ლუკა ზარანდია ამსტერდამის "აიაქსს" შეუთანხმდა

"ლელოს" საინტერესო ამბავი გაუმხილეს: ლუკა ზარანდია ამსტერდამის "აიაქსს" სიტყვიერად შეუთანხმდა, მაგრამ ჯერ მაინც უცნობია, რომელ ევროპულ კლუბში მოხვდება.

შეგახსენებთ, რომ 17 წლის თავდამსხმელი გულშემატკივარმა გიორგი დევდარიანის 17-წლამდელთა ნაკრებიდან გაიცნო, წლეულს კი გია ცეცაძის ნაკრებში 19-წლამდელთა ევროპის ჩემპიონატზეც ითამაშა.

საინტერესოა, რომ 17-წლამდელებში მან 8 მატჩში 7 გოლი ჩაიწერა აქტივში, 2012 წელს კი, ბელარუსის, პოლონეთისა და აზერბაიჯანის საერთაშორისო სანაკრებო ტურნირებზე, საუკეთესო მოთამაშედ აღიარეს.

ზაფხულში ზარანდია ქუთაისის "ტორპედოში" ჩაირიცხა, მაგრამ იქ დროებითი კონტრაქტი ჰქონდა, 1 აგვისტოს გუნდი დატოვა და თბილისის "ლოკომოტივს" დაუბრუნდა.

მაგრამ საეჭვოა, ზარანდია საქართველოში დიდხანს დარჩეს. წლის დასაწყისში მას არნემის "ვიტესი" იწვევდა.

19-წლამდელთა ელიტრაუნდამდე კი ამსტერდამის "აიაქსში" იყო სინჯებზე და გუნდის მთავარ მწვრთნელ ფრანკ დე ბურს თავი მოაწონა კიდეც. მაგრამ ხელი ასაკმა შეუშალა - 17 წლის ჭაბუკი ევროკავშირის ქვეყანაში კონტრაქტს ვერ გააფორმებდა.

ევროპის ჩემპიონატის შემდეგ კი მისით სხვა ცნობილი კლუბებიც დაინტერესდნენ...

"სიტყვიერი შეთანხმება მართლაც გვაქვს, ჩემი აყვანით დაინტერესებულებიც არიან, მაგრამ ეს საკითხი ჯერაც გადასაწყვეტია.

საქმე ისაა, რომ სხვა გუნდებიც არიან დაინტერესებულები და გადაწყვეტილებას სწორედ აქედან გამომდინარე მივიღებ. სამ კლუბზეა ლაპარაკი, მაგრამ ახლა ვერ დავაკონკრეტებ".

რატომ თქვა უარი ვიტესზე?
"არ მინდა ვთქვა, რომ "ვიტესსა" და "აიაქსზე" უარი ვთქვი - უტაქტობაც იქნება და ძალზე პრეტენზიულიც. მაგრამ ჩემი საკითხი ახლა წყდება.

17 თებერვალს 18 წლის გავხდები და ერთ-ერთ კლუბთან კონტრაქტს ამის შემდეგ გავაფორმებ. მანამდე, სათამაშო პრაქტიკისთვის "ლოკომოტივში" დავბრუნდი".

ევროპა და ათლეტიზმი
"ვცდილობ, ათლეტიზმში მოვუმატო და ამაში "ლოკომოტივიც" მეხმარება. ევროპაში ამის გარეშე მართლაც გამიჭირდება, მაგრამ ეს ძალიან საფრთხილო საკითხიცაა და ზომიერი ვარჯიშებია საჭირო, ზედმეტმა დატვირთვამ, შესაძლოა, ცუდად იმოქმედოს".

ლოკომოტივის პერსპექტივა
"ლოკომოტივი" ახლა ყალიბდება, ერთად სულ სამი შეხვედრა ჩავატარეთ და აქცენტი სწორი ფეხბურთის თამაშზეა გადატანილი. უმაღლესში გადასვლა კი, ალბათ, მომავალ სეზონში უფრო რეალური იქნება".

ყოველდღიური სპორტული გაზეთი "ლელო"