ჩემპიონთა ლიგის ფინალი: უბრალო დამთხვევა, თუ...

თუ "ბაიერნის" ფანი ხართ, ეს ფაქტები, შესაძლოა, ცუდ ნიშნებად მიიღოთ, "დორტმუნდის" ქომაგებს კი ქვემოთ მოყვანილი დამთხვევები გაახარებთ. ფაქტია, რომ მიმდინარე სეზონი და 2013 წელი ძალიან ბევრი რამით ჰგავს 1997 წელს, როცა ჩემპიონთა ლიგა დორტმუნდის "ბორუსიამ" მოიგო.

პარალელები: 1997-2013
- გერმანიის ჩემპიონი 1997 წელსაც "ბაიერნი" გახდა.

- 1997 წელს გერმანიის თასი "შტუტგარტმა" მოიგო და დიდი შანსია, რომ ახლაც მოიგოს (ერთ კვირაში ფინალში "ბაიერნს" ხვდება)

- 1997 წელს პირველი ბუნდესლიგიდან დიუსელდორფის "ფორტუნა" გავარდა. ისევე, როგორც ახლა.

- ისევე, როგორც 1997 წელს, მეორედან პირველ ბუნდესლიგაში ახლაც ბერლინის "ჰერტა" და ქვემოსაქსონიური კლუბი (მაშინ ვოლფსბურგი, ახლა ბრაუნშვაიგი) აღზევდნენ. სხვათა შორის, 1997 წელს მესამე "ბედნიერი" "კაიზერსლაუტერნი" იყო, რომელსაც ახლაც აქვს ელიტაში გადასვლის შანსი.

- 1997 წელს "დორტმუნდმა" ჩემპიონთა ლიგის ფინალის წინ, ბუნდესლიგის ბოლო მატჩი 1:2 წააგო. ასე მოხდა ახლაც: "ბორუსია" ბოლო ტურში "ჰოფენჰაიმთან" სწორედ 1:2 დამარცხდა.

- ისევე, როგორც 1997 წელს, "ბაიერნმა" ბუნდესლიგის ბოლო ტურში ახლაც მიონხენგლადბახში ითამაშა.

- ზუსტად ისე, როგორც 1997 წელს, გერმანიის ჩემპიონატის საუკეთესო ბომბარდირი ახლაც "ლევერკუზენის" ფეხბურთელი გახდა - მაშინ ულფ კირსტენი, ახლა შტეფან კისლინგი.

- 1997 წელს გერმანიის სეზონის საუკეთესო ფეხბურთელის სტატუსით დორტმუნდელი მათიას ზამერი თამაშობდა, 2013 წელს კი - ასევე დორტმუნდელი მარკო როისი.

- "ბაიერნის" საუკეთესო გოლეადორმა ბუნდესლიგაში 1997 წელსაც 15 გოლი გაიტანა და 2013-შიც - მაშინ ეს იურგენ კლინსმანმა გაკეთა, ახლა კი მარიო მანჯუკიჩმა.

- ისევე, როგორც 1997-ში, "ბაიერნისა" და "დორტმუნდის" ორივე ბუნდესლიგაში ახლაც ფრედ დასრულდა.

- ისევე, როგორც 1997 წელს, ინგლისის ჩემპიონი ახლაც "მანჩესტერ იუნაიტედი" გახდა, ხოლო წლის მწვრთნელად კი სერ ალექს ფერგიუსონი დაასახელეს.

- იტალიის ჩემპიონი 1997 წელსაც "იუვენტუსი" გახდა, პორტუგალიის - "პორტუ", თურქეთის - "გალათასარაი", საქართველოსი - თბილისის "დინამო"...

ყოველდღიური სპორტული გაზეთი "ლელო"