ბოლო სამი წელია, თბილისის ფეხბურთის ფედერაცია დედაქალაქის საუკეთესო საფეხბურთო სკოლას, ბავშვთა გუნდს და მწვრთნელს ასახელებს. ტრადიცია არც შარშან დარღვეულა - კინოთეატრ "საქართველოში" გამართულ გალა-საღამოზე თბილისის საუკეთესო მწვრთნელად კობა ჟორჟიკაშვილი დაასახელეს.ჟორჟიკაშვილს ტიტულები არც მანამდე აკლდა, მის ხელში ბევრი ფეხბურთელი დაფრთიანებულა, მან ორჯერ გაიყვანა ასაკობრივი ნაკრებები ელიტრაუნდსა და ევროპის ჩემპიონატზე, ახლა კი რუსთვის "მეტალურგის" მმართველმა ბუბა ტყავაძემ უმაღლესი ლიგის გუნდი ჩააბარა.
ახალი მწვრთნელის ხელმძღვანელობით "მეტალურგმა" პირველი შეხვედრა ზუგდიდში "ბაიასთან" გამართა და 2:0 მოიგო. თუმცა, ჟორჟიკაშვილის აზრით, გუნდი დასაბალანსებელია და საკადრო ცვლილებებსაც
- ჩემპიონატი უკვე დაწყებულია და მკვეთრი საკადრო ცვლილებები არ მოხდება, სამწვრთნელო შტაბიც უცვლელად დავტოვეთ. ყველა მწვრთნელს ვიცნობ, მაგრამ ერთად არ გვიმუშავია და ვნახავთ, ვინ როგორ საქმიანობს. რაც შეეხება ცვლილებებს შემადგენლობაში, ეს მალე მოხდება - გავუშვებთ იმ მოთამაშეებს, რომლებიც უმაღლესი ლიგის მოთხოვნებს ვერ აკმაყოფილებენ.
- კონკრეტულად ვის გულისხმობთ?
- ამაზე პასუხს ერთ კვირაში გაგცემთ, მანამდე კი არ მინდა, ეს ამბავი მოთამაშეებმა გაზეთიდან შეიტყონ.
- ახლებსაც მოიყვანთ?
- აუცილებლად, რადგან გუნდი დასაბალანსებელია. აქვე მინდა ვთქვა, რომ ჩემმა წინამორბედმა თორნიკე მაისურაძემ დიდი სამუშაო გასწია, გულით და სულით იმუშავა და, რაც არანაკლებ მნიშვნელოვანია, გუნდში ჯანსაღი ატმოსფერო დამხვდა. მაგრამ ყველა მწვრთნელს საკუთარი ხედვა აქვს და მეც შეძლებისდაგვარად ჩემი შეხედულებით წარვმართავ სელექციას.
მიმაჩნია, რომ "მეტალურგში" ზოგიერთი პოზიცია დასაბალანსებელია, რათა ყველა რგოლსა და ადგილზე კონკურენცია შევქმნათ. სხვაგვარად გუნდი ვერ გაძლიერდება.
- ამ ცვლილებებს როდისთვის გეგმავთ?
- ყველაფერი 31 აგვისტომდე, სატრანსფერო ფანჯრის დახურვამდე გვინდა მოვასწროთ, რათა წასულები უგუნდოდ არ დარჩნენ - თუ დროულად გავუშვებთ, სხვა კლუბში მოწყობის მეტი შანსი ექნებათ.
- ბევრის გაშვებას გეგმავთ?
- რამდენიმესი, თუმცა ბირთვი იგივე დარჩება, რადგან ურიგო შემადგენლობა არ არის.
- მერედა, "მეტალურგს" აქვს სასურველი ტრანსფერის განხორციელების შესაძლებლობა?
- აჯობებს, ამ კითხვით ბატონ ტყავაძეს მიმართოთ, მაგრამ, როგორც ვიცი, "მეტალურგი" საქართველოს კვალობაზე საკმაოდ კარგად დაფინანსდება.
- მიზნად რას დაისახავთ?
- უპირველესი მიზანი ევროტურნირზე მოხვედრაა, ჩემპიონატის მსვლელობისას კი ვნახავთ, რისი უნარი გვექნება. ვიტყვი იმასაც, რომ ჩვენთვის ძალიან მნიშვნელოვანი იქნება ზამთრის მოსამზადებელი ეტაპი. მანამდე მოთამაშეებს დავაკვირდებით, გავიგებთ, ვის რა შეუძლია და თუ საჭირო გახდება, გავძლიერდებით. თუმცა, ვიმეორებ, არსებული კონტინგენტის იმედი გვაქვს. ურიგო ბიჭები ნამდვილად არ არიან, მაგრამ გარკვეული კორექტივები აუცილებელია.
ყოველდღიური სპორტული გაზეთი "ლელო"
