დავით თარგამაძე: შესაძლოა, ზამთარში მე და ოქრიაშვილი "შახტარში" დავბრუნდეთ

დავით თარგამაძე მოკლე პერიოდში ჩამოყალიბდა საქართველოს ეროვნული ნაკრების ერთ-ერთ წამყვან ფეხბურთელად. იგი გამორჩეულია ეროვნულ გუნდშიც და უკრაინულ "ილიჩევეცშიც".

ჩვენი ეროვნული გუნდის 23 წლის ნახევარმცველი "ლელოს" რესპონდენტია და სანაკრებო და საკლუბო თემებზე ესაუბრება.

როგორც თარგამაძისგან შევიტყვეთ, გამორიცხული არ არის, ზამთარში "ილიჩევეცზე" უფრო ამბიციურ კლუბში აღმოჩნდეს.

- პირველ რიგში, ოქტომბრის სანაკრებო მატჩები შევაფასოთ...
- არ ვიტყოდი, რომ ფინეთსა და ბელორუსში ცუდად ვითამაშეთ, მაგრამ ფაქტია, ამ ორი მატჩის ჯამში არადამაკმაყოფილებელი შედეგი ვაჩვენეთ. ფინეთში გამარჯვების მშვენიერი შანსი გავუშვით ხელიდან, ბელორუსში კი პირველივე ტაიმში ორი უაზრო გოლი მივიღეთ და ამან თამაშის გადარჩენის შანსი მოგვისპო.

- საკუთარ თამაშს როგორ შეაფასებ?
- საკუთარ თავზე საუბარი გამიჭირდება. ამაზე სჯობს, ჟურნალისტებმა და გულშემატკივრებმა იმსჯელონ. ზოგადად კი იმას ვიტყვი, რომ საკუთარი თავის მიმართ ყოველთვის მომთხოვნი ვარ და რასაც უნდა მივაღწიო, არასდროს დავკმაყოფილდები.

- გრძნობ იმ ტვირთს, რასაც ნაკრების ლიდერობა ჰქვია?
- მოხარული ვარ, თუ გულშემატკივრები ნაკრების ერთ-ერთ ლიდერად მიმიჩნევენ. ეს უდიდეს პასუხისმგებლობას მაკისრებს და შევეცდები, ბევრი ვიშრომო ამ ნდობის გასამართლებლად. არა მხოლოდ ლიდერობა, არამედ ნაკრების წევრობაც ძალიან დიდი პასუხისმგებლობაა ქვეყნისა და ხალხის წინაშე.

- როგორც ფეხბურთელს, რა შეგძინა ნაკრებში გატარებულმა პერიოდმა?
- პირველ რიგში, უდიდესი გამოცდილება, რამაც კარიერაში დიდად შემიწყო ხელი. ნაკრები არცთუ ხშირად თამაშობს და ამის გამო თითოეული ფეხბურთელი ვალდებულია, გუნდისთვის ბოლომდე დაიხარჯოს. ყველაფერს ვიღონებ იმისთვის, რომ ნაკრების წევრობა შემდგომშიც დავიმსახურო.

- მსოფლიო ჩემპიონატის შესარჩევ ჯგუფში მესამე ადგილის დაკავება რამდენად რეალურად მიგაჩნია?
- დღეისთვის სწორედ მესამე ადგილზე ვართ და ყველა შანსი გვაქვს საიმისოდ, ეს პოზიცია რომ განვიმტკიცოთ. დარჩენილ მატჩებში თავს არ დავზოგავთ იმისთვის, რომ ქულათა მარაგი შევივსოთ და ქართველი გულშემატკივრები გავახაროთ.

- აქვს საქართველოს ნაკრებს იმის პერსპექტივა, უახლოეს მომავალში დღევანდელზე უფრო წარმატებულ გუნდად რომ ჩამოყალიბდეს?
- უდავოდ აქვს, პირადად მე ამის ნიშნებს ნამდვილად ვხედავ. ვფიქრობ, ამას ხალხიც ამჩნევს და სანაკრებო მატჩებზე გულშემატკივართა რაოდენობა ამიტომაც გაიზარდა. წინსვლის იმედი ყველას გვაქვს, საქართველოს ნაკრებმა შედეგები აუცილებლად უნდა გააუმჯობესოს.

- წესით, საკლუბო კარიერით უკმაყოფილო არ უნდა იყო...
- უკმაყოფილების საფუძველი მართლაც არ მაქვს. მე და თორნიკე ოქრიაშვილი "ილიჩევეცის" ძირითად შემადგენლობაში სისტემატურად ვთამაშობთ და კარგი პრესაც გვაქვს. აქ თავს კომფორტულად ვგრძნობთ, თუმცა ფეხბურთელი მაქსიმალისტი უნდა იყოს და მეც და თორნიკესაც უფრო მაღალ დონეზე გვსურს ძალების მოსინჯვა.

- დონეცკის "შახტარი" ხომ არ გეგმავს თქვენს დაბრუნებას?
- შესაძლებელია, ზამთარში მე და ოქრიაშვილი "შახტარში" მართლაც დავბრუნდეთ. შეიძლება, ახლო წარსულში მზად არ ვიყავით დონეცკელთა ძირითადში მოსახვედრად, ახლა კი ორივე ვგრძნობთ, რომ საამისოდ რეალური შანსი გვაქვს.

რა თქმა უნდა, "შახტარში" დამკვიდრება ძალიან რთული იქნება, მაგრამ მე და თორნიკე ამ გამოწვევისთვის მზად ვართ.

- "ილიჩევეცი" მიზნად რას ისახავს?
- საუკეთესო ხუთეულში მოხვედრას, ანუ ევროპის ლიგის საგზურის მოპოვებას. ჯერჯერობით მერვე ადგილზე ვართ, მაგრამ ხუთეულში შესვლის პოტენციალი ნამდვილად გვაქვს.

- ალბათ, ისიც გიფიქრია, რომ შენი სტილის ფეხბურთელისთვის "ცოტა სხვანაირ" ლიგაში თამაში უმჯობესი იქნებოდა...
- ჩემი გადასაწყვეტი რომ იყოს, დიდი სიამოვნებით ვითამაშებდი ესპანეთში ან ჰოლანდიაში, მაგრამ რეალისტი ვარ და არსებული ვითარებიდან გამომდინარე უნდა ვიმოქმედო. გარკვეული პერიოდის წინ იყო საუბარი ჩემს "ვიტესში" გადასვლაზე, მაგრამ კონკრეტული წინადადებით არავის მოუმართავს.

ყოველდღიური სპორტული გაზეთი "ლელო"