საქართველოს 17-წლამდელთა ნაკრებმა ლატვიას 1:0 მოუგო [VIDEO]

24 ოქტომბერს თბილისში ევროპის 17-წლამდელთა ჩემპიონატის შესარჩევი ეტაპის პირველ მატჩში ჩვენმა ნაკრებმა მიხეილ მესხის სახელობის სტადიონზე ლატვიელ თანატოლებს უმასპინძლა.

გუნდებმა მატჩი ფრთხილად, ურთიერთდაზვერვით დაიწყეს. ასე გარძელდა 21-ე წუთამდე, ვიდრე ჩვენმა გუნდმა ანგარიში არ გახსნა: მარცხენა ფლანგზე კარგად გაიჭრა კაპანაძე, საჯარიმოში ჩააწოდა ბურთი, მეტოქის ცენტრალურმა მცველმა შეცდომა დაუშვა და კვარაცხელიამ გოლი გაიტანა.

აქედან მოყოლებული თამაში გაიხსნა, უფრო თვალსასეირო გახდა, გამოიკვეთა ჩვენი გუნდის უპირატესობა და მომენტებიც შეიქმნა. ჩოთალიშვილს მეკარემ აუღო ახლო მანძილიდან დარტყმული, გელაშვილმა კი ბურთი ხარიხას გაარტყა.

მეორე ტაიმში სტუმრებმა თამაში გამოასწორეს, ჩვენს კარზე იერიშების მიტანაც დაიწყეს, ვილერსმა ხელსაყრელი მომენტი ვერ გამოიყენა, ვილუმსონსმა გოლიც გაგვიტანა, თუმცა საბედნიეროდ მსაჯმა თამაშგარე მდგომარეობა დააფიქსირა.

71-ე წუთზე კი კარში მაკრატელათი დარტყმა სცადა ჩოთალიშვილმა, უნებურად მოწინააღმდეგეს მიარტყა თავში ფეხი, მეორე ყვითელი ბარათი მიიღო და საქართველოს ნაკრები რიცხობრივ უმცირესობაში დარჩა. მიუხედავად ამისა, ჩვენმა გუნდმა დარჩენილ დროში მეტოქეს გასაქანი არ მისცა და მინიმალური ანგარიშით გაიმარჯვა.

საქართველო: ხარშილაძე, კაპანაძე, გელაშვილი, ნონიკაშვილი, აზაროვი, კვარაცხელია (71. შტრუნცი), ჩოთალიშვილი, გულიაშვილი (80+2. ჯანგველაძე), დავითაშვილი, აბზიანიძე (64. შალიკაშვილი), მექვაბიშვილი

ლატვია: დუბოდელოვსი, ტრუცკოვსკისი, ლიბეკსი, ოზოლინსი, ვარსლავანსი, ვილერსი, მაგრინსი, კრიუკოვიცსი (55. კალნინში), სიდოროვსი (26. ვილუმსონსი), ფედოროვიცსი, კირკილსი

გოლი: კვარაცხელია, 21 (1:0)

გაძევება: ჩოთალიშვილი (71)

გაფრთხილება: მაგრინსი (27), ჩოთალიშვილი (44), გულიაშვილი (59), აზაროვი (61), ვილუმსონსი (61)

დღესვე დავით პეტრიაშვილის სახელობის სტადიონზე იტალიამ მონტენეგრო დაამარცხა (3:0).

ჩვენი ნაკრები 27 ოქტომბერს მონტენეგროს შეხვდება.