ქუთაისის "ტორპედოში" მნიშვნელოვანი ცვლილებებია, თუმცა ჯერ გავეცნოთ გუნდში მიმდინარე მოვლენებთან დაკავშირებულ კომენტარს, რომელიც კლუბის სპორტულმა დირექტორმა ბესო აბაშიძემ გააკეთა."ვინაიდან ბოლო დროს აქტიურად ვრცელდებოდა ხმები, თითქოს გუნდი მწვრთნელებმა დატოვეს, საჭიროდ მივიჩნიეთ ამ ინფორმაციის ოფიციალურად უარყოფა, რათა მას ფეხბურთელებზე ნეგატიური ზეგავლენა არ მოეხდინა და მზადების პროცესი არ შეფერხებულიყო. ვხვდებით, რომ ქუთაისის "ტორპედოს" სეზონის სტარტი კრიტიკას იმსახურებს. მწვრთნელები მდგომარეობის გამოსასწორებლად დროულად გააკეთებენ სათანადო დასკვნებს.. გამცნობთ სიახლესაც: თითქმის გადაწყვეტილია, რომ დღეს კლუბს ახალი ფეხბურთელი შეემატება", - თქვა აბაშიძემ.
"ტორპედოს" პრესსამსახურმა კი დაპირებული სიახლეების
დანაპირები "ახალი ფეხბურთელი" კი ძველი ტორპედოელი აღმოჩნდა - სატრანსფერო ფანჯრის დახურვამდე ერთი დღით ადრე გუნდთან 1-წლიანი კონტრაქტი დავით გამეზარდაშვილმა გააფორმა.
"ქუთაისის "ტორპედომ" სატრანსფერო ფანჯრის ბოლო დღეს კიდევ ერთი ფეხბურთელი დაიმატა. ახალწვეული ყველასთვის კარგად ნაცნობი და ქუთაისელი გულშემატკივრისთვის არაერთხელ სიხარულის მომტანი 29 წლის ქუთაისელი, 196 სმ სიმაღლის ცენტრალური მცველი დავით გამეზარდაშვილია.
"ბაიანომ" (როგორც მას ქუთაისში შეარქვეს) კარიერა "ტორპედოში" დაიწყო, 5 წელი ლატვიის "სკონტოს" უკაპიტნა, "ზესტაფონში" სეზონი ითამაშა და ერთი წლით მოლდოვურ "დაჩიაშიც" გამოდიოდა. მან ქომაგებს უკანა ხაზში საიმედო მოქმედების გარდა, მისი ამპლუის მოთამაშისთვის უჩვეულო შედეგიანობით დაამახსოვრა თავი.
ფეხბურთელმა მშობლიური ქალაქის გუნდთან ერთწლიანი კონტრაქტი გააფორმა. წარმატებებს ვუსურვებთ დავითს, იმედი გვაქვს, მისი ქუთაისის "ტორპედოში" დაბრუნება ფეხბედნიერი იქნება და გუნდთან ერთად დიდ გამარჯვებებს იზეიმებს" - იუწყება "ტორპედოს" პრესსამსახური.
ყოველდღიური სპორტული გაზეთი "ლელო"
