდ ბონკი უსწრებდა 190 კილოთი. კიდევ ორ სპორტსმენს ჰქონდა აწეული 185 კილო. ყოველივეს მიუხედავად, მედლის მოპოვების შანსი ისევ რეალური ჩანდა, მაგრამ მაჭავარიანმა საწყისი წონა ვერ დაძლია (ჯერ 220, მერე - 225) და შეუფასებელი დარჩა.
ჩემპიონობა კი, როგორც ზემოთ აღვნიშნეთ, 412 კილოგრამით (ატაცი - 185, აკვრა - 227) ოლექსეი ტოროხტიმ მოიპოვა. მას ერთი კილოგრამით ჩამორჩა (184+227) ნავაბ ნასირშელალი, რომელსაც ვერცხლი ერგო.
410 კილოგრამით (190+220) მესამე ადგილი ბართლომეი ბონკმა დაიკავა.
(იბეჭდება მცირე ცვლილებით)
ყოველდღიური სპორტული გაზეთი "ლელო"
